Azərbaycan Respublikası Nazirlər Kabineti yanında Operativ Qərargah koronavirusla bağlı KİV nümayəndələri üçün brifinq keçirib.
Trend-in məlumatına görə, brifinqdə Operativ Qərargahın nümayəndələri - Azərbaycan Respublikası Prezidentinin köməkçisi, Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev və TƏBİB-in İdarə Heyəti yanında tibbi-elmi komitənin sədri Akif Qurbanov jurnalistləri maraqlandıran suallara cavab verib.
Azərbaycanda sanitar-epidemioloji vəziyyət nəzarət altındadır
H.Hacıyev deyib ki, Azərbaycanda sanitar-epidemioloji vəziyyət nəzarət altındadır. Virusla bağlı vəziyyət sabitləşib və yoluxmalar azalıb. H.Hacıyev bildirib ki, Azərbaycan Respublikasında yeni növ koronavirus (COVID-19) infeksiyasının yarada biləcəyi təhlükənin qarşısının alınması istiqamətində həyata keçirilən preventiv tədbirlər nəticəsində, eləcə də əhalinin tətbiq olunan karantin və gigiyena qaydalarına daha ciddi və məsuliyyətli əməl etməsi, dövlət-vətəndaş həmrəyliyi sayəsində ölkədəki sanitar-epidemioloji vəziyyət stabiləşib, yoluxma hallarının kəskin azalmasına nail olunub.
Dünya təcrübəsi göstərir ki, yumşalmalara getdikcə yoluxmaların sayı artır
“Koronavirusa yoluxmanın artmasının qarşısını almaq üçün vətəndaşlarımızı karantin qaydalarına əməl etməyə çağırırıq” - deyən H.Hacıyev bildirib ki, virusla bağlı bugünkü rəqəmlər bizi sevindirir, ancaq dünya təcrübəsi göstərir ki, yumşalmalara və açılmalara getdikcə yoluxmaların sayı artır: “Buna görə də vətəndaşlarımız diqqətli olmalı və qaydalara riayət etməlidir”
Metro nə vaxt açılacaq...
H.Hacıyev bildirib ki, sanitar-epidemioloji vəziyyəti nəzərə alaraq Bakıda metropolitenin açılması ilə bağlı müzakirələr gedir.
H.Hacıyev qeyd edib ki, bununla bağlı ölkə ictmaiyyətinə əlavə məlumat veriləcək.
H.Hacıyev əlavə olaraq qeyd edib ki, yoluxma səviyyəsi yüksək olduğuna görə Bakı, Sumqayıt və Abşeronda sərtləşdirilmiş xüsusi karantin rejimi saxlanılır, həftə sonları ictimai nəqliyyat işləməyəcək.
Koronavirusa qarşı vaksinlərin yaradılması Azərbaycanın tərəfindən diqqətdə saxlanılır
Prezidentin köməkçisi deyib ki, Operativ Qərargah nəzdində yaradılmış xüsusi qrup koronavirusa qarşı vaksinlərin yaradılması istiqamətində iş aparan dünyanın aparıcı şirkətləri ilə təmasları davam etdirir.
H.Hacıyev bildirib ki, dünya səviyyəsində qəbul olunmuş və sertifikatlaşdırılmış vaksinlərin ölkəyə gətirilməsi və tətbiq olunması istiqamətində məsələlər diqqətdə saxlanılır. O qeyd edib ki, burada dərin araşdırma aparmağa ehtiyac var və yan təsirləri olmayan və dünya səviyyəsində sertifikatlaşdırılan vaksinlər diqqətdə saxlanılacaq.
İctimai nəqliyyatla bağlı əlavə qərarlar verilə bilər
İctimai nəqliyyat haqqında danışan H.Hacıyev bildirib ki, ictimai nəqliyyatda xəttə olan avtobusların sayı artırılıb ki, sıxlıq aradan qaldırılsın. O qeyd edib ki, məktəblərin açılması ilə bağlı da qarşıdan gələn dövr ərzində Bakı Nəqliyyat Agentliyi tərəfindən əlavə tədbirlər görüləcək ki, yarana biləcək sıxlıq aradan qaldırılsın.
PA rəsmisi qeyd edib ki, ictimai nəqliyyatla bağlı vəziyyət təhlil edilərək əlavə qərarların verilməsi istisna deyil.
Hikmət Hacıyev: Karantinə görə atamı axırıncı dəfə mart ayında görmüşəm
“Biz də istərdik ki, rayonlara gediş-gəliş açılsın, ancaq çox təəssüf ki, bu gün bu şad xəbəri çatdırmaq iqtidarında deyilik” – deyən H.Hacıyev bildirib ki, hər kəs rayonlara gediş-gəlişin açılmasını istəyir: “Mənin atam Gəncə şəhərində yaşayır və mən öz atamla sonuncu dəfə mart ayının 13-də görüşmüşəm. Mən də istərdim ki, rayonlara gediş-gəliş olsun. Ancaq çox təəssüf ki, hazırki vəziyyətdə bu xəbəri çatdırmaq iqtidarında deyilik. Rayonlara gediş-gəlişin bağlı qalması vətəndaşlarımızın təhlükəsizliyi üçün vacibdir. Ümud edək ki, yaxın zamanlarda bu xəbəri çatdırmaq iqtidarında olacağıq”.
