Məlum olduğu kimi, Məhərrəm ayı bu il qlobal xarakter daşıyan koronavirus pandemiyası ilə bağlı yaranmış təhlükəli və risqli şəraitə təsadüf edir. Belə bir şəraitdə kütləvi dini tədbirlərin, ayinlərin keçirilməsi ölkəmizdə yeni növ koronavirusla mübarizədə əldə edilmiş uğurlara zərbə vura, vəziyyətin yenidən pisləşməsinə, karantin rejiminin daha da uzanmasına və ya yenidən sərtləşdirilməsinə səbəb ola bilər. Bu səbəbdən də Məhərrəm ayında insanların kütləvi bir yerə yığışıb dini tədbirlər keçirməsi düzgün sayılmır.
İlahiyyatçılarımız bu fikirdədirlər ki, belə bir şəraitdə Aşura ilə əlaqədar kütləvi dini tədbirlərin, ayinlərin keçirilməsi ölkəmizdə yeni növ koronavirusla mübarizədə əldə edilmiş uğurları heçə endirə bilər.
Qeyd etdiyimiz kimi, bu istiqamətdə edilən çağırışlara baxmayaraq, bəzi dindarlar Aşura günündə bir yerə toplaşaraq, dini ayinləri icra etməyə cəhd göstəriblər. Daxili İşlər Nazirliyi əməkdaşlarının səyi nəticəsində Aşura günündə dini mərasim keçirmək istəyənlər müəyyən olunaraq saxlanıb. Onu da vurğulayaq ki, Aşura mərasimlərində iştirak etmək istəyənlərə qanvermə kampaniyasına qoşulmaları bildirilmişdi. Düzdür, əksər insan qan verdi. Ancaq bəzi gənclər qan vermək əvəzinə, qanuna qarşı çıxaraq, kütləvi şəkildə keçirilən dini mərasimlərdə iştirak ediblər.
“Dinimizdə xəstəliklərdən əziyyət çəkənlərə köməklik təqdir olunur, xəstəliyi yaymaq isə xoşagəlməz hal kimi dəyərləndirilir”
Məsələ ilə bağlı fikir bildirən ilahiyyatçı İsmayıl Əhməd qeyd etdi ki, kütləvi şəkildə yığışmaq virusun yoluxma ehtimalının çoxalmasından xəbər verir: “Aşura mərasimlərinin kütləvi şəkildə keçirilməsi yolverilməzdir. İnanıram ki, vətəndaşlarımız anlayış göstərərək sağlamlıqlarının keşiyində durmalıdırlar. Bu il pandemiyaya görə məscidlər bağlıdır. İlahiyyatçılar ayinləri sosial şəbəkə vasitəsilə yerinə yetirirlər, evdə olan inanclı insanlar da oraya baxıb evdə ayinləri icra edə bilərlər. Bu, 10 gün ərzində mütəmadi davam edəcək".
Həmsöhbətimiz onu da vurğuladı ki, bu günlərdə Allaha xoş gedən əməllərin yerinə yetirilməsi daha vacibdir: “Məsələn, imkansız ailələrə, maddi sıxıntı çəkən insanlara ərzaq və ya hər hansı sovqatın çatdırılması daha yaxşı olardı. Kərbəla şəhidlərinin xatirəsinə qan verilməsinə gəldikdə isə, xəbər verildiyi kimi, koronavirus pandemiyası ilə əlaqədar bu il qanvermə aksiyası məscidlərdə deyil, Mərkəzi Qan Bankının filiallarında təşkil olunacaq. Şübhəsiz, bu xeyirxah əməl olduqca təqdirəlayiqdir. Unutmayaq ki, hazırda qana ehtiyacı olan xəstələrimiz var. Onu da söyləməyi özümə borc bilirəm ki, dinimizdə xəstəlikdən əziyyət çəkənlərə bu formada kömək göstərmək mərhəmət sayılır. Başqa sözlə desək, dinimizdə xəstəliklərdən əziyyət çəkənlərə köməklik təqdir olunur, xəstəliyi yaymaq isə xoşagəlməz hal kimi dəyərləndirilir”.
Günel CƏLİLOVA
