“Bütün kateqoriyadan olan insanlar dövlət tərəfindən maddi dəstəklə təmin edilib”. Bunu Prezident İlham Əliyev avqustun 31-də Fövqəladə Hallar Nazirliyinin Tibb Mərkəzinin koronaviruslu xəstələrin müalicəsi üçün nəzərdə tutulan modul tipli növbəti hospitalının açılışında etdiyi çıxışında deyib.
Ölkə başçısının sözlərinə görə, pandemiya həm ölkə iqtisadiyyatına, həm də insanların sosial vəziyyətinə mənfi təsir göstərib: “Bu təsirin fəsadlarını azaltmaq üçün praktiki addımlar atılır. Beş milyona yaxın insan geniş sosial paketlə əhatə olunub. Həm dövlət sektorunda, həm özəl sektorda işləyənlər, eyni zamanda, işsizlər, o cümlədən, qeyri-formal formada işləyənlər, aztəminatlı təbəqəyə aid olan insanlar - bütün kateqoriyadan olan insanlar dövlət tərəfindən maddi dəstəklə təmin edilib. Bu, bir daha onu göstərir ki, insanların rifahı, onların sosial vəziyyəti və əlbəttə ki, sağlamlığı bizim üçün əsas məsələdir. Pandemiyanın ilk günlərindən demişdim ki, bizim üçün insanların sağlamlığı prioritet məsələdir və biz bütün səylərimizi bu məsələnin həllinə istiqamətləndirdik. Təbii ki, belə olan halda, iqtisadi sahədə çətinliklər də labüd idi. Ancaq hesab edirəm ki, başqa ölkələrlə müqayisədə Azərbaycanda iqtisadi sahədə də vəziyyət daha yaxşıdır”.
Görünən odur ki, Azərbaycanda bütün təbəqələrə sosial qayğı göstərilir.
“Özəl sektor üzrə 760 min nəfərin işsizliklə üzləşməsinin qarşısı alınıb”
Məsələyə münasibət bildirən ekspert Rəsul Cahangirlinin fikrincə, Azərbaycan nadir ölkələrdəndir ki, pandemiya ilə əlaqədar bütün təbəqələrə yardım edilir: “Ölkədə dövlət bütün imkanlardan istifadə edərək əhaliyə sosial qayğı göstərir. İşsizlərə bir neçə dəfə 190 manat pul yardımı edilib. İşləyənlərə aldıqları məvaciblərin yarısı dövlət vəsaiti hesabına qarşılanıb. Maliyyə həcmi 3,5 milyard manatdan çox olan bu paket müstəqillik dövrünün ən böyük yardım proqramıdır. Bu paketə əsasən bir neçə istiqamət üzrə dövlət dəstəyi proqramı hazırlandı. Bunun ardınca pandemiya ilə əlaqədar olaraq elan edilən karantin dövründə əhalinin sosial durumunun yaxşılaşdırılması istiqamətində bir çox qərar qəbul edildi. Məşğulluq və sosial rifaha dəstək tədbirləri 5 milyon nəfərdən çox ölkə sakinini əhatə edib. Dövlət sektorunda çalışan 900 min nəfərin iş yeri və əməkhaqları qorunub. Özəl sektor üzrə 760 min nəfərin işsizliklə üzləşməsinin qarşısı alınıb. İlin əvvəlindən əmək müqavilələrinin sayı 120 min artıb. Təkcə aprel-may aylarında 600 min şəxsə 190 manat birdəfəlik müavinət ödənilib. Avqustda da bu prosesə yenidən start verildi. Avqust ayında 13 şəhər və rayon üzrə 278 min nəfərə 53 milyon manat ödənib. Bununla belə, sosial baxımdan həssas şəxslərlə də bağlı sosial dəstək tədbirləri həyata keçirilir. Belə ki, 2 milyon şəxsə sosial ödənişlərin davamlılığı təmin edilib. 85 min ailəyə (aylıq orta məbləğ 225 manat) ünvanlı sosial yardım verilib. 15 mindən çox tənha və əlil şəxsə evində sosial xidmət göstərilib. 100 min ailəyə 2 dəfə ərzaq payı verilib. Əhaliyə güzəştli elektrik enerjisi limiti aylıq 100 kvts. həcmində artırılıb. Pensiya və təqaüdlər üzrə 2 milyon vətəndaşa 2,8 milyard manat ödənib. Ödənişli ictimai iş yerlərinin sayı 90 minə yüksəlib. Özünüməşğulluq proqramının əhatə dairəsi 12 minə çatdırılıb”.
Ekspertin fikrincə, bütün bunlar bir daha onu göstərir ki, pandemiya ilə əlaqədar bütün təbəqələrə sosial qayğı göstərilib.
Vidadi ORDAHALLI
