Bakıda bəzi çoxmənzilli binaların istismarına icazə verilməsinin sadələşdirilməsi ilə əlaqəli ölkə başçısının imzaladığı sərəncamla paytaxtda qeydiyyata alınmamış və istismara qəbul edilməyən mənzillərin əksəriyyətinin qeydiyyat problemi həll olunub.
Çoxmənzilli binaların qeydiyyat məsələsinin həll olunmasına baxmayaraq, “göydələnlər”də hələ də bəzi problemlər aktual olaraq qalır. Belə ki, çoxmənzilli binalardan mənzil alanlardan həmin evdə yaşamadıqlarına baxmayaraq, aylıq kommunal ödəniş tələb olunur.
Qeyd etdiyimiz kimi, “göydələn” tikən şirkətlər sənədləşmə prosesinə başlasalar da, camaatı incitməkdə davam edirlər. Belə ki, mənzil sahibi binada yaşamadığı halda, ondan aylıq kommunal ödəniş tələb edilir. Əks halda, həmin mənzilin sənədini özəlləşmə üçün təqdim etməyəcəklər.
“Çoxmənzilli binalarda xoşagəlməz hallar müşahidə edilir”
Məsələ ilə bağlı fikir bildirən sosial sahə üzrə ekspert İlqar Hüseynli qeyd etdi ki, mənzildə yaşayış olmadan ev sahibindən aylıq kommunal ödəniş tələb edilməsi düzgün deyil: “Aidiyyəti qurumlar, mənzil-kommunal istismar sahələrinin (MKİS) burada marağı var, pul yığırlar. Kommunal xərclərin yığımında ayrıseçkilik ola bilməz. Ancaq bəzən eşidirik ki, MKİS-lər deyir, bina çox gözəl yerdə yerləşir. Odur ki, kommunal xidmətlər üçün daha yüksək pul istənir. Çoxmənzilli binalarda xoşagəlməz hallar müşahidə edilir. Belə ki, vətəndaş Rusiyada yaşayır, mənzil alıb, amma illərdir ki, orada yaşamır. Lakin buna baxmayaraq, ondan kommunal ödənişlər tələb edilir. Bu, doğru deyil. Çünki, bir çox halda, həmin şəxslər heç aldığı mənzili belə təmir etməyiblər. Həmin şəxs geri qayıdanda kommunal ödəniş borcunun olduğu haqqında ona məlumat verilir. Maraqlıdır, insan yaşamadığı halda, necə pul ödəyə bilər? Hesab edirəm ki, bu məsələ ilə bağlı qanunvericiliyə nəzər salınmalı və qanunsuz olaraq mənzil sahibindən pul tələb edənlər cəzalandırılmalıdırlar”.
Son olaraq bildirək ki, çoxmənzilli binada ev alsalar da, həmin mənzillərdə yaşamayan vətəndaşlardan aylıq kommunal haqq tələb edən şirkətlərlə bağlı araşdırmamız davam edir. Növbəti yazılarımızda bu barədə geniş məlumat verəcəyik.
Günel CƏLİLOVA
