Yeni tədris ilinin başlanması ilə bağlı KİV nümayəndələri üçün brifinq keçirilib. “Trend”-in məlumatına görə, brifinqdə Təhsil naziri Emin Əmrullayev, Təhsil nazirinin müşaviri Rüstəm Ağayev, Ümumi və məktəbəqədər təhsil şöbəsinin müdiri Vəfa Yaqublu jurnalistləri maraqlandıran suallara cavab verib.
Qeyd edək ki, yeni tədris ilinin başlanması ilə bağlı Təhsil İnstitutu və təhsil ekspertləri tərəfindən təkliflər hazırlanaraq Təhsil Nazirliyinə təqdim olunub.
“Pandemiya şəraitinə uyğun düzgün qərar verməliyik”
“Təhsil bir neçə milyon insanın gün ərzində hərəkətini və ünsiyyətini təmin edir. Bu amil koronavirusa yoluxmaya təsir edən bir fakt kimi nəzərə alınmalıdır” – deyən nazir bildirib ki, hansısa formada tədris bərpa edilməlidir, lakin epidemioloji vəziyyət nəzərə alınacaq: “Biz pandemiya şəraitinə uyğun düzgün qərar verməliyik”.
Dərslərin başlayacağı tarix…
“Azərbaycanda tədris ili sentyabr ayının 15-dən başlayır. Təhsil bərpa olunacaq, ancaq xüsusi şərtlər daxilində” – deyə bildirən E.Əmrullayev qeyd edib ki, ən səmərəli təkliflər əsas götürülməlidir. “Ümumi məntiq ondan ibarətdir ki, təhsil müəssisələrinin fəaliyyəti bərpa edilməlidir. Differensial yanaşma əsas götürülməlidir. Yerli şəraitə və situasiyaya uyğun qərarlar verilməlidir”- o deyib.
Uşaq bağçaları da açılır
Bağçalarda uşaqlara distant qayğı göstərmək mümkün deyil. Epidemioloji vəziyyət imkan verir ki, sentyabrın 15-dən həmin müəssisələr mərhələli şəkildə işə başlasın. Bunu da Təhsil naziri Emin Əmrullayev keçirilən mətbuat konfransında deyib.
Nazir bildirib ki, virusun çox yayılmadığı şəhər və rayonlarda bağçaların fəaliyyətinin mərhələli bərpa edilməsi təklif edilir:"Noyabr ayının 2-ə qədər bu rejimdə işləmək nəzərdə tutulur. Bundan sonra epidemioloji vəziyyət imkan versə, proses davam etdiriləcək".
Dərslər hansı qaydada keçiriləcək...
“İbtidai siniflərin 15 sentyabr tarixdən həftədə 2-3 dəfə dərsə gəlməsini təklif edirik. 5-9, 10 və 11-ci sinif şagirdlərinin dərsləri 15 sentyabrdan onlayn qaydada başlayır” – deyən nazir bildirib ki, 1 oktyabrdan 5-9-cu siniflərin əyani şəkildə məktəbə gəlməsi, 15 oktyabrdan isə 10 və 11-ci siniflərin məktəbə qayıtması planlaşdırılır. Prosesin mart ayına qədər bu cür davam etdirilməsi nəzərdə tutulur.
Uşaqların məktəbə gəlib-gəlməməsinə valideynlər qərar verə biləcək
“Valideynlərə övladlarının məktəbə gəlmə qaydası ilə bağlı seçim imkanı veriləcək. Valideynlər ya onlayn təhsili, ya da həftədə 2 və ya 3 dəfə məktəbə gələrək əyani təhsil almağı seçə biləcəklər” – deyən Təhsil naziri Emin Əmrullayev məktəbdə şagirdlərin bədən temperaturunun yoxlanacağını da qeyd edib:“Valideynlərə də müraciət edirik ki, əgər uşaqda tepmeratur olarsa, məktəbə gətirməmək məqsədəuyğundur”.
Ali məktəblərdə distant təhsil...
Ali məktəblərdə təhsil sentyabrın 15-dən distant qaydada başlayacaq. Nazir bildirib ki, 1-ci kurs tələbələri tanışlıq məqsədilə ali məktəblərə gələ biləcəklər. Nazirin sözlərinə görə, 15 oktyabr tarixindən isə bu ali məktəblərdə bəzi ixtisaslar üzrə, məsələn, tibb, mühəndislik və s. əyani təhsil üzrə tədris başlayacaq.
Nazir qeyd edib ki, proses noyabrın 2-ə qədər bu cür davam edəcək və ondan sonra epidemioloji vəziyyət nəzərə alınaraq qərar qəbul ediləcək:"Əgər vəziyyət imkan versə, ənənəvi təhsil formasına keçiləcək, imkan verməsə, distant təhsil davam edəcək".
Hansısa məktəbdə kütləvi yoluxma olarsa...
Hansısa məktəbdə kütləvi yoluxmalar baş verərsə, həmin məktəb üzrə təhsil onlayn qaydaya keçiriləcək.
Nazir qeyd edib ki, valideynlər hərarəti olan uşaqları məktəbə gətirməməlidir. O qeyd edib ki, şagirdlərin hərarəti məktəbdə yoxlanılacaq və hərarət olduğu halda müvafiq addımlar atılacaq.
Məktəblərdə uşaqların maska taxması necə nizamlanacaq...
Uşaqların maska geyinməsi valideynlərin öz öhdəsinə buraxılacaq. Bunu Təhsil nazirinin müşaviri Rüstəm Ağayev avqustun 27-də keçirilən mətbuat konfransında deyib. Onun sözlərinə görə, dünya praktikası da onu göstərir ki, koronavirus uşaqlarda çox az yayılır:
“ÜST-ün tövsiyyələrinə görə, 12 yaşdan aşağı uşaqlarda maskanın taxılması valideynlərin öz öhdəsinə buraxılır. Ona görə də, təhsil müəssisələri açıldığı zaman uşaqların maska geyinməsi məsələsinə də öz valideynləri tərəfindən qərar veriləcək və nazirlik tərəfindən yalnız tövsiyə olunacaq".
Alt-üst həftələr təşkil etməklə şagird sıxlığı azaldılacaq
Məktəblərdə kütləviliyin azaldılması üçün dərs cədvəlində də dəyişiklik ediləcək. Bunu isə brifinqdə Təhsil Nazirliyinin ümumi və məktəbəqədər təhsil şöbəsinin müdiri Vəfa Yaqublu deyib.
Onun sözlərinə görə, alt-üst həftələr təşkil etməklə şagird sıxlığı azaldılacaq:"Sinifdə şagird sayları nəzarətdə saxlnacaq. Həmçinin bəzi fənlər virtual dərslərlə tədris olunacaq. Bununla da məktəblərdə sıxlıq aradan qaldırılacaq".
İbtidai sinif şagirdləri iki qrupa bölünəcək...
İbtidai sinif uşaqları hamısı eyni gündə dərsə getməyəcək. Misal üçün sinifdə uşaq çoxdursa, onlar iki qrupa bölünəcək və hər qrup üçün həftədə 2 və ya üç gün təyin ediləcək. “Trend”in məlumatına görə, bunu Təhsil naziri Emin Əmrullayev avqustun 27-də keçirilən mətbuat konfransında deyib.
Nazir bildirib ki, övladının hansı gün dərsə gedəcəyi barədə məlumatı valideynlər dərslərin başlanmasından bir həftə əvvəl məktəbdən ala biləcəklər və məktəblər də, öz növbəsində, bu məlumatı valideynlərə çatdıracaq.
