Kafe və restoranlar bir həftədən artıqdır ki, fəaliyyətini açıq havada bərpa edib. Əlbəttə, belə bir qərarın verilməsi üçün kifayət qədər tutarlı, əsaslı səbəblər olmalı, münbit şərait yetişməli idi. Əsas hədəf, təbii ki, virusa yoluxanların sayında kəskin azalmanın müşahidə edilməsi idi.
Xatırladaq ki, pandemiyanın yayılmasının qarşısının alınması məqsədilə həyata keçirilən tədbirlər çərçivəsində 29 mart 2020-ci il tarixindən etibarən ölkə üzrə kafe və restoranların fəaliyyətinə məhdudiyyətlər qoyuldu. Müştərilərə yerində xidmət dayandırıldı, yalnız evə çatdırılma, onlayn sifariş xidmətlərinin fəaliyyətinə icazə verildi. 4 may tarixindən etibarən isə, Bakı, Sumqayıt, Gəncə, Lənkəran, Abşeron rayonu ərazisi istisna olmaqla, digər şəhər və bölgələrdə kafe və restoranların yerində müştərilərə xidmət göstərməsinə icazə verildi. Amma bu halda da kafe və restoran sahiblərindən, işçi personaldan karantin rejimi qaydalarına, sanitar-gigiyenik normalara əməl etmək tələb olunurdu.
Məlumat üçün bildirək ki, Operativ Qərargah tərəfindən kafe və restoranların fəaliyyətinə dair xüsusi qaydalar işlənib hazırlanmışdı. Masalar arasında məsafə 2 metrdən az, masa arxasında əyləşmiş insanlar arasında isə 1 metrdən az olmamaq şərtilə, işçi personalın qoruyucu maskalardan istifadəsi, dezinfeksiyaedici məhlullardan daim istifadə olunması, obyektə daxil olanların hərarətinin ölçülməsi tələbi qoyulmuşdu. Həmçinin, kafe və restoranlarda kütləvi toplaşmalara, kütləvi məclislərin təşkilinə qadağa qüvvədə qalırdı. Elə o vaxt da bəzi yerlərdə karantin qaydalarının kobud şəkildə pozulması halları yaşanırdı. İcazəsiz fəaliyyət göstərən kafe və restoranlar da aşkar edilirdi
Qeyd etdiyimiz kimi, artıq açıq havada kafe və restoranların fəaliyyətinə icazə verilib. İaşə obyektlərinin fəaliyyətinə icazə veriləndən və karantin qaydaları yumşaldılandan sonra virusa yoluxanların sayı artır. Ekspertlərin fikrincə, bunun səbəbi insanların öz sağlamlıqlarına səhlənkar yanaşması, kafe və restoranlarda təmizlik qaydalarına düzgün riayət edilməməsidir.
“...müştərilərə xidmət zamanı qabların, stəkanların dezinfeksiya olunmaması müəyyən dərəcədə yoluxma risqi yaradır”
Azərbaycanın baş infeksionisti Cəlal İsayev bildirdi ki, restoranlarda təmizlik qaydalarına düzgün riayət edilməməsi, müştərilərə xidmət zamanı qabların, stəkanların dezinfeksiya olunmaması, təbii ki, müəyyən dərəcədə yoluxma risqi yaradır: “Amma burada risq yüksək deyil. Əsas risq faktoru restorana gələn insanların qaydalara əməl etməməsidir. Çünki açıq havada fəaliyyətinə icazə verilən restoranlarda sosial məsafənin gözlənilməsi üçün tədbirlər görülüb. Restoranlarda şəxsi təmizlik qaydalarına laqeydlik COVID-19 virusunun yayılmasını artıra bilər. Hər kəs bu qaydalara riayət etməlidir ki, yoluxma sayında artım baş verməsin".
Qeyd edək ki, koronavirus epidemiyasının olduğu indiki dövrdə iaşə obyektləri gigiyenik qaydalara tam şəkildə əməl etməlidirlər. Nəzərə almaq lazımdır ki, hər hansı bir xırda səhv insanların yoluxmasına səbəb ola bilər.
Günel CƏLİLOVA
