Azərbaycan dövlətinin seçdiyi və tətbiq etdiyi fərqli, özünəməxsus pandemiya ilə mübarizə tədbirləri başqa ölkələr tərəfindən də gerçək nümunə kimi qəbul edilir.
Azərbaycanda Aşura mərasimi ilə də bağlı yeni üsul tətbiq ediləcək. Belə ki, vətəndaşlar Aşura günündə pandemiya səbəbindən məscidlərdə deyil, Mərkəzi Qan bankının paytaxtda və bölgələrdəki filiallarında ehsan niyyətilə qan verəcəklər. Aşura günü ilə bağlı qərarda deyilir ki, vətəndaşlarımızın bu il də humanist ənənəni davam etdirərək ehsan niyyətilə qan verməsi daha zərurudir.
Artıq bununla bağlı Milli Hematologiya və Transfuziologiya Mərkəzi vətəndaşlara müraciət edib.
Mərkəzdən mətbuata verilən məlumata görə, bu il Məhərrəm ayının 10-u - Aşura günü 2020-ci il avqust ayının 30-na təsadüf edir. Bu il Aşura dünyada davam edən koronavirus pandemiyası dövründə keçirilir: "Bundan öncəki illərdə vətəndaşlarımız Aşura günlərində məscidlərə gedərək qanvermə aksiyalarında iştirak edirdilər. Dini mərkəz - Qafqaz Müsəlmanları İdarəsi (QMİ) ölkəmizdə karantin rejiminin tətbiqi ilə bağlı qərarın tətbiqinə başlanan ilk günlərdən etibarən Azərbaycan Respublikası Nazirlər Kabineti yanında Operativ Qərargahla ətraflı məsləhətləşmələrindən sonra zəruri tövsiyələri nəzərə alaraq, koronavirusa yoluxma hallarının qarşısının alınması məqsədilə ölkə ərazisindəki bütün məscid və ziyarətgahlarda ibadətlərin müvəqqəti dayandırılmasına dair qərar qəbul edib. Qafqaz Müsəlmanları İdarəsinin Qazılar Şurası və səlahiyyətli nümayəndələrinin bu il Aşura günü ilə bağlı qərarında deyilir ki, vətəndaşlarımız bu il də humanist ənənəni davam etdirərək, Aşura günündə pandemiya səbəbindən məscidlərdə deyil, Mərkəzi Qan bankının paytaxtda və bölgələrdəki filiallarında ehsan niyyətilə qan verəcəklər. Mərkəzi Qan bankı olaraq vətəndaşlarımızın diqqətinə çatdırmaq istəyirik ki, müəssisəmizdə mütəmadi olaraq profilaktik dezinfeksiya və digər zəruri təhlükəsizlik tədbirləri görülür”.
Din xadimləri hesab edirlər ki, ehsan məqsədilə qanvermə aksiyasının təşkil edilməsi olduqca müsbət bir haldır. Bir insanın qanının başqa birisinə həyat verməsi baxımından böyük əhəmiyyət daşıdığını deyən ilahiyyatçıların fikrincə, ən ciddi yoluxma risqi kütləvi tədbirlər zamanı yaşana bilər, odur ki, indiki halda, qanvermənin təşkili məqsədəuyğundur. İlahiyyatçılar qeyd edirlər ki, Aşura günü ehsan məqsədilə qanvermə aksiyasının təşkil edilməsinin həm də böyük mənəvi dəyəri var. Onların sözlərinə görə, hər il ehsan verən, böyük ehsan süfrələri açanlar hazırda pandemiyaya görə bunu edə bilmir və onlar həm sağlamlıqlarının yol verdiyi dərəcədə qan verməklə, həm də ehsan məclislərinə xərcləyəcəkləri vəsaitləri ərzaq yardımı şəklində ehtiyaclı insanlara yönəltməklə böyük savab iş görmüş olarlar.
