Bəşərin son yüz ildə ilk dəfə qarşılaşdığı bir vəziyyətlə üz-üzəyik. Dünyanı öz ağuşuna almış koronavirus pandemiyası insanları sosial izolyasiyaya məcbur edib. Hazırda az öncə iflic vəziyyətinə düşmüş dünya iqtisadiyyatı dirçəlməyə can atır. Statistik göstəricilər onu deməyə imkan verir ki, həyəcan dolu anlar arxada qalıb. Dünya üzrə müalicə alıb sağalanların sayı xəstəlikdən ölənlərin sayından daha çoxdur. Lakin hələ də yoluxma halları var.
COVID-19 pandemiyasına qarşı açılan savaş hələ də davam edir. Dünyanın tanınmış epidemioloq və virusoloqları hələ də bu gözəgörünməz qatillə mübarizədə zəfər çalmaqda acizliklərini etiraf edirlər. Deməli, yaxın zamanlarda pandemiya başa çatsa, hamımızın arzu etdiyi karantin tədbirləri ortadan qaldırılsa da, situasiyanın bir daha təkrarlanmayacağından sığortalanmamışıq.
Bu hadisə cəmiyyətlərə dərs oldu, insanların həyata baxışını dəyişdi, bizə adi gələn hər bir şeyin, əslində, necə önəmli olduğunu bir daha sübut etdi. Yaşadığımız izolyasiya şəraiti məişətimizin hər bir sahəsinə nüfuz edərək, bütün aktiv fəaliyyətimizi çərçivəyə saldı, ünsiyyətimizi virtual sferaya keçirib, fiziki təması minimum həddə endirdi və bu bizi internet texnologiyalarından asılı vəziyyətə saldı.
Bəllidir ki, martın 3-dən etibarən dərslər onlayn formada davam etdirilirdi. Avqustun 27-də Nazirlər Kabineti yanında Operativ Qərargahın keçirdiyi brifinqdə də tədrisin müəyyən distant formada davam etdiriləcəyi açıqlandı. Təbii ki, birinci sinif və birinci kurslar müəyyən müddət məktəb həyatına alışdıqdan sonra pandemiya davam edərsə, o zaman onların da dərsi distant formada davam edəcək.
Distant təhsilin əhəmiyyətli cəhətlərindən biri də yollarda müşahidə edilən uzun-uzadı tıxacların azalmasına səbəb olmasıdır. Yollarda nəqliyyat vasitələrinin sayı az olarsa, şəhərdə tıxaclar da azalar.
“Koronavirus epidemiyası tam bitənə qədər dərslərin onlayn formada davam etdirilməsi daha məqsədəuyğundur”
Məsələ ilə bağlı fikir bildirən İlqar Hüseynli qeyd etdi ki, tədrisin onlayn formada davam etdirilməsi şəhərdə müşahidə edilən tıxacların azalmasına səbəb olacaq: “Nəzərə almaq lazımdır ki, bir sinifdə təhsil alan şagirdlərin, ən azı, yarısını valideynləri avtomobillə gətirirdi. Hələ ilk dərs günündə məktəblərin qarşısından insan və maşın əlindən keçmək olmurdu”.
Həmsöhbətimiz hesab edir ki, koronavirus epidemiyası tam bitənə qədər dərslərin onlayn formada davam etdirilməsi daha məqsədəuyğundur: “Şagirdlərin, tələbələrin və müəllimlərin sağlamlığı üçün dərslər onlayn formada keçirilməlidir”.
Günel CƏLİLOVA