Xarici ölkələrdən vətəndaşlarımızın ölkəyə gətirilməsi prosesi davam edir
PA rəsmisi bidirib ki, xarici ölkələrdən vətəndaşlarımızın həm quru, həm də hava yolu ilə koronavirus testi əsasında ölkəyə gətirilməsi prosesi davam etdirilir. H.Hacıyev qeyd edib ki, vətəndaşlarımız hazırki dövrdə ciddi zərurət olmadan xarici ölkələrə getməkdən çəkinməlidir: “Biz vətəndaşlarımıza çağırış edirik ki, ciddi zərurət olmadan xarici ölkələrə səfərdən çəkinsinlər. Sanitar-epidemioloji vəziyyət hər an pisləşə bilər və vətəndaşlarımızın ölkəyə qayıtmasında çətinliklər yarana bilər”.
Toy və yas mərasimləri ilə bağlı qadağalar qüvvədə qaldı
“Toy və yas mərasimlərinin keçirilməsi ilə bağlı qadağalar hələki qüvvədə qalır” – deyən H.Hacıyev bildirib ki, toy və yas mərasimləri ilə bağlı qadağalar, o cümlədən qanunlar hamı üçün bərabərdir.
PA rəsmisi əlavə edib ki, restoranların qapalı məkanda fəaliyyəti ilə bağlı da yekun qərar hələ qəbul edilməyib.
Məktəb ləvazimatlarının satışı üçün yarmarkalar...
PA rəsmisi deyib ki, məktəblərin açılması ilə bağlı uşaqlara geyim və məktəb ləvazimatlarının alınması üçün ənənəvi qaydalardan, o cümlədən yaramarkaların təşkil olunması metodundan istifadə oluna bilər.
H.Hacıyev bildirib ki, ancaq hələki böyük ticarət mərkəzlərinin açılması ilə bağlı qərar yoxdur: “Müəyyən yarmarkalar təşkil oluna bilər. Ancaq iri ticarət mərkəzlərinin açılması ilə bağlı qərar yoxdur. Tələskənlik əldə edilmiş müsbət tendensiyada əks effekt verə bilər”.
Naxçıvandan başqa daxili hava reyslərinin bərpası ilə bağlı hələki qərar yoxdu
“Azərbaycanda daxili hava reyslərinin bərpası ilə bağlı hələki qərar yoxdur” – deyən H.Hacıyev bildirib ki, hazırda Bakı-Naxçıvan arasında hava reysləri həyata keçirilir: “Ermənistanın işğalçı siyasəti səbəbindən Bakı ilə Naxçıvan arasında yalnız hava yolu ilə əlaqə mövcuddur. Bu səbəbdən Bakı-Naxçıvan avia reysləri həyata keçirilir. Ancaq rayonlara gediş-gəliş bağlı olduğu üçün Bakı-Gəncə hava reylərinin də bərpa edilməsinə qərar verilməyib”.
Azərbaycanla müxtəlif ölkələr arasında hava reyslərinin bərpa edilməsi ilə bağlı danışıqlar aparılır
H.Hacıyev qeyd edib ki, Azərbaycanla müxtəlif ölkələr arasında hava reyslərinin bərpa edilməsi ilə bağlı danışıqlar gedir. H.Hacıyev bildirib ki, Almaniyanın “Lufthansa” şirkətinə Frankfurt-Bakı reysinin bərpa olunması ilə bağlı müraciət edilib. Onun sözlərinə görə, digər aviaşirkətlərdən də müraciətlər daxil olub və müxtəlif ölkələrlə aviareyslərin bərpa olunması istiqamətində danışıqlar aparılır”.
Ölkəyə qripə bənzər xəstəliklərə qarşı vaksinlər gətiriləcək
A.Qurbanov isə deyib ki, dünyada yoluxma halları artmaqdadır: "Azərbaycandakı vəziyyət idarəolunandır. Bu bizi sevindirir. Sərt karantin rejimi tədricən yumşaldılır. Xalqımızın bu prosesdə kütləvi iştirakı vacibdir. Karantin rejimi yumşaldıqca qorunma tədbirləri daha da sərtləşməlidir. Məhz bu gündəlik həyatımıza qayıtmağımıza yardım edəcək. Qarşıdan soyuqlar gəlir, infeksiyanın artması təhlükəsi var. Qrup və qripə bənzər infeksiyalar arta bilər. Bununla bağlı dövlət tərəfindən tədbirlər görülür. Ölkəyə qripə bənzər xəstəliklərə qarşı vaksinlər gətiriləcək. Bununla bağlı işlər görülür.