“Əsas məqsəd qan verib yaşatmaqdır”
Tanınmış ilahiyyatçı Hacı Təyyar Hüseynli “Bakı-Xəbər”ə bildirdi ki, ümumiyyətlə, Məhərrəmliyin mahiyyətində qan verib yaşatmaq missiyası var. İlahiyyatçı vurğuladı ki, İmam Hüseyn əleyhisalam və Kərbəla faciəsində şəhid olanlar qan verərək həqiqətin, mənəviyyatın, insaniyyətin dirilişini, oyanışını, azadlığın, hürriyyətin, ədalətin bərpa olunmasını əqidəmizdə yaşatmaq üçün həyatlarını fəda ediblər. “Bu il Aşura mərasimində hər il keçirilən qanvermə aksiyası pandemiya üzündən məscidlərdə təşkil edilməyəcək. Əvvəlki illərdə qanvermə məscidlərdə keçirilirdi və tamamilə səhiyyə qaydalarına uyğun şəkildə gerçəkləşdirilirdi. Deyildiyi kimi, qan vermək istəyənlər müəyyən edilən ünvana gedib ehsan olaraq öz qanlarını verə biləcəklər. Ümumi vəziyyəti, pandemiya təhlükəsini, yoluxma risqini nəzərə alaraq, qanvermə aksiyasının bu şəkildə təşkil edilməsi tam uyğundur. Qan verib yaşatmaq, xəstəlikdən, pandemiyadan əziyyət çəkən insanların bu şəkildə imdadına yetmək, bütövlükdə, xəstələrə yardım dinimizin məqsədlərindən biridir. Xəstəliklə mübarizə ilahi bir şəfa prinsipinə qoşulmaqdır, bu xidməti insanlıq yolunda göstərmək hər bir əqidəli insanın borcudur. İnanclı insan üçün fərqi yoxdur ki, ünvan olaraq Allah-Təalanın adına ibadi məkan-məscid, yaxud Qan bankı seçilib, əsas məqsəd qan verib yaşatmaqdır. Qan vermək xalqımız, inanclı insanlarımız üçün Aşura mahiyyətinə, həqiqətinə, fəlsəfəsinə bəslənən bir sevgi və verilən dəyərdir. İmam Hüseyn əleyhisalam və Kərbəla şəhidləri canlarından, qanlarından keçdilər və nəticə əldə etdilər, mənəvi dirçəlişə nail oldular. Verilən qanlarda da məqsəd odur ki, həmin ideoloji əqidə davam etsin. Mahiyyəti eynidirsə, məqsəd qan verib yaşatmaqdırsa, qeyd etdiyim bütün mənəvi keyfiyyətləri yaşatmaqdırsa və qan verənlər öz əqidələri yolunda qanlarından keçirlərsə, verilən qanlar da tam şəffaf şəkildə öz ünvanına çatdırılmalıdır. Əlbəttə, biz buna inanırıq ki, bu istiqamətdə şəffaflıq tam təmin olunacaq”.
H.T.Hüseynli qeyd etdi ki, Aşura günü inanclı insanların dövlətimizin, cəmiyyətimizin bu humanist addımına qoşulması təqdirəlayiqdir. İlahiyyatçı hesab edir ki, Azərbaycan xalqınının mənəviyyatımız, dinimiz, əqidəmiz üçün önəmli olan əhamiyyətli bir gündə - Aşura günündə qanvermə aksiyasına qoşulması çox yüksək qiymətləndirilir. “Bizim insanlarımız əzəli tərbiyəsindən, tarixi keçmişindən heç zaman qopmayıb, peyğəmbərləri, imamları, müqəddəsləri və dini inanclarını, Quranımızı, mənəvi dəyərləri həmişə yaşadıb və yaşadacaqlar da. İnsanlarımızın humanistliyi davamlı olacaq. Allah-Təala xalqımızı bu göstərdiyi xidmətlərə, atdığı addımlara görə tezliklə bütün bəlalardan, bütün xarici və daxili xəyanətlərdən qoruyar” - deyə ilahiyyatçı qeyd etdi.
İradə SARIYEVA
