Azərbaycanda koronavirus pandemiyasi ilə baglı elan edilən karantin rejimi avqustun 31-də başa çatır. Ancaq son bir neçə gündə COVID-19 infeksiyasına yoluxanların sayının artması karantin müddətinin uzadılıb-uzadılmayacağı ilə bağlı sualların yaranmasına səbəb olur.
Azərbaycanın baş infeksionisti Cəlal İsayev bildirdi ki, son bir neçə gün ərzində yoluxanların sayı 79-dan 3 rəqəmliyə yüksəldi. Yoluxanların sayı da sağalanlardan çoxdur: “Məlum idi ki, son bir neçə həftədə sağalanların sayı yoluxanların sayından 2-3 dəfə çox idi. Ona görə də hesab edirəm ki, karantin tədbirlərini saxlamaq lazımdır. Çünki payızda ikinci dalğanın olma ehtimalı var. Qonşu ölkələrdə yoluxanların sayında artım müşahidə olunur. Bu səbəbdən də karantin rejimini birdən-birə ləğv etmək olmaz”.
Adil Qeybulla: “Karantin rejimi birdəfəlik ləğv olunmalı və diqqət karantin davranışlarına yönəlməlidir”
Professor, tibbi ekspert Adil Qeybulla isə qeyd etdi ki, karantin rejimi birdəfəlik ləğv olunmalı və diqqət karantin davranışlarına yönəlməlidir: “Çünki insanlar evdə qalmaqdan beziblər. Ona görə də insanların karantin davranışlarına əməl etməsi üçün maarifləndirmə işi aparılmalıdır. Yəni “Evdə qal” karantini insanları bezdirib. Bu baxımdan, insanlar qapalı mühitdə maska taxmağa, fiziki məsafə gözləməyə, dezinfeksiyadan istifadəyə fikir verməlidirlər. Sadalananlarla pandemiyanın içində yaşamaq mümkündür. Postpandemiya dövründə araşdırma aparılsa, məlum olacaq ki, ən doğrusu bu idi”.
Qeyd edək ki, COVID-19 pandemiyası ilə bağlı bu il martın 24-dən Azərbaycanda karantin rejimi elan edilib. Karantin avqustun 31-nə kimi uazadılıb. Gündəlik yoluxmada azalma olduğundan, rejim aprelin 27-dən mərhələlərlə yumşaldıldı. Amma bu, əks proses doğurduğundan, iyunun 21-dən Bakı və ölkənin bir çox yerində karantin yenidən sərtləşdirildi. Fəaliyyətinə icazə verilən iş və xidmət sahələrində çalışanlardan başqaları küçəyə çıxarkən yenidən SMS-lə icazə almalı olurdular. Avqustun 5-dən sərt karantin rejimi bir qədər yumşaldılıb.
Günel CƏLİLOVA
