Azərbaycan Respublikası Nazirlər Kabineti yanında Operativ Qərargah koronavirusla bağlı KİV nümayəndələri üçün brifinq keçirib.
“Trend”in məlumatına görə, brifinqdə Operativ Qərargahın nümayəndələri - TƏBİB-in xəstəliklərin profilaktikası və kontrolu şöbəsinin müdiri Yaqut Qarayeva, Mərkəzi Neftçilər Xəstəxanasınln həkim-infekionisti Fərrux Sədirov, ATU-nun Tədris-Terapevtik Klinikasının reanimasiya şöbəsinin müdiri Emil Qasımov və Cəlilabad Rayon Mərkəzi Xəstəxanasının direktoru Elnur Azadxanov jurnalistləri maraqlandıran suallara cavab verib.
“Yoluxmanın artması yumşalmalarla bağlıdır...”
Yaqut Qarayeva isə bildirib ki, hazırda ölkədə ən çox yoluxma Bakı və Abşerondadır. Onun sözlərinə görə, yoluxma artmaqdadır: "Ölkə üzrə ümumi yoluxmanın 50 faizə yaxını bu ərazilərdədir. Ən çox 50-59 yaş həddində olan insanlar bu virusa daha çox yoluxub. Son həftədə 651 nəfər bu virusa yoluxub. Yoluxmanın artmasına səbəb yumşalmalarla bağlıdır. Amma bu o demək deyil ki, biz bununla razılaşmalıyıq. Hər birimiz qaydalara riayət etməliyik. Maskalardan istifadə vacibdir. Qaydalara riayət etsək yoluxmanın artmasının qarşısını ala bilərik".
Yaqut Qarayeva payız-qış mövsümünə ciddi hazırlığın getdiyini dedi
Yaqut Qarayeva deyib ki, pandemiya bütün dünyada fövqəladə hadisədir. Onun sözlərinə görə, heç bir ölkə bu xəstəliyə hazır deyil: "Bizim bütün həkimlər bu virusa qarşı hazırlanır. Bakıda həkimlərə bununla bağlı seminarlar da ke,irilib. Bütün həkimlər bu işə səfərbər olunub. Biz bu virusa qarşı hazırlaşmaqda davam edirik. Biz payız-qış mövsümünə ciddi şəkildə hazırlaşırıq. Bəzi tibb işçilərinə istirahət verilib ki, qarşıdan gələn mövsümə hazırlıqlı olsunlar. Tibbi heyət bu işdə əlindən gələni əsirgəmir".
Xəstə sayı artarsa, qeyri-koronavirus xəstələri...
“Mart ayından başlayaraq biz bəyan edirik ki, COVİD xəstəliyi sürətlə yayılır və bu da çarpayı çatışmazlığına gətirib çıxara bilər” – deyən Y.Qarayevanın sözlərinə görə, xəstə sayı artarsa qeyri-koronavirus xəstələrinin yerləşdirilməsində problem yarana bilər: "Biz koronavirus xəstələrinin müalicəsinin öhdəsindən gələ bilirik və biz xəstə sayının artmasına baxmayaraq onların yerldirilməsinə də hazırıq. Bunun üçün kifayət qədər çarpayı sayımız və dərman təminatımız da var. Lakin koronavirus xəstələrinin sayının artması qeyri-koronavirus xəstələri üçün çarpayı çatışmazlığına gətirib çıxara bilər".
TƏBİB sərtləşmədən danışmağın tez olduğu qənaətindədir
Y.Qarayeva qeyd edib ki, yumşalmaya mərhələli getməyimiz vəziyyətə nəzarət etməklə bağlıdır. Onun sözlərinə görə, amma bugünki yoluxma sayında artımın olmasının sərtləşməyə səbəb olacağı barədə danışmaq tezdir: "Bu barədə mən heç nə deyə bilmərəm. Sərtləşmə barədə qərarın veriləcəyini deyə bilmərəm. Amma yoluxma sayında nisbətən artım olması yəqin ki müzakirə olunacaq, bu proseslə bağlı hansı qərar qəbul edilərsə, ictimaiyyətə məlumat veriləcək".
Koronavirusdan sağalan 90 nəfər qan vermək üçün müraciət edib
TƏBİB-in şöbə müdiri deyib ki, 90 nəfərə yaxın COVİD-19 xəstəliyindən sağalan şəxs koronavurus xəstələrinə qan vermək üçün müraciət edib. Onun sözlərinə görə, həmin şəxslər yoxlanılıb və 79 nəfərin qan verməsinə icazə verilib: "Həmin şəxslərdən götürülən qanla 231 plazma hazırlanıb. Bu plazmalar 179 xəstənin müalicəsinə istifadə olunub".
