Ümumdünya Səhiyyə Təşkilatının bu ilin mart ayında pandemiya elan etdiyi COVID-19 virusu Yer kürəsində tüğyan etməkdə davam edir. Son statistikaya əsasən, dünyada COVID-19-dan ölənlərin sayı 800 mini, virusa yoluxanların sayı isə 23 milyonu ötüb. Qeyd edək ki, koronavirusa yoluxma sayına görə ABŞ, Braziliya və Hindistan ilk üçlükdə yer alır.
ÜST-in Baş direktoru Tedros Adhanom Gebreyesus isə söyləyib ki, COVID-19 pandemiyasının iki ildən az müddətdə bitəcəyinə ümid edirik. O qeyd edib ki, hazırkı durumda daha çox texnologiya mövcuddur: "Yeni növ virus yaxın təmaslarla daha sürətli yayılır, ancaq onun qarşısını almaq üçün müvafiq texnologiyamız var”.
Azərbaycanda virusun ilk üzə çıxdığı zamandan etibarən görülən effektiv tədbirlər infeksiyanı nəzarətolunan səviyyədə saxlamağa imkan verib. Yoluxma səviyyəsində müsbət dinamika tendensiya halını alıb. Buna görə də sərtləşdirilmiş karantin rejimindən mərhələli şəkildə yumşaldılmalara keçid də sürətlənib. Belə ki, avqustun 5-dən SMS icazə sistemi ləğv edilib, çimərliklər açılıb. Bu ayın 10-dan iqtisadi aktivliyin gücləndirilməsinin zərurəti nəzərə alınaraq, sərt karantin rejiminin yumşaldılması istiqamətində növbəti tədbirlər paketi qüvvəyə minib. Karantin rejiminin bitməsinə sayılı günlər qalıb. Avqustun 31-də karantin rejimi bitir. Mütəxəssislərin bir qismi karantin rejiminin uzadılmasının, qalanları isə dayandırılmasının tərəfindədir. Ancaq müşahidələr və aparılan araşdırmalar zamanı məlum olur ki, virusa yoluxma hələ sıfırlanmayıb. Xüsusən də Bakı, Sumqayıt şəhərləri və Abşeron rayonunda koronavirusa yoluxma yüksək səviyyədədir. Onu da nəzərə almaq lazımdır ki, qarşıdan payız fəsli gəlir. Yerli və xarici mütəxəssislər dəfələrlə qeyd ediblər ki, payız aylarında koronavirusa yoluxma səviyyəsi yüksələcək. Bu səbəbdən də qeyd olunan ərazilərdə karantin rejiminin hələ davam etdirilməsinə ehtiyac var.
Həkim-ekspert Rasif Bağırov qeyd etdi ki, hazırda ölkədə ən çox yoluxma Bakı və Abşerondadır: "Ölkə üzrə ümumi yoluxmanın 50 faizə yaxını bu ərazilərdədir. Ən çox 50-59 yaş həddində olan insanlar bu virusa yoluxublar. Son həftədə 651 nəfər bu virusa yoluxub. Yoluxmanın artmasına səbəb yumşaldılmalarla bağlıdır. Virus ölkəmizdə tam olaraq yox olmayınca, karantin qaydalarını ləğv etmək düzgün deyil. Ən azı, əhalinin sayı çox olan Bakı, Sumqayıt şəhərləri və Abşerov rayonunda karantin rejimi davam etdirilməlidir. Əhalinin sağlamlığı üçün karantin rejiminin davam etdirilməsinə ehtiyac var”.
Həmsöhbətimiz onu da əlavə etdi ki, yoluxma təhlükəsinin yüksək olduğu Bakı, Sumqayıt şəhərləri və Abşeron rayonu istisna olmaqla, digər 10 şəhər və rayonun - Cəlilabad, Gəncə, Masallı, Mingəçevir, Yevlax, Bərdə, Goranboy, Göygöl, Xaçmaz, Salyanın “sarı” zonaya keçirilməsi mümkündür. Uzun müddətdir bu rayonlarda yoluxma sayının aşağı səviyyədə olması buna tam şərait yaradır: “Yoluxma hallarının artım dinamikasına yol verilməməsi üçün xüsusi karantin rejimi hələ bir müddət davam etməlidir. Vətəndaşlar COVID-19-un müalicəsi üçün vaksin tapılmayana kimi mümkün qədər məsuliyyətli davranmalı, maksimum özümüzü və ətrafımızı qorumağa davam etməliyik”.
Günel CƏLİLOVA
