Məşhur olmaq, cəmiyyət tərəfindən tanınmaq, hətta az-çox sevilmək heç kəsə əsas vermir ki, o, dövlətin qayda-qanunlarını tapdasın. Ölkə başçısının təbirincə desək, hər kəs qanun qarşısında bərabərdir və toxunulmaz şəxs yoxdur.
Ancaq, çox təəssüf ki, bəzi tanınmış şəxslər mövcud karantin qaydalarına əməl etməklə yox, onu pozmaqla gündəmə gəlirlər. Bildiyimiz kimi, qanunsuzluğa yol verən məlum şəxslər lazımi şəkildə cəzalandırıldı, hətta maliyyə cəriməsilə yanaşı, bəziləri 15 sutkalıq həbsə də məhkum edildi.
Karantin qaydalarını pozan tanınmış şəxslərin sərt və güzəstsiz cəzalandırılmasına ictimaiyyət necə baxdi?
Ayrı-ayrı media orqanlarında, əsasən də sosial şəbəkələrdə o şəxslərə qarşı güclü ictimai qınağın olması diqqətdən yayınmadı.
“İctimaiyyət dövlətin o şəxsləri cəzalandırmasını çox müsbət qarşıladı”
“Novoye vremya” qəzetinin baş redaktoru Şakir Ağayev “Bakı-Xəbər”ə bildirdi ki, qanunu pozanların bu davranışları, eləcə də onların sərt şəkildə cəzalandırılması cəmiyyətin müxtəlif təbəqələri tərəfindən müsbət qarşılandı. “Karantin qaydalarını pozan tanınmış şəxslərin sərt şəkildə cəzalandırılması gözlənilən hal idi. Bilirsiniz ki, ölkəmizdə pandemiya ilə mübarizə qaydalarına uyğun olaraq karantin rejimi mövcuddur. Bu qaydalara əsasən, ölkəmizdə kütləvi tədbirlərin, mərasimlərin, o cümlədən də toy, nişan və sairin keçirilməsi qadağan edilib. Karantin qaydalarının yumşaldılması, restoranların açıq havada fəaliyyətinə icazə verilməsi baş versə də, burada toy və nişan, digər bu qəbildən olan mərasimlərin keçirilməsinə birmənalı şəkildə icazə verilməyib. Çox təəssüflər olsun, öz şəxsi maraqlarını qanunlardan üstün tutan bəzi mənsəb sahibləri bu qaydalara fikir verməyərək, övladları üçün toy keçirdilər. Bu da, sözün açığı, cəmiyyətdə bir narazılıq, qıcıq yaratdı, onlara qarşı nifrət hissi oyatdı. Hesab edirəm ki, bu “biz qanundan üstünük” iddiası ilə keçirilən və bununla da cəmiyyətdə qıcıq yaratmağa xidmət edən bir hərəkət idi. Təbii ki, XXI əsrdə, texnologiyaların üstün olduğu bir vaxtda belə “gizlin işlər”i pərdələmək mümkün deyil. Bu məsələ ictimailəşən kimi, həmin şəxslər müxtəlif şəkillərdə cəzalandırıldı, layiq olduqları cəzanı aldılar. Təbii, bu da cəmiyyət tərəfindən müsbət qarşılandı.
Ölkə başçısı İlham Əliyev dəfələrlə vurğulayıb ki, qanun hər şeydən üstündür və bütün vətəndaşlar qanun qarşısında bərabərdirlər. Karantin qaydalarını pozaraq toyda iştirak edən tanınmış adamların, vəzifə sahiblərinin cəzalandırılması bir daha onu sübut etdi ki, kimin hansı vəzifəni tutmasından, kimin məşhur, tanınmış olmasından asılı olamayaraq, hamı qanun qarşısdında bərabərdir. Bu, vaxtında atılan addım idi. Çünki sadə camaat gördü ki, onlar toy edəndə cərimələnirlərsə, hətta həbs edilirlərsə, onlarla yanaşı, imkanlı, tanınmış şəxslər də toy, şənlik edirlərsə, onlar da sərt şəkildə cəzalandırılır. İctimaiyyət dövlətin o şəxsləri cəzalandırmasını çox müsbət qarşıladı. Bu çox təqdirəlayiq haldır. Fikrimcə, qanunları pozan bəzi tanınmış şəxslər haqqında görülən sərt cəza tədbirləri özlərini qanundan üstün tutmağa cəhd edənlər üçün də bir dərs oldu. Bu bir daha onu göstərdi ki, ölkədə qanun şahdır və tutduğu vəzifəsindən, titulundan asılı olmayaraq, hər kəs qanunun tələblərinə əməl etməlidir. O insanların cəzalandırılması onu da sübut etdi ki, qanunlara meydan oxumaq olmaz. O şənlikdə qanunları yazan deputatlar da, yüksək vəzifə sahibləri də iştirak edirdilər. Hamısı xalqın gözləri qarşısında cəzalarını aldılar” - deyə Ş.Ağayev qeyd etdi.
Ş.Ağayev bildirdi ki, artıq məclisdə iştirak edən vəzifə sahibləri inzibati qaydada cəzalandırılıblar. O hesab edir ki, karantin qaydalarını pozan insanlara qarşı görülən bu tədbirlər davam etməli, buna cəhd edən vəzifə sahibləri də cəzalandırılmalı, hər kəs bundan dərs götürməlidir.
İradə SARIYEVA
