Azərbaycanın koronavirus təhlükəsinə qarşı gördüyü tədbirlər beynəlxalq təşkilatlar tərəfindən müsbət qarşılanır. Ölkə başçısı İlham Əliyevin tapşırığı ilə bu istiqamətdə aparılan işlər, virusun yayılmaması üçün atılan önləyici addımlar Ümumdünya Səhiyyə Təşkilatı tərəfindən dəfələrlə müsbət qiymətləndirilib.
Avqustun 31-də Azərbaycan Prezidenti İlham Əliyev Fövqəladə Hallar Nazirliyinin Tibb Mərkəzinin koronaviruslu xəstələrin müalicəsi üçün nəzərdə tutulan modul tipli növbəti hospitalının açılışında videoformatda iştirak edərkən ÜST-in koronavirusla mübarizədə Azərbaycanın gördüyü işə verdiyi dəyər haqqında fikir bildirib. Prezident qeyd edib ki, ÜST Azərbaycanda bu sahədə görülən işlərə çox yüksək qiymət verib və Azərbaycanı nümunəvi ölkə adlandırıb: “Bu, həqiqətən də belədir. Yəni görülmüş işlər, bu sahəyə ayrılan dövlət vəsaiti, səfərbərlik işləri, xəstəxanaların, laboratoriyaların inşası, sosial proqramların həyata keçirilməsi, bütün bunlar, əminəm ki, bizim mübarizədə əsas rol oynayıb. Ona görə bu gün də bu təmaslar davam edir və əminəm ki, birgə səylərlə biz bu məsələni - COVID-in nəzarətdə saxlanmasını təmin edəcəyik”.
“Azərbaycanın pandemiya ilə mübarizə dövründə beynəlxalq imici çox yüksəlib”
“Vəfa” Sosial-İctimai Birliyinin sədri Fatimə Hacıbəyli qeyd etdi ki, Prezident İlham Əliyev koronavirus pandemiyası dövründə Azərbaycanın dünyada nüfuzunu, imicini daha da yüksəltdi: “Azərbaycanın pandemiya ilə mübarizə dövründə beynəlxalq imici çox yüksəlib. Azərbaycanın əhalisinin sayı 10 milyon nəfərdir, ancaq kiçik ölkə olmasına baxmayaraq, orta dövlətlər sırasına keçib. Çünki çox birləşdirici funksiyalara malikdir. Azərbaycan COVID-19-la mübarizə məqsədilə fərdi qaydada çoxlu sayda ölkəyə, ÜST xətti ilə Qoşulmama Hərəkatına üzv 20-yə yaxın ölkəyə humanitar yardım göstərib. Bir sözlə, Azərbaycan özünü çox ləyaqətli aparıb. Dost çətin gündə bilinər və Azərbaycan da bu çətin günlərdə özünü bir dost kimi apardı. Azərbaycan müraciət edən bütün ölkələrə yardım əlini uzatdı. Bu da ölkəmizə rəğbəti artırdı”.
Həmsöhbətimiz onu da əlavə etdi ki, Azərbaycan pandemiya ilə mübarizədən çox az itkilərlə çıxır: “Çünki Azərbaycanda koronavirusla mübarizə sahəsində səhiyyə sistemində müvafiq infrastruktur yaradılıb. Modul tipli xəstəxanaların inşa edilərək istifadəyə verilməsi koronavirusla bağlı mübarizədə mövcud imkanları daha da genişləndirib. Azərbaycanda həyata keçirilən tədbirlərin əsas məqsədi həm də kritik vəziyyətə hazır olmaq, ən böhranlı vəziyyətdə belə bütün xəstələrə tibbi xidmətin göstərilməsini təmin etməkdir. Əsas vəzifə insanları xəstəlikdən qorumaq, onların həyatını xilas etməkdir. Hazırda Azərbaycanda mövcud səhiyyə imkanları vəziyyəti nəzarət altında saxlamağa imkan verir”.
Birlik sədri qeyd etdi ki, beynəlxalq aləmdə Azərbaycanın koronavirusla bağlı mübarizə metodları təqdirlə qarşılanır: “ÜST Azərbaycanı bir neçə dəfə bu sahədə nümunəvi ölkə adlandırıb. Bu, ilkin dövrdən başlayaraq ötən dövr ərzində Azərbaycanın koronavirusla mübarizə sahəsində fəaliyyətinin təqdir olunduğunu göstərir”.
Son olaraq bildirək ki, məşhur beynəlxalq təşkilatlar hesabatlarında Azərbaycanın koronavirusla mübarizə sahəsində gördüyü işləri yüksək qiymətləndirir və digər ölkələrə Azərbaycanı nümunə kimi göstərir.
Günel CƏLİLOVA
