“Vitaminlərdən fərqli olaraq, antivurus dərmanları ancaq xəstəxanalarda verilir. Xəstələr antivirus dərmanları ilə təmin olunurlar”. Bunu Nazirlər Kabineti yanında Operativ Qərargahın təşkil etdiyi ötən mətbuat konfransında TƏBİB İdarə Heyəti yanında tibbi-elmi komitənin sədri Akif Qurbanov bildirib.
A.Qurbanov deyib ki, vitaminlərdən fərqli olaraq, antivurus dərmanları yalnız xəstəxanalarda verilir. Bu xəstələr antivirus dərmanları ilə təmin olunurlar.
Maraqlıdır ki, evdə müalicə olunan xəstələrə niyə dərman verilmir? Evdə müalicə alan koronavirus xəstələrinin lazımi dərmanlarla təmin olunmaması onların sağalma prosesinə necə təsir edir?
“…xəstə antibiotikin təsirindən şoka düşə bilər və həmin xəstənin sağlamlığında…”
Məsələ ilə bağlı fikir bildirən professor, tibbi ekspert Adil Qeybulla qeyd etdi ki, koronavirusa yoluxmuş, yüngül simptomlu və simptomsuz xəstələrin evdə özbaşına müalicəsi düzgün deyil. Professorun sözlərinə görə, belə xəstələr evdə müalicə alsalar da, mütləq həkim nəzarətində olmalı, həkimin resepti əsasında dərman almalıdırlar: "Hər xəstəyə fərdi yanaşılmalıdır. "Bir koronavirus xəstəsi bu dərmanı qəbul edirsə, mən də həmin dərmandan alıb qəbul edim" yanaşması əks təsir göstərə bilər. Mütləq belə xəstələrin müalicəsi həkim tərəfindən aparılmalıdır. Dərman qəbulunda doza həddi var. Hərarət üçün istifadə edilən dərmanları da dozadan artıq qəbul etmək olmaz! Ona görə də mən bir həkim kimi koronavirus xəstələrinin evdə nəzarətsiz müalicəsini düzgün hesab etmirəm".
Həmsöhbətimiz onu da vurğuladı ki, antivirus dərmanların koronavirusun müalicəsinə heç bir effekti yoxdur. Bu, ÜST-in son rəyidir. O dərmanları boş-boşuna xəstələrə verirlər: “Hansı ki, zərərləri xeyrindən heç də az deyil. Həmin dərmanların COVID-19-a təsiri yoxdursa, biz onları boşuna niyə xəstələrə verməliyik? Bu baxımdan, mən həmin dərmanların nə evdə, nə də xəstəxanada verilməsinin tərəfdarıyam".
A.Qeybulla onu da əlavə etdi ki, evdə müalicə alan şəxslərdə xəstəlik yüngül keçdiyindən, onların vitamin qəbul etməsi sağalmalarına kifayət edir: “Həmçinin, müəyyən antibiotiklərin evdə tətbiqi düzgün deyil. Dünyanın hər yerində belədir. Çünki xəstə bu antibiotikdən şoka düşə bilər və həmin xəstənin sağlamlığında problemlər yarana bilər. Bunun üçün də antibiotiklərin vurulması ancaq xəstəxana şəraitində olmalıdır. Xəstəyə antibiotik vurulursa, deməli, o, xəstəliyi ağır keçirir. Hesab edirəm ki, evdə müalicə alan xəstələrin yalnız vitamin alması yetərlidir. B, C, D, B9 vitaminini evdə qəbul etmək immun sistemini tonusda saxlayır və xəstəliklə mübarizəyə kömək edir".
Qeyd edək ki, koronavirusa yoluxmuş, evdə müalicə alan yüngül simptomlu və simptomsuz xəstələr dərmanları öz hesablarına alırlar.
Günel CƏLİLOVA