İstehsal olunan hər peyvənddən istifadə etmək olmaz
Y.Qarayeva deyib ki, Azərbaycan hazırda peyvənd istehsalı ilə məşğul olan şirkət və beynəlxalq təşkilatlarla danışıqlar aparır. Onun sözlərinə görə, peyvəndin istehsalı asan deyil: "Bu bir məsuliyyətdir. İstehsal olunan hər peyvənddən istifadə etmək olmaz. Bizim üçün peyvəndin hazırlanması əsas deyil, həmin peyvəndin necə təsiridir. Peyvənd xəstəliyi sağaltmaqla yanaşı immunitet yaratmalıdır. Ona görə də bu prosesin tez bir zamanda əldə olunması mümkün deyil".
Azərbaycanda koronavirusdan ölüm faizi açıqlandı - 1.5-1.6 faiz...
Mərkəzi Neftçilər Xəstəxanasının həkim-infekionisti Fərrux Sədirov isə bildirib ki, bugünə qədər Mərkəzi Neftçilər Xəstəxanasında 900-ə qədər koronavirus xəstəsi qəbul olunub. Dünya statistikasından misal gətirən F.Sədirov bildirib ki, fevral-aprel ayrlarında Almaniyada xəstəxanadaxili ölüm faizi 22 faiz olaraq göstərilib. Onun sözlərinə görə, Mərkəzi Neftçilər Xəstəxanasında xəstəxanadaxili ölüm faizi 12 faizdir.
F.Sədirovun sözlərinə görə, Azərbaycanda koronavirus xəstələrinin ölüm faizi 1.5-1.6 faiz arasında dəyişir, digər ölkələrdə bu rəqəm 10-faizdən yuxarıdır: “Bu gün dünya nəyi tətbiq edirsə biz də onu tətbiq edirik, nəyi bilirsə biz də onu bilirik. Bizim ölüm faizimiz dünyada olandan çox aşağıdır”.
Sağlam gənclərin koronavirusdan ölüm səbəbi... virus yükü...
F.Sədirov Azərbaycanda koronavirusdan vəfat edən sağlam gənclərin ölüm səbəbini də açqlayıb. Həkim-infekionist deyib ki, sağlam gənclərin ölüm səbəbləri arasında virus yükü çox önəmlidir.
Onun sözlərinə görə, virus yükü nə qədər çox olarsa, xəstəlik bir o qədər ağır keçir: “İmmun sistemi nə qədər güclü olsa da milyonlarla virus yükü qarşısında aciz qalır və müqavimət göstərə bilmir. Bu səbəbdən digər orqanlar da sıradan çıxır və xəstəlik ölümlə nəticələnir. Bu virus adi qriplə və başqa respirator xəstəliklə müqayisə olunmamalıdır”.
Koronavirusa xas olan əsas əlamətlər hansılardır...
Onun sözlərinə görə, koronavirusun dünyada qəbul olunan əsas əlamətləri qızdırma, quru öskürək və halsızlıqdır. F.Sədirov bildirib ki, daha sonra gələn əlamətlər isə əzələ ağrıları, başağrıları, ürək bulanmaları, mədə-bağırsaq problemləri və digər əlamətlərdir. Onun sözlərinə görə, heç bir şikayət olmadığı halda dad və iy bilmə hissinin birdən-birə itməsi koronavirusa xas olan bir xarakterdir. Hətta bəzi ölkələrdə bu əlamətin olması virusun müsbət olması ehtimal kimi qəbul edilir.
Azərbaycanda 15 minə qədər tibb işçisi koronavirusla mübarizə aparır
Elnur Azadxanov deyib ki, hazırda 15 minə qədər tibb işçisi koronavirusla mübarizə aparır. Onun sözlərinə görə, ümumilikdə 51 xəstəxana koronavirusla mübarizəyə cəlb olunub. Bunlardan 31 hazırda xidmət göstərir. COVİD-li xəstələrin müalicəsində bütün gücü ilə çalışmaqdadır. Bu xəstəxanalar bütün cihazlar və dərmanlara təmin olunub.
ATU-nun şöbə müdiri: “İmmun plazmadan effekt aldğımız xəstələrimiz çoxdur”
ATU-nun Tədris-Terapevtik Klinikasının reanimasiya şöbəsinin müdiri Emil Qasımov isə bildirib ki, immun plazmadan efekt aldığımız xəstələrimiz çoxdur. Onun sözlərinə görə, hər qurtarılan can bizim üçün çox dəyərlidir: “İmmun plazma hələlik dünyada müzakirə mərhələsindədir. Bəzi ölkələr deyir ki, çox effekt ala bilmirik, ancaq Azərbaycanda bizim effekt aldığımız kifayət qədər xəstələrimiz var. Son aylar immun plazmaların istifadəsində heç bir problem olmayıb”.