Hesab edirik ki, tədris mövsümündə də qaydalara riayət olunmalıdır. Bu halda biz virusun yayılmasının qarşısını ala bilərik"
Karantin rejimi ilə bağlı qərar seroloji testlərin nəticələrindən asılı olaraq verilə bilər
“Seroloji testlər mikroorqanizmlərin törətdiyi xəstəliklərdə istifadə edilir” deyən A.Qurbanovun sözlərinə görə, bu testlərlə qanda anticismlər aşkar edilir: "Anticisim testi ilə biz aşkar edə bilirik ki, kim bu xəstəliyi keçirib. Bu bir növ pronostik əhəmiyyət kəsb edir. Bu test könüllülük əsasında keçirilir. Amma hər şəxsdə deyil. Biz bilsək ki, əhalinin 90 faizi bu xəstəliyi keçirib, karantin rejimini daha da yumşalda bilərik. Əgər nəticə əldə edilsə ki, əhalinin 20-30 faizi bu xəstəliyi keçirib, o halda biz karantin rejimini sərtləşdirmək məcburiyyətində qalacağıq. Yəni biz bu testlərlə əhalinin hansı faizinin bu virusa yoluxub sağaldığını müəyyən edəcəyik".
Tədris ilinin başlanması adi qaydada olmayacaq
Tədrisin bərpası ilə bağlı xüsusi qərarın veriləcəyini deyən A.Qurbanovun sözlərinə görə, tədris başlasa da sıxlıq maksimum azalacaq. Yuxarı siniflər dərslərini onlayn qaydada davam etdirəcək. Epidemioloji vəziyyət bizə imkan verənə qədər onlayn dərslər davam edəcək. Tədrisin bərpası ilə bağlı xüsusi qərar veriləcək.
A.Qurbanov bildirib ki, mühazirələr onlayn qaydada aparılacaq. Elə hesab olunanmamalıdır ki, senytabrdın 15-dən tədris adi qaydada davam etdiriləcək.
Məktəblilər virusu əsasən yüngül formada keçirir
A.Qurbanov deyib ki, məktəb yaşlı uşaqlar elə bir qrupdur ki, onlarda virus əsasən asimptomatik olur. Onun sözlərinə görə, məktəblərdə virusun yayılmasından narahatlıq yoxdur: "Biz qorxuruq ki, uşaqlar daşıyıcı olub yoluxdura bilər. Ona görə də biz məktəblilərin toplanmasından ehtiyat etmirik. Biz əsasən şagirdlərin müəllimlərlə təması nəticəsində bu virusun yayılmasından ehtiyat edirik. Yəni şagirdlər bu virusa yoluxaraq başqalarına yoluxdura bilər"
A. Qurbanov bildirib ki, buna görə də hesab olunur ki, məktəbə qədər müəssiələrin açılmasında xüsusi qaydalar olacaqdır. Sxılığın azaldılması, kütləviliyin az olması ilk növbədədir. Valideynlərlə məktəbəqədər müəssisələrin müəllimlər arasında müzakirələrin aparılması, prosesin nizamlanması ilə uşaqların yoluxması məsələsi minumuma endiriləcəkdir.
Antivirus preparatları xəstəxanalarda müalicə olunanlara verilir
“Antivirus preparatları xəstəxanalarda müalicə olunan şəxslərə verilir” – deyən A.Qurbanovun sözlərinə görə, hazırda xəstəxanalarda müalicə alan şəxslər hazırda müalicəsini davam etdirir: "Hazırda xəstəxanalarda kifayət qədər yerlər var və yer çatışmazlığı yoxdur. Simptomlu xəstələr aşkarlanarsa, həmin şəxslər xəstəxanalara yerləşdirilir və müalicələri dövlət hesabına həyata keçirilir".
Azərbaycanada vaksin ilk olaraq kimlərə vurulacaq…
A.Qurbanov bildirib ki, vaksinlər sağlam insanlara vurulur ki, onlar yoluxmasın. Onun sözlərinə görə, mövsümü qrip əleyhinə vaksinlər 4 valentli qrip əleyhinə vaksinlərdən istifadə olunması müzakirə olunur. Bu sınanmış və zərərsiz vaksindir. Yaşlı və zəifləmiş şəxslərə vaksinasiyaların gətirilməsi planlaşdırılır. Vaksinlər gətiriləndə sonra həmin risk qrupuna vurulması planlaşdırılır ki, həmin şəxslər qripə yoluxub zəifləməsin, ona görə də Azərbaycana vaksin gətiriləndən sonra ilk növbədə risk qrupuna daxil olan şəxslərə vurulacaq”.
