“Bu yöndə İran hökuməti də, digər müsəlman ölkələri də qərarlar qəbul edirlərsə, bu, insanları təhlükədən qorumağa xidmət edən addımlardır”
Bütün dünyanı təhdid altında saxlayan koronavirus pandemiyası Məhərrəmliyi qeyd edən bütün müsəlman ölkələrini vahid mövqedən çıxış etməyə vadar edib.
Bilirik ki, artıq müsəlman ölkələrində pandemiya ilə əlaqədar Məhərrəm ayında kütləvi mərasimlər keçirilməyəcək. Bununla bağlı əzadarlıq mərasimləri təxirə salınıb. Hələ bir neçə gün əvvəl Azərbaycanda bununla bağlı qərar qəbul edilib, digər dövlətlər isə prosesə avqustun 21-dən qoşulublar. Bu il Məhərrəm ayı və Aşura dünyada davam edən koronavirus pandemiyası dövrünə təsadüf etdiyi üçün müvafiq qərar qəbul edilib.
Bildirək ki, Aşura mərasimini keçirməkdə iddialı olan və hətta bununla bağlı başqa ölkələrə də çağırışlar edən İranda bu tədbirlər keçirilməyəcək. Belə ki, İranın Koronavirusla Milli Mübarizə Komitəsinin qərarına əsasən, İranın Tehran vilayətinin məscidlərində matəm mərasimləri (Məhərrəmlik mərasimləri) qadağan edilib.
Müsəlman ölkələrində koronavirus təhlükəsi ilə əlaqədar olaraq məscidlərin müvəqqəti bağlanmasına qərar verilib, Məhərrəmliklə bağlı mərasimlərin keçirilməsinə qadağa qoyulub. Bununla da müsəlman aləmində xüsusən də Məhərrəm ayında vahid bir xətt formalaşmağa başlayır. Yəni müsəlman aləmi üçün milli-mənəvi, dini dəyərlər nə qədər əziz olsa da, cəmiyyətlərin, xalqların, insanların sağlamlığı daha ön plana çəkilir. Əslində, bu xəttin gerçəkləşməsində Azərbaycanın böyük xidməti olub. Pandemiyanın ilk günündən Azərbaycan dövlətinin yürütdüyü siyasət, tutduğu xətt belə idi ki, insanların, cəmiyyətin sağlamlığının alternativi yoxdur, insanların təhlükəsizliyini qorumaq üçün bütün sahələrdə məhdudlaşdırma həyata keçirilə bilər, təki insanları qorumaq mümkün olsun. Artıq islam ölkələri də Azərbaycanın bu təcrübəsindən bəhrələnirlər və bu yöndə işlərini ölkəmizin tətbiq etdiyi prinsiplərə uyğun şəkildə həyata keçirməyə başlayıblar.
Heydər Məscidinin imamı, ilahiyyatçı Hacı Rüfət Qarayev baki-xeber.com-a bildirdi ki, hər bir ölkənin özünün strategiyası var, bizim ölkədə də dövlət-din münasibətləri yüksək səviyyədə tənzimlənir. Hacı Rüfətin qeyd etdiyinə görə, pandemiya dövründə bu cür addımların atılmasında heç bir qərəz yoxdur, burada insan sağlamlığı, insan təhlükəsizliyi hər şeydən üstün tutulduğuna görə belə qərar qəbul edilib. “Məscidlərin, məktəblərin, universitetlərin və digər qapalı məkanların, iri ticarət mərkəzlərinin bağlı olması yalnız insanların sağlamlığının qorunmasına xidmət edir. Təkcə məscidlər qapalı olsaydı, insanlarda müəyyən narazılıqlar yarana bilərdi, amma bu gün təkcə məscidlər deyil, digər qapalı məkanlar da bağlıdır. Ölkəmizdə xəstəliyin yayılma dinamikası nəzərə alınaraq bu addım atılıb. İnşallah, ümid edirik ki, bu xəstəlik tam şəkildə ortadan çıxacaq və bundan sonra məscidlərimiz açılacaq.
Digər ölkələrə gəlincə, həmin ölkələrdə də bu məhdudiyyətlərin tətbiq edilməsi insanlarda bu addımın doğru istiqamətdə atıldığına dair əminlik yaradır. Eyni zamanda, Quranın prinsipi hansısa ölkə üçün nəzərdə tutulmayıb, insanlıq, müsəlmanlar, ümməti Məhəmməd üçün nəzərdə tutulub. Yəni Quran yalnız Azərbaycan, İran, Türkiyə, Səudiyyə Ərəbistanı və sair üçün deyil, bütün insanlıq, bəşəriyyət üçündür. Hətta müsəlman olmayanlar belə, Qurandan müxtəlif ayələri götürüb həyatlarına tətbiq edirlər”.
Hacı Rüfət qeyd etdi ki, bu gün müsəlman aləminin bu yöndə verdiyi qərar tam olaraq dinimizin prinsiplərinə uyğundur. “Bu gün görülən tədbirlər insanların sağlamlığı üçündür. Allah da, Peyğəmbər də bizim sağlamlığımızı istəyir. Bu mənada, görülən tədbirlər təqdirəlayiqdir.
Ümumiyyətlə, islam dini həmrəylik, insanları bir dəyər ətrafında birləşdirən dindir. O zaman insanlar bölünüb parçalanırlar ki, Qurandan möhkəm yapışa bilmirlər. Uca Rəbbimiz Qurani-Kərimdə buyurub ki, camaat olaraq, toplu olaraq Allahın ipindən möhkəm şəkildə yapışın. Biz əgər Qurandan möhkəm yapışırıqsa, bütün məsələlərdə, dini, milli-mənəvi dəyərlərimizdə də hamımız Quranın ətrafında birləşə bilirik. Amma elə ki, Qurandan, Peyğəmbərimizin sünnətindən, Əhli-Beytin yolundan uzaq düşürük, o zaman insanlar fərqli strategiya, mövqe sərgiləyir, fərqli yöndən tutub gedirlər. Amma bu gün Azərbaycan dövləti tərəfindən (QMİ də bu işlərə ciddi dəstək verir) insanların sağlamlığının qorunması naminə belə bir addım atılırsa və bu yöndə İran hökuməti də, digər müsəlman ölkələri də qərarlar qəbul edirlərsə, bu, insanları təhlükədən qorumağa xidmət edən addımdır. Bu da dinimizin bizə tövsiyə etdiyi bir əmrdir” - deyə Hacı Rüfət Qarayev qeyd etdi.
İradə SARIYEVA
