Paytaxt Bakıda, eləcə də rayonlarda taksi xidmətilə məşğul olan insanların sayı kifayət qədər çoxdur. Son illər isə taksi xidməti daha rəqabətli fəaliyyət göstərir. Belə ki, taksi fəaliyyəti ilə məşğul olan şirkətlərin sayı artdıqca, həm keyfiyyət, həm də qiymətlər əlçatanlaşır. Lakin bu sistemin dəyişilməsini düşünənlər də var. Hazırda vahid qiymətlərin tətbiq olunması müzakirə olunur.
Qeyd edək ki, Azərbaycanda taksi fəaliyyətinin tənzimlənməsi, qanunvericiliyin təkmilləşdirilməsi və səmərəli nəzarət mexanizmlərinin yaradılması məqsədilə Bakı Nəqliyyat Agentliyi (BNA) konsepsiya hazırlayıb. Konsepsiyada vahid dispetçer mərkəzinin yaradılması, tarif sisteminin və kvotanın tətbiqi, eyni zamanda, sahibkarlıq fəaliyyətinin təkmilləşdirilməsi ilə bağlı məsələlər öz əksini tapıb. BNA-dan verilən məlumata görə, konsepsiyanın icrası nizamlı, qanuni, sərnişinlər üçün təhlükəsiz və rahat, eyni zamanda, sürücülər üçün zəmanətli taksi xidmətinin təşkilinə imkan verəcək.
Maraqlıdır, taksilərdə vahid tarifin tətbiq edilməsi bu sahədə olan rəqabəti sonlandıracaq və ya keyfiyyətin artırılmasına səbəb olacaq?
“Tariflər elə müəyyənləşməlidir ki, bir tərəfdən sərnişinlər üçün maliyyə ağırlığı yaratmasın, eyni zamanda…”
Millət vəkili Vüqar Bayramovun sözlərinə görə, aparılan tədqiqatlar nəticəsində məlum olub ki, taksi xidmətinin keyfiyyəti yüksək deyil: “Çox təəssüf ki, biz son illər bu sektorda xidmətin keyfiyyətinin artmasını müşahidə etməmişik. Baxmayaraq ki, sektorda fəaliyyət göstərən şirkətlətin sayında artımlar var, amma bu şirkətlərin sayının artması xidmətin keyfiyyətinin artmasına gətirib çıxarmır. Hətta pandemiya dövründə belə taksi sürücülərinin koronavirusa yoluxması ilə yanaşı, bir sıra hallarda qaydalara əməl etməməsi də müşahidə olunur. Məsələn, tibbi maskalardan istifadə etməməsi kimi hallar var. Xidmət keyfiyyətinin artırılması ilə bağlı standartların olması məqsədəuyğun olardı. Vahid tariflərin tətbiq olunmasına gəldikdə isə, bildiyimiz kimi, bu praktika bir sıra inkişaf etmiş ölkələrdə, o cümlədən, qonşu Türkiyədə var. Vahid tarif çərçivəsində taksi xidmətlərinin həyata keçirilməsi reallaşır. Hələlik tariflər elan olunmadığı üçün, konkret tariflərin müzakirəsi mümkün deyil. Amma bizim təklifimizə görə, tariflər elə müəyyənləşməlidir ki, bir tərəfdən sərnişinlər, yəni müştərilər üçün maliyyə ağırlığı yaratmasın, sərnişinlərin ödəmə qabiliyyətinə uyğun olsun, eyni zamanda, bu, imkan versin ki, taksi şirkətləri gəlir əldə edə bilsinlər, bu sektorda gəlirliyi artırmaq mümkün olsun. Bu baxımdan, vahid tariflər müəyyənləşəcəksə, bunun optimal tariflər formasında tətbiqi məqsədəuyğun olardı”.
Günel CƏLİLOVA
