“Almaniyada COVID-19-la mübarizə çərçivəsində 10 min xəstənin məlumatları analiz edilərək xəstəxanadaxili ölüm faizləri 22 faiz olaraq göstərilib”. Bunu Mərkəzi Neftçilər Xəstəxanasının həkim-infeksionisti Fərrux Sədirov Nazirlər Kabineti yanında Operativ Qərargahın son keçirilən brifinqində deyib.
O bildirib ki, yaş qruplarına görə bu ölüm faizləri dəyişməkdədir: “80 yaşın üzərində ölüm faizi 78 faiz, 70-80 yaş aralığında ölüm faizi 27 faiz, 60-70 yaş aralığında 15 faiz, 60 yaşdan aşağı 5 faizdir. Mərkəzi Neftçilər Xəstəxanasında ölüm faizi hazırda 1,2 faizdir. Ümumilikdə, Azərbaycanda COVID-ə yoluxub ölənlərin fazi 1,5-1,6 arasında dəyişir”.
F.Sədirov əlavə edib ki, bu rəqəm İtaliya, Çin, İngiltərə kimi ölkələrlə müqayisədə çox aşağıdır: “Bu, vaxtında görülən tədbirlərin və öyrənilən xarici təcrübələrin nəticəsidir. Bu gün dünya nəyi bilirsə, biz onu bilirik”.
Koronavirusdan vəfat edənlərin statistikasına nəzər salsaq görərik ki, Azərbaycan bu siyahıda ön sıralarda dayanmır. Məlum virusdan vəfat edənlərin sayına görə Çin, Amerika, İtaliya, Almaniya və digər ölkələr ön yerləri tuturlar. Ancaq ölkəmizdə virusdan həyatını itirənlərin sayı Almaniya və digər Avropa ölkələri ilə müqayisədə azdır.
Onu da vurğulayaq ki, bir sıra inkişaf etmiş ölkələrin əhalisinin sayı Azərbaycanla eynidir, amma həmin ölkələrdə virusdan ölənlərin sayı dəfələrlə çoxdur. Məsələn, Belçika əhalisinin sayı Azərbaycan əhalisinin sayı qədərdir. Bu ölkədə koronavirusdan ölənlərin sayı 10 min nəfəri ötüb.
“Azərbaycanda koronavirusdan ölənlərin sayının az olması səbəblərindən biri də...”
Məsələ ilə bağlı fikir bildirən həkim-ekspert Rasif Bağırov qeyd etdi ki, Azərbaycan dünya miqyasında nadir ölkələrdəndir ki, koronavirusa yoluxan bütün xəstələr tibbi müəssisələrdə müalicə alırlar: "Dünya praktikası tam başqadır. Bir çox ölkədə xəstəliyi simptomsuz keçirənlər, xəstəliyə düçar olmuş insanlar ev şəraitində müalicə alırlar, onları heç xəstəxanalara da qəbul etmirlər. Əlbəttə ki, bu, onların sağlamlığına təhlükə yaradır. Azərbaycanda koronavirusdan ölənlərin sayının az olması səbəblərindən biri də məhz odur ki, yoluxmuş bütün xəstələr tibbi müəssisələrə qəbul edilir və onlara lazımi xidmət göstərilir".
Həmsöhbətimiz son 10 gün ərzində yoluxanların sayında müşahidə olunan artıma da münasibət bildirdi: "Son 10 gündə yoluxanların sayında artımın olması bəzi vətəndaşlarımızın məsuliyyət hissinə biganə yanaşmasının nəticəsidir. O insanlar anlamalıdırlar ki, yumşaldıcı addımların atılmasına baxmayaraq, yoluxanların sayı kəskin artarsa, yenidən məhdudlaşdırıcı tədbirlər görüləcək. Unutmayaq ki, Azərbaycan dövləti məhdudlaşdırıcı tədbirlərə getməklə, vətəndaşını, vətəndaşının sağlamlığını iqtisadi gerçəklikdən üstün tutur. Bu baxımdan vətəndaşın da mövcud vəziyyətə münasibəti adekvat olmalıdır”.
Son olaraq bildirək ki, Azərbaycanda virusdan ölənlərin sayının bir sıra ölkələrlə müqayisədə qat-qat az olması görülən kompleks işlərin sayəsində mümkün oldu. Məsələ ondadır ki, virus təhlükəsi ilə bağlı bir sıra qabaqlayıcı tədbirlər görüldü.
Günel CƏLİLOVA
