Məlum olduğu kimi, Dövlət İmtahan Mərkəzi tərəfindən avqustun 13-14-də II və III ixtisas qrupları üzrə, avqustun 20-21-də isə I və IV ixtisas qrupları üzrə ali təhsil müəssisələrinə qəbul imtahanları keçirildi.
İmtahanlar bitər-bitməz, valideyn və abituriyentlərin test tapşırıqları ilə bağlı narazılıqlar da yarandı. Belə ki, sualların cavab variantlarının bir-birınə çox oxşar olduğunu, bununla da abituriyentlərdə çaşqınlıq yarandığı haqqında fikirlər səslənir. Həmçinin, abituriyentlərin cavab verə bilmədikləri 10-a yaxın sualın isə olduqca çətin, yeni və proqramdan kənar olduğunu iddia edənlər də var.
Şikayətlərin nə dərəcədə əsası olub-olmaması barədə mütəxəssislərə müraciət etdik.
“…istifadə olunan test tapşırıqları proqram çərçivəsində olub”
Təhsil eksperti Kamran Əsədov bildirdi ki, bu il ali təhsil müəssisələrinə qəbul imtahanlarında istifadə olunan test tapşırıqları proqram çərçivəsində olub: “Abituriyentlərin özlərinin hazırlığı zəif olduğuna görə bu iddiaları irəli sürürlər. Əslində, qəbul imtahanlarında istifadə olunmuş test tapşırıqlarının mövzuları orta məktəblərdə mart ayının 3-nə qədər keçirilən mövzulardan salınıb. Amma etiraf edək ki, mart ayının 3-dən sonra uşaqlar normal təhsil almayıblar. Ona görə də avqustun 20-21-də keçirilən imtahanlarda istifadə olunan test modelləri, xüsusilə fizika fənnindən olan suallar çaşqınlıq yaradıb. Amma bu o demək deyil ki, test tapşırıqları qəbul proqamından kənar salınıb, yaxud da hər hansı bir çaşdırıcı məqsəd daşıyır. Birmənalı şəkildə deyim ki, test tapşırıqları ağırlıq səviyyəsinə görə üç kateqoriyaya bölünür: asan, orta və çətin. Abituriyentlər çətin tipli test tapşırıqlarına imtahan başlayan kimi baxanda psixoloji təsirə məruz qalırlar. Onlar orta və asan tipli test tapşırıqlarından başlasalar, bu zaman onlarda daha yaxşı motivasiya olacaq. Rahatlıqla həmin test tapşırıqlarının cavablarını yaza biləcəklər. Amma uşaqlar çətin test tapşırıqlarına daha çox vaxt ayırırlar. Vaxtları da gedir, psixoloji baxımdan təzyiqə məruz qalırlar və hesab edirlər ki, çətindir. Qeyd edim ki, test tapşırıqları yalnız ağırlıq səviyyəsinə görə bölünmür”.
Müsahibimizin dediyindən belə aydın oldu ki, şərait nəzərə alınaraq, mürəkkəb sualların sayı azaldılıb.
Günel CƏLİLOVA
