Ümumdünya Səhiyyə Təşkilatı (ÜST) hələ bir neçə ay əvvəl bəyan etdi ki, payız aylarında dünya üzrə pandemiyanın yayılma təhlükəsi daha böyükdür və xəstəliyin ikinci dalğası dəhşətli ola bilər.
Azərbaycanda da mütəxəssislər payızda pandemiyanın növbəti dalğasının daha kəskin şəkildə özünü göstərəcəyini proqnozlaşdırırlar. Mütəxəssislər bildirirlər ki, mövcud karantin şərtlərinə əməl edilməsə, Bakı, Sumqayıt və digər iri şəhərlərdə pandemiya risqinin artacağı gözlənir. Bilindiyi kimi, bu gün Bakı və Sumqayıt kimi iri şəhərlərimizi pandemiya risqindən qorumaq günün ən kəskin problemi kimi qarşımızda durur.
Mütəxəssislər hesab edirlər ki, indiyə qədər ölkəmizdə həyata keçirilən pandemiya ilə bağlı mübarizə tədbirləri davam etdirilməlidir. Ayrı-ayrı mütəxəssislərin fikrincə, karantin qaydalarının tətbiqi dayandırılmamalı, payızda gözlənilən növbəti dalğa kəskin olarsa, onun daha da sərtləşdirilməsi lazımdır. Bakı, Sumqayıt və digər iri şəhərlərin sakinləri arasında maska taxmaq vərdişləri yaranıb, sosial məsafə saxlamaq və digər əlaqədar davranışlar artıb. Havaların soyuması nəticəsində pandemiyanın yeni dalğasının daha da dəhşətli təsirə malik ola biləcəyini insanlar unutmamalıdırlar.
Yeni dərs ilinin başlaması ilə əlaqədar olaraq iri şəhərlərdə pandemiyanın payız təhlükəsini şərh edən mütəxəssislərin fikrincə, bu istiqamətdə mövcud tövsiyələrə əməl edilməlidir ki, yoluxanların sayı artmasın. Ekspertlər deyirlər ki, ilin sonuna qədər metronun açılması baş verməməli, həftənin şənbə və bazar günlərində ictimai nəqliyyatın dayandırılması davam etməlidir. Həmçinin, şənbə-bazar günləri Bakı və Sumqayıtda dezinfeksiya tədbirləri davamlı görülməlidir.
“İri şəhərlərin əhalisi də karantin rejiminin bütün qaydalarına əməl etməli, qoruyucu vasitələrdən istifadə etməyi dayandırmamalıdır”
K.Fərəcova adına Elmi-Tədqiqat İnstititunun rəhbəri, professor Nəsib Quliyev hesab edir ki, dövlət tərəfindən həyata keçirilən antivirus tədbirləri davam etdirilməlidir. “Əslində, COVID-19-un payız dalğasından qorunma ilə bağlı proseslər artıq başlanıb. Bilirik ki, bu gün üçün yeganə etibarlı qorunma üsulu olan üç əsas amilə - maska taxmağa, sosial məsafə saxlamağa və gigiyena qaydalarına əməl etmək lazımdır. Amma elə xəstəliklər var ki, onlara qarşı peyvənd mövcuddur, o peyvəndlərdən də istifadə etmək olar. Yəni COVID-19-dan başqa, klassik qrip xəstəliyinə qarşı vaksinlər var, ola bilər, o vaksinlərin tətbiqi həyata keçirilsin ki, digər viruslarla yoluxma təhlükəsi azalsın. Payızda da pandemiyanın dinamikası indiki vəziyyətdə olsa, bu qorunmanı qənaətbəxş saymaq olar. Çünki indiki qorunma təkcə koronavirus infeksiyasından qorunma deyil, həm də bu, bütün virus infeksiyalarından qorunmanı təmin edir. Ona görə də bu qaydanı davam etdirmək lazımdır ki, növbəti təhlükə ilə üzləşməyək. Bütün ölkə vətəndaşları, xüsusən də iri şəhərlərin əhalisi də karantin rejiminin bütün qaydalarına əməl etməli, qoruyucu vasitələrdən istifadə etməyi dayandırmamalıdır. Pandemiyanın növbəti dalğasının daha sərt olacağı proqnozlaşdırılır və dövlət bunun qarşısını almaq üçün tədbirlər görür, əhali də qaydalara riayət etməlidir”.
N.Quliyev qeyd etdi ki, məktəblərin açılması ilə bağlı tədbirlər görülür və təhsil ocaqlarında həyata keçiriləcək epidemioloji tədbirlər barədə məlumatlar verilib. Professorun sözlərinə görə, tətbiq ediləcək dərsalma üsulları da şagirdlərin virusdan qorunmasına xidmət edəcək.
İradə SARIYEVA
