Nazirlər Kabinetinin Qərarı ilə 2020-ci il sentyabr ayının 30-dək ölkə ərazisində tətbiq edilən xüsusi karantin rejimi dövründə bütün kütləvi tədbirlər, o cümlədən ictimai və digər yerlərdə şəxslərin 5-10 nəfərdən artıq qruplarda cəmləşməsi qadağan edilib, məscidlərin fəaliyyəti dayandırılıb.
Buna baxmayaraq, bəzi rayonlarda məhərrəmliklə bağlı rituallar keçirməyə cəhdlər edilib. Məlumdur ki, belə rituallar insanların kütləvi toplantısı ilə müşayiət edilir. Yaranmış vəziyyətlə bağlı Daxili İşlər Nazirliyinin mətbuat xidməti məlumat yayıb. Həmin məlumatda bildirilir ki, bu il Aşura mərasimi də xüsusi karantin rejimi dövrünə təsadüf etdiyindən, vətəndaşlarımız məsələyə anlayışla yanaşaraq, Operativ Qərargah tərəfindən müəyyən edilmiş məhdudiyyətlərə bütövlükdə əməl ediblər:“Yalnız bir neçə şəhər və rayonda insanların yoluxma risqini dəfələrlə artıran toplaşmağa cəhdlər qeydə alınıb ki, görülmüş tədbirlərlə həmin pozuntuların qarşısı alınıb. Bununla belə, bəzi kütləvi informasiya vasitələrində və sosial şəbəkələrdə müvafiq qadağaların məhz Aşura günündə dini mərasimlərin keçirilməsinə imkan verilməməsi ilə əlaqələndirməsinə cəhdlər edilib. Bu cür məlumatların yanlış olduğunu xüsusi vurğulayaraq, eləcə də insanların dini etiqad azadlığına dərin hörmətimizi ifadə edərək bildiririk ki, xüsusi karantin rejimi dövründə istənilən toplantının, hətta Silahlı Qüvvələrə dəstək xarakterli kütləvi aksiyanın keçirilməsi də yolverilməzdir. Tətbiq olunan məhdudiyyətlərin yeganə məqsədi isə əhalinin sağlamlığının müdafiəsidir. Bir daha vətəndaşlarımızı koronavirus pandemiyasının doğurduğu ciddi təhlükəni unutmamağa, bu sahədə böyük və gərgin səylər bahasına əldə olunmuş müsbət nəticələri qorumağa, o cümlədən özünütəcrid qaydalarına riayət etməyə, sosial məsafəni gözləməyə, nəfəs yollarını qoruyan vasitələrdən daim istifadə etməyə çağırırıq".
Bəzi rayonlarda dini mərasimlərin keçirilməsilə bağlı edilən qanunsuz cəhdlər həmin bölgələrin dinə bağlılığı ilə əlaqəlidir, yoxsa həmin rayon rəhbərlərinin səmərəsiz fəaliyyətilə?
İlahiyyatçı Tural İrfan qəzetimizə açıqlamasında bildirdi ki, Məhərrəm ayının Azərbaycanda xüsusi olaraq qeyd edildiyi bəllidir:“İmam Hüseynin şəhadəti ilə bağlı müxtəlif dini ayinlər həyata keçirilir. İnsanların kütləvi şəkildə bir yerə toplanması müşahidə edilir. Şəri baxımdan bunun izahı belədir ki, yoluxucu xəstəliklər dönəmində ən vacib olan dini ayin belə təxirə salına bilər. Məhərrəm ayında insanların bir yerə toplanması ilə bağlı hökm vacib deyil, müstəhəb əməl sayılır. Hansısa tarixi hadisənin yada salınması ilə bağlı Quranda vacib buyurulan əməl yoxdur. Bu baxımdan da kütləvi ayinlərin yerinə yetirilməsinin təxirə salınması mümkündür. Hətta Məhəmməd peyğəmbərin dönəmində də müxtəlif yoluxucu xəstəliklər olub. Peyğəmbərin bu barədə hədisi var ki, əgər bir bölgədə xəstəlik yayılıbsa, həmin şəhərin adamlarının kənara çıxması və kanardan ora adam buraxılması haramdır. Bu gün görülən müasir tədbirlərdə də bu qaydalara əməl olunur. Bu gün texnika inkişaf edib. Həmin toplantıları onlayn da etmək mümkündür. Bu nəticəyə gəlirik ki, yoluxucu xəstəliklərin olduğu dönəmdə insanların kütləvi bir yerə toplaşması qanunla qadağan olunaqla yanaşı, dinimiz də buna qarşı çıxır. Quranda buyurulur ki, özünüzü təhlükəyə atmayın. Tibbin buyurduğu qaydalara hər bir müsəlman əməl etməlidir. Təəssüf ki, Aşura günü biz bəzi yersiz cəhdləri gördük. Bunu hansısa rayonun ifrat dindarlığı ilə izah etmək olmaz. Şiyəliyin çox yayıldığı elə rayonlar var ki, orda qaydalara əməl edildiyinin şahidi olduq. Bakının özündə də bu mərasim çoşqu ilə keçirilir, ancaq bu ilə biz qaydalara əməl edildiyini gördük. Hesab edirəm ki, bəzi yerlərdə belə halların baş verməsinin başlıca səbəbi təbliğatın zəif aparılması, koordiniasiyanın düzgün qurulmaması ilə əlaqəlidir. Bu qadağaları heç bir halda dinə basqı kimi dəyərləndirmək olmaz”.
Məlumdur ki, bu proses müvəqqətidir, pandemiya bitdikdən sonra hər şey qaydasına düşəcək. Ona görə də dindarlarımızın bəşəriyyəti bürüyən bu bəla ilə bağlı yaranmış vəziyyəti anlayışla qarşılamaları gərəkdir.
Məhəmmədəli QƏRİBLİ
