Karantinin yumşaldılmasından sonra fəaliyyətlərinə icazə verilməsinə baxmayaraq, koronavirusa yoluxma risqi olan yerlər arasında gözəllik salonları hələ də qalmaqdadır.
Bu günlərdə Türkiyənin Ordu şəhərində toyda koronavirusa kütləvi yoluxma halı baş verib. Türkiyə mətbuatının yaydığı məlumatda qeyd olunur ki, hadisəyə təkcə pandemiya dövründə deyil, adi günlərdə belə əməl edilməli olan sadə gigiyena qaydalarına riayət edilməməsi səbəb olub. Belə ki, eyni makiyaj vasitəsindən istifadə edən 35 nəfər COVID-19-a yoluxub. Yoluxmanın daha da artmasının qarşısının alınması məqsədilə məhəllə, ümumilikdə, karantinə alınıb.
Qeyd edək ki, Azərbaycanda da bir müddət davam edən qadağadan sonra gözəllik salonları fəaliyyətini bərpa edib. Hazırda bu məkanlarda bütün kosmetoloji xidmətlərin göstərilməsinə icazə verilib. Amma etiraf edək ki, bizdə də heç də hər yerdə adi gigiyena qaydalarına ciddi əməl edilmir. Kiçik bir səhlənkarlıq virusun yayılmasına gətirib çıxara bilər. Xüsusən də vizajistlər istifadə etdikləri eyni kosmetik vasitəni bir gündə bir neçə nəfərə tətbiq edirlər. Elə kosmetik vasitələr var ki, onu nə yumaq olur, nə spirtlə dezinfeksiya etmək. Belə olan halda, tək koronavirus deyil, istənilən virus rahat şəkildə yayıla bilər.
Ekspertər bildirirlər ki, xüsusən də göz karandaşı və dodaq boyası kimi kosmetik vasitələr yeni növ koronavirusun yayılmasına səbəb ola bilər.
“Makiyaj vasitələri üçün istifadə edilən fırçalar…”
Məsələ ilə bağlı fikir bildirən dermatoloq-həkim Aynurə Həsənova qeyd etdi ki, pandemiya dövründə bərbərxanalar, gözəllik mərkəzləri sanitary-gigiyenik tələblərə mütləq şəkildə əməl etməlidirlər. Dəri ilə təmasda birdəfəlik tibbi əşyalardan istifadə olunmalıdır: “Tibbi avadanlıqlar mütləq şəkildə dezinfeksiya edilir. Amma dediyiniz məqam makiyaj vasitələri ilə baş verib. Bu xəbər vizajistlər üçün ciddi siqnal olmalıdır. Müştəri üçün istifadə edilən ənlik və kirşanların birdəfəlik olması mümkün deyil. Ona görə də makiyaj vasitələri üçün istifadə edilən fırçalar imkan daxilində birdəfəlik olmalıdır. Bir müştəri üçün istifadə edilən fırça digər müştərinin vizajında istifadə edilməməlidir. Həmçinin, vizajist müştəri üçün istifadə etdiyi fırçanı yenidən ənlik və kirşana vurmamalıdır. Bu məqamlara mütləq əməl olunmalıdır ki, müştərilər arasında virusa yoluxma təhlükəsi artmasın. Həmçinin, eyni dodaq boyasından bütün müştərilərin istifadə etməsi düzgün deyil. Yaxşı olar ki, vizaj zamanı müştərilər öz dodaq boyasından istifadə etsinlər”.
Həmsöhbətimiz onu da əlavə etdi ki, gözəllik salonları özəl obyektlər olduğu üçün obyekt sahibləri özləri dezinfeksiya işləri ilə məşğul olmalıdırlar: "Gözəllik salonları potensial təhlükə mənbəyi ola bilər. Buna görə də xəstə olduğunu hiss edən müştəri və ustalar işə getməməlidirlər. Eyni zamanda, salonların girəcəyində dezinfeksiyaedici məhlul olmalıdır ki, müştərilər içəri daxil olanda istifadə etsinlər. Paralel olaraq, obyekt sahibləri obyektləri hər gün dezinfeksiya etdirməlidirlər. Müştəri xəstədirsə və maskasız obyektə daxil olursa, ona maska təklif edilməlidir".
Günel CƏLİLOVA
