“Əfsuslar olsun ki, bəzi rayonlarda sahibkarlar incidilir, onlar qarşısında süni əngəllər yaradılır, onlardan yerli icra orqanları tərəfindən rüşvət, pay tələb olunur”.
Bunu Azərbaycan Respublikasının Prezidenti İlham Əliyev avqustun 24-də Faiq Qürbətovu Biləsuvar Rayon İcra Hakimiyyətinin, Elmir Bağırovu isə Saatlı Rayon İcra Hakimiyyətinin başçısı vəzifələrinə təyin olunmaları ilə əlaqədar videoformatda qəbul edərkən deyib.
“Buna qətiyyən yol vermək olmaz və bu məsələlərə çox ciddi nəzarət olmalıdır. Sahibkarlar dövlət məmurları tərəfindən yalnız dəstək, kömək görməlidirlər və sahibkar ancaq dövlətin vergisini ödəməlidir. Bundan başqa, heç kimə heç bir vəsait ödənilməməlidir”, – dövlət başçısı əlavə edib.
Qeyd edək ki, bölgələrdə sahibkarlıqla məşğul olmaq istəyənlərə bəzi məmurlar tərəfindən süni maneələr yaradılır. Onlar incidilir. Halbuki, sahibkarlıqla məşğul olmaq istəyənlərə hər bir dəstək göstərilməli, onların öz işlərini böyütməsi üçün şərait yaradılmalıdır.
“…əlavə haqq tələb edirlər”
Millət vəkili Rüfət Quliyev qeyd etdi ki, dövlət hər zaman sahibkarlıqla məşğul olanlara və olmaq istəyənlərə dəstək olub. Bu bir ənənə halını alıb: “Pandemiya dövründə sahibkarlara dəstəyin artırılması ondan xəbər verir ki, ən çətin dönəmdə Azərbaycan dövləti sahibkarın yanındadır. Eyni zamanda, sahibkarlara göstərilən dövlət dəstəyi bir tərəfdən də onların üzərinə düşən məcburi öhdəlikləri yerinə yetirmələrini ön plana çəkir. Bölgələrdə sahibkarlığın inkişafına şəraitin yaradılması prioritetlərdəndir. Lakin bəzi rayonlarda sahibkarların incidilməsi, onlar qarşısında süni əngəllərin törədilməsi, onlardan yerli icra orqanları tərəfindən rüşvət və ya pay tələb olunması hallarına rast gəlindiyini qeyd edən ölkə başçısı bu kimi neqativ halların qətiyyən yolverilməz olduğunu və bu cür xoşagəlməz hallara qarşı ciddi mübarizə aparıldığını təyin olunan hər bir yeni kadrın diqqətinə çatdırır. Həqiqətən də sahibkarlar üçün əlverişli şəraitin yaradılması rayonlarda yeni iş yerlərinin açılması, əhalinin məşğulluğunun və sosial rifah halının təmin olunması deməkdir. Odur ki, təyin olunan hər bir icra başçısı cənab Prezidentin bütün tapşırıq və tövsiyələrinə ciddi əməl etməli, təyin olunduqları rayonlarda insanların xidmətində durmalıdır. Necə ki, Prezident hər zaman qeyd edir ki, hər bir məmur xalqın xidmətçisi olmalıdır. Çox təəssüflər olsun ki, bəzən məmurların adi davranış qaydalarında səhvlərə yol verdiklərinin də şahidi oluruq. Əslində, məmurlar xalqın xidmətində durmaqla yanaşı, öz hərəkətləri ilə sadə insanlara nümunə olmalıdırlar”.
Millət vəkili onu da əlavə etdi ki, bu gün bəzi rayonlarda sahibkarlıqla məşğul olmaq istəyənlərə maneçilik törədilir. Sahibkarların fəaliyyətinə milyardlarla vəsait ayrılır. Ancaq təəssüflər olsun ki, yerli icra hakimiyyəti orqanları bir çox halda sahibkarlar təbəqəsinə lazımi dəstək vermirlər, hətta bəzən onları incidirlər, əlavə haqq tələb edirlər. Bütün bunlar isə dövlət başçısını ciddi narahat edir və bu neqativ halların qarşısını almaq üçün sərt tədbirlər görülməlidir.
Günel CƏLİLOVA
