“Bütün kəndləri bir-bir gəzib, vətəndaşlarla görüşüb, mövcud olan problemləri onların dilindən eşitməli və problemləri həll etməlisiniz”. Bunu Prezident İlham Əliyev Faiq Qürbətovu Biləsuvar Rayon İcra Hakimiyyətinin, Elmir Bağırovu isə Saatlı Rayon İcra Hakimiyyətinin başçısı vəzifələrinə təyin olunmaları ilə əlaqədar videoformatda qəbul edərkən deyib.
Ölkə başçısı qeyd edib ki, ilk növbədə, rayonlarda vəziyyət düzgün təhlil edilməlidir: “Mövcud olan nöqsanlar, çatışmazlıqlar araşdırılmalıdır. İnsanları narahat edən problemlər öz həllini tapmalıdır. Siz öz işinizdə həmişə insanlarla bir yerdə olmalısınız. İnsanlar sizin qayğınızı hiss etməlidirlər. Bütün kəndləri bir-bir gəzib, vətəndaşlarla görüşüb, mövcud olan problemləri onların dilindən eşitməli və problemləri həll etməlisiniz. Mən bunu bir neçə dəfə demişəm, bir daha demək istəyirəm ki, əgər ölkəmizin bütün kəndlərində mövcud olan problemlər həll edilərsə, demək olar ki, biz öz işimizi daha da yüksək səviyyəyə qaldıra bilərik”.
Prezident onu da qeyd edib ki, hazırda dördüncü regional inkişaf proqramı icra edilməkdədir və bu proqramların tərtib edilməsində yerlərdən gələn müraciətlər xüsusi rol oynayıb: “Məhz yerlərdən gələn müraciətlər əsasında bu proqramlar tərtib edilib və ardıcıllıqla icra edilir. Əgər 2004-cü ildə birinci proqram və ondan sonrakı illərdə digər proqramlar qəbul olunmasaydı, bu gün Azərbaycan regionları bu qədər inkişaf edə bilməzdi”.
Bütövlükdə, bu gün bir sıra kəndlərdə mövcud olan problemlər oxşar olsa da, hər bir kənddə fərqli sosial problemlər var. Xüsusən də dağlıq rayonlarda. O üzdən, icra başçıları kəndləri gəzib problemlərlə yerində tanış olmalıdırlar. Bəzən uzun illər rayona başçılıq edən icra başçısının hansısa kəndə bir dəfə də olsun ayağı dəymir. Sakinləri narahat edən məsələlərlə maraqlanmır. O baxımdan, bu çox vacib məsələdir.
Maraqlıdır, bəs ekspertlər buna necə yanaşırlar?
“...problemlərin üzərinə getməlidirlər”
Məsələyə münasibət bildirən ekspert İlqar Hüseynlinin sözlərinə görə, icra başçıları sözügedən məqamlara xüsusi diqqət yetirməlidirlər: “Məsələ ondadır ki, icra başçılarının vəzifələri ilə bağlı nizamnamələr, əsasnamələr, təlimatlar var. Səlahiyyətlərinə daxil olan məsələlərlə bağlı geniş nizamnamə mövcuddur. Həmin nizamnamə çərçivəsində hər bir icra hakimiyyəti başçısı öz funksiyasını yerinə yetirsə, o zaman əlavə tapşırıq və göstərişlərə yer qalmaz. Bilavasitə rəhbərlik etdikləri rayonun vətəndaşlarının həm sosial-maddi imkanları, həm də rayonun sosial-iqtisadi inkişafı ilə bağlı cavabdehdirlər. Ona görə də icra başçıları bilavasitə yerlərdə vətəndaşlarla görüşməli və onların problemləri ilə tanış olmalıdırlar. Təəssüflər olsun ki, bir sıra rayonlarda icra başçıları, faktiki olaraq, bunu etmirlər. Kəndlərdəki sosial-iqtisadi vəziyyətlə, ümumiyyətlə, məşğul olmurlar. Digər tərəfdən, Biləsuvar və Saatlı rayonlarında yaşayan sakinlərin su təminatı ilə bağlı ciddi problemləri var. Sözügedən rayonlara təyin edilən icra başçıları gəncdirlər. Bununla belə, ictimai sektordan ora təyin ediliblər. Dünya təcrübəsini, vətəndaşlarla işləməyi yaxşı bilən gənc kadrlardır. Fikrimcə, onlarda olan enerji və potensial imkan verir ki, təyin olunduqları rayonları kənd-kənd, qəsəbə-qəsəbə gəzib vətəndaşlarla görüşlər keçirsinlər. Vətəndaşların sosial problemləri ilə məşğul olsunlar, problemlərini yerində öyrənsinlər. Yerli səviyyədə məsələnin həlli mümkündürsə, dərhal onu həll etsinlər. Buna imkanları yoxdursa, o zaman müvafiq mərkəzi qurumlara sorğular göndərsinlər. Bəzi icra başçıları müəyyən oliqarxların təzyiqləri ilə üzləşə bilər. Çünki çox böyük ərazilər zəbt olunub. Ancaq hesab edirəm ki, icra başçıları buna hazır olmalı və problemlərin üzərinə getməlidirlər”.
Ekspert hesab edir ki, icra başçısı yerlərdə ictimaiyyətlə nə qədər çox təmasda olsa, bu bir o qədər mövcud problemlərin həllinə müsbət töhfə verə bilər.
Vidadi ORDAHALLI
