Bakının Suraxanı rayonu, Hövsan qəsəbəsindəki M.Mehdiyev adına 280 saylı tam orta məktəbdən şikayət var. Bu barədə həmin məktəbdə oxuyan 2005-ci il təvəllüdlü Əlizadə Niyaz Eldəniz oğlunun valideyni sosial şəbəkədə paylaşım edib. Valideyn iddia edir ki, övladının oxuduğu məktəbin rəhbərliyi şagirdə attestat vermək üçün 1000 manat pul tələb edib.
Tələb edilən pul verilmədiyi üçün şagirdin attestatına içərisində əsas fənlər olmaqla, səkkiz fəndən (Azərbaycan dili, ədəbiyyat, riyaziyyat, xarici dil, Azərbaycan tarixi, ümumi tarix, fiziki tərbiyə, təsviri incəsənət) “2” yazılıb.
Bakı Şəhəri üzrə Təhsil İdarəsi: “Birinci yarımil üzrə səkkiz fəndən qiymətləri “2” olub, həmin qiymətlər illik qiymətlər kimi yazılıb”
Məsələ ilə bağlı Bakı Şəhəri üzrə Təhsil İdarəsindən bildirildi ki, Əlizadə Niyaz Eldəniz oğlunun valideyni tərəfindən irəli sürülən iddialar araşdırılıb: “Bakı şəhəri 280 nömrəli tam orta məktəbdə, 2019-2020-ci tədris ilində IX sinfi bitirən Əlizadə Niyaz Eldəniz oğlunun ümumi orta təhsil haqqında attestatındakı səkkiz fəndən (Azərbaycan dili, ədəbiyyat, rus dili, riyaziyyat, Azərbaycan tarixi, ümumi tarix, fiziki tərbiyə, təsviri incəsənət) “2” (iki) qiymət alması ilə bağlı məsələ tərəfimizdən araşdırıldı. Araşdırma zamanı N.Əlizadənin 2019-2020-ci tədris ilində təhsil aldığı IX “B” sinfinin jurnalına baxış keçirildi. Məlum oldu ki, onun birinci yarımil üzrə yuxarıda qeyd edilən fənlərdən qiymətləri 2 (iki) olub, mövcud vəziyyətlə əlaqədar olaraq Təhsil Nazirliyinin 22.05.2020-ci il tarixli, 02-14-441/13 və 02.06.2020-ci il tarixli, 1741-01/06 nömrəli təlimat məktublarına əsasən, həmin qiymətlər illik qiymətlər kimi yazılıb və qeyd edilən fənlərdən onun yekun attestata yazılacaq qiymətləri də “2” (iki) çıxıb”.
Kamran Əsədov: “…məktəbdə normal tədris qurulmayıb”
Təhsil eksperti Kamran Əsədov bildirdi ki, valideyn iddialarında haqlıdır: “Səkkiz fəndən “2” alan şagirdə attestat verilməsi düzgün deyil. Ümumiyyətlə, 280 saylı məktəb bu hadisədə qanunsuzluğa yol verib. Şagirdlərin bir sinifdən digər sinfə keçmə qaydalarına görə, bütün qiymətlər müsbət olmalıdır ki, onlar növbəti pilləyə keçsinlər. Şagird qeyri-kafi qiymət alarsa, bu zaman ona yay tapşırıqları verilir. Daha sonra qiymət yazılır. Çox təəssüflər olsun ki, burada qanunvericiliyin tələbləri ciddi şəkildə pozulub. Rəsmi açıqlama isə çox yanlış idi. Məlumdur ki, pandemiyaya görə martın 3-dən dərslər dayandı. Düzdür, şagirdlərə birinci yarımil əsasında qiymətlər yazıldı. Amma bir məqamı unutdular. Bəlkə, şagird birinci yarımildə “2” alıbsa, ikinci yarımildə həmin qiyməti düzəldəcək? Yəni şagirddən asılı olmayan səbəblərdən dərslər dayanıb. Bəs, dərslər dayanıbsa, Təhsil Nazirliyi niyə teledərs və virtual məktəb layihəsini keçirdi? Axı şagird həmin layihəyə qoşulub”.
Həmsöhbətimiz onu da əlavə etdi ki, şagird səkkiz fəndən “2” alıbsa, deməli, məktəbdə normal tədris qurulmayıb: “Bu, birmənalı olaraq, belədir. Şagirdin təhsil hüququnu məhdudlaşdırmaqdır. Yaxşı, attestat verdiniz, axı bu şagird həmin qiymətlərlə kollecə və peşə məktəbinə gedə bilməyəcək. Uşağa belə etmək düşmənçilikdir. Hətta terrorçu belə bunu etməzdi. Maraqlıdır, şagird 9 il ərzində bu pilləyə necə gəlib? Deməli, düzgün tədris qurulmayıb ki, şagird “2” alıb. Utanmaz-utanmaz da açıqlama veriblər ki, uşağın birinci yarımildə qiyməti belə idi. Birinci yarımil pis idisə, ikinci yarımildə qiymətlərini düzəldə bilərdi”.
Günel CƏLİLOVA
