Kəndlərin, qəsəbələrin abadlaşdırılması, burada müasir tələblərə uyğun infrastrukturun yaradılması dövlətin gördüyü işlərin əsas prioritet istiqamətlərindən biri olsa da və bu yöndə çoxsaylı layihənin icrasına büdcədən vəsaitlər ayrılsa da, çox təəssüf ki, yerli qurumların, xüsusən də bələdiyyə orqanlarının yarıtmaz fəaliyyəti nəticəsində çox zaman prosesin gedişi ləngiyir.
Bakının bir çox kənd və qəsəbəsində yolların, xüsusən də məhəllədaxili yolların bərbad olması, kanalizasiya probleminin hələ də həll olunmaması ciddi nöqsanlar kimi diqqətdən yayınmır. Kanalizasiya sisteminin ya olmaması, ya da bərbad vəziyyətdə olması nəticəsində küçələrə, həyətlərə üfunət yayılır. Əlbəttə, bütün bunlar bələdiyyələrin, yerli icra qurumlarının öz vəzifələrinə məsuliyyətsiz, laqeyd yanaşması, büdcədən bu məqsədlə ayrılan vəsaitlərə talançılıq mövqeyindən yanaşması ilə bağlıdır. Halbuki, Prezident İlham Əliyev dəfələrlə kənd və qəsəbə yollarının düzəldilməsi, kanalizasiya və digər vacib infrastrukturun yaradılması, bu sahədə olan problemlərin, bütövlükdə, aradan qaldırılması üçün sərəncamlar imzalayıb, dövlət büdcəsindən vəsait ayırıb. Lakin hələ də Bakının çoxminli əhalisi olan qəsəbə və kəndlərində mövcud olan kanalizasiya, yol və digər problemlər tam olaraq öz həllini tapmayıb. Bakının bir sıra kənd və qəsəbələrində çökək yerlər var ki, çirkab suları ora axıb dolur, bunun nəticəsində də ətrafa çirk, üfunət axır.
Bakının iri yaşayış massivlərindən olan Masazır qəsəbəsində də bu aktual problem mövcuddur və özünü tam çılpaqlığı ilə göstərir. Masazır sakinləri tez-tez şikayət edirlər ki, yollar bərbaddır, kanalizasiya yoxdur, yağış yağanda, bir qəza baş verəndə çıxılmaz vəziyyətə düşürlər. Bu problemlərin həllində birbaşa məsuliyyət daşıyan qəsəbə bələdiyyəsi isə çətinliklərin aradan qaldırılması üçün heç bir əməli iş görmür. Dövlətin qanunlarına, əhalinin şikayətlərinə məhəl qoymayan qəsəbə bələdiyyəsinin məsuliyyətsizliyi, laqeydliyi nəticəsində problem günü-gündən artır. Hər bir kəndin, qəsəbənin abadlaşması, bütün infrastrukturlarla təmin olunması üçün dövlətin ayırdığı milyonlarla vəsait problemlərin həllinə yönəldilmək əvəzinə, yerli idarəetmə qurumları, icra orqanları təmsilçilərinin cibinə axır.
Ekspertlərin fikirlərinə görə, bu gün Bakı qəsəbə və kəndlərində elə bələdiyyə sədrləri var ki, onlar heç bir dəfə qəsəbənin küçələrini gəzməyib, nəyin harada yerləşdiyini bilmir, hətta kanalizasiya xəttinin harada yerləşdiyindən belə xəbəri yoxdur. Onlar kənd və qəsəbələrin kanalizasiya siteminin müasir standartlara cavab verən şəkildə qurulması üçün dövlət tərəfindən kifayət qədər addım atılsa da, icra qurumları tərəfindən prosesin gerçəkləşməsinə əngəl törədildiyini deyirlər.
Mütəxəssislər qeyd edirlər ki, problemin həlli üçün bələdiyyələr yol və kanalizasiya üzrə mütəxəssislərin köməyindən yararlanmalıdırlar.
“Bakı kəndlərində və qəsəbələrində həm yolla, həm də kanalizasiya ilə bağlı ciddi problemlər var, bu danılmazdır”
“Cəmiyyətin və Vətəndaş Münasibətlərinin İnkişafı” İctimai Birliyinin sədri, tanınmış sosioloq Əhməd Abasbəylinin fikrincə, bu gün bu məsələ olduqca aktualdır. Masazırda və digər qəsəbələrdə, kəndlərdə yaşanan mövcud problemlərin həll edilməsinə mane olan tərəflər olduğunu deyən Ə.Abasbəylinin sözlərinə görə, bizdə bələdiyyələrin yalnız kağız üzərində səlahiyyətləri var, bu qurumlar birbaşa rayon icra hakimiyyətlərinə tabedir. “Bakı kəndlərində və qəsəbələrində həm yolla, həm də kanalizasiya ilə bağlı ciddi problemlər var, bu danılmazdır. Doğrudur, əslində, bu problemlərin həllində bələdiyyələr səylər göstərməlidirlər. Ancaq bizim bələdiyyələrin isə həm maddi vəziyyəti, həm də səlahiyyətləri məhduddur. Gizlin deyil ki, bütün bələdiyyələr yerli icra hakimiyyətindən asılıdır. Bu problemin həllində icra hakimiyyəti orqanları bələdiyyələrə kömək etməlidir. Digər tərəfdən, Bakı kəndlərində və qəsəbələrində yol və kanalizasiya probleminin olması, bu problemlərin aradan qaldırılmaması məmurların öz işlərinə məsuliyyətsiz yanaşmasının nəticəsidir. Rayon icra hakimiyyəti strukturları və digər aidiyyəti qurumlar bu məsələnin həllinə çalışmalıdırlar. Məsələ burasındadır ki, şəhərin mərkəzində bir yolu az qala bir neçə dəfə söküb yenidən tikirlər, amma Bakı kənd və qəsəbələrinə diqqət ayırmırlar.
Bilirik ki, Prezident İlham Əliyev kənd və qəsəbələrdə yolların tikintisinə, kanalizasiya sisteminin, digər sahələrdə infrastrukturun qurulmasına kifayət qədər diqqət göstərir, maliyyə vəsaiti ayırır. Ölkə başçısı dəfələrlə kəndlərdə və qəsəbələrdə yolların açılışında olub. Məmurlar da, bələdiyyələr də Prezidentin tapşırıqlarının icrasını zamanında həyata keçirməli, ləngitməməməlidirlər ki, əhalinin bu yöndə sosial qayğıları olmasın”.
Ə.Abasbəyli hesab edir ki, vətəndaşlar özləri bu məsələlərdə aktiv olmalı, problemləri KİV, sosial şəbəkələr vasitəsilə ictimailəşdirməlidirlər. O qeyd etdi ki, “Vətəndaş müraciətləri haqqında” Qanunda vətəndaşın müraciətlərinin təmin edilməsi göstərilib. “Hansı qəsəbədə ki, vətəndaş aktivliyi var, problemlər zamanında ictimailəşdirilir, həmin qəsəbələrdə problemlər tez bir zamanda həll olunur. Ümid edirəm ki, Masazırda və digər qəsəbələrdə mövcud olan bu problemlər də ictimailəşdikdən sonra öz həllini tapacaq. Vətəndaşlar fəal olmalıdırlar” - deyə müsahibimiz vurğuladı.
İradə SARIYEVA
