Yeni tədris ilinin başlamasına çox az vaxt qalıb. Lakin pandemiya ilə əlaqədar olaraq hələ də orta ümumtəhsil məktəblərində tədrisin hansı variantda həyata keçiriləcəyi barədə rəsmi qərar yoxdur. Pandemiya səbəbindən tədrisin hansı formada başlanmalı olduğuna dair qızğın müzakirələr keçirildiyi, ortada müxtəlif təkliflərin olduğu bir vaxtda digər bir mövzu gündəmə gəlib.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının “Pandemiya şəraitində təhsil sisteminin üzləşdiyi çətinliklər və təhsil prosesinin səmərəli təşkilinə ictimai dəstək” mövzusunda onlayn konfransında Təhsil nazirinin müşaviri Elnur Nəsibov deyib ki, pandemiya dövründə müəllimlərin 37 faizi yaşa görə risq qrupuna daxildir.
Ənənəvi tədrisi bərpa etmək mümkün olarsa, (hələ ki, bu barədə heç bir qərar yoxdur) bu amil onun təşkilinə nə dərəcədə mane ola bilər? 37 faiz az rəqəm deyil. Bu amil ənənəvi tədrisi əngəlləyə bilərmi?
“Həmin müəllimləri aktiv dərs prosesinə cəlb etmək olmaz”
Tanınmış təhsil eksperti Kamran Əsədov qeyd etdi ki, hazırda ölkəmizin ümumi orta məktəb sistemində 151 min müəllim çalışır. “İlk növbədə, hibrid təhsilalma forması qarışıq təhsilalma forması hesab olunur. Belə ki, yalnız ənənəvi formada deyil, eyni zamanda da onlayn şəkildə təhsilalma formasıdır. Dərslərin orta məktəblərdə günlərə uyğun məsafəli keçirilməsi vacibdir. Çünki pandemiya dövründə təhsilin əvvəlki qaydada həyata keçirilməsi mümkün deyil. Burada şagird sıxlığı minimuma endirilməlidir. Bunun üçün isə hibrid təhsil forması tətbiq edilməlidir. Dərslər orta məktəblərdə 1,3, 5, yaxud 2, 4, 6 prinsipi ilə olmalıdır. Belə deyək, 1, 3, 5-ci günlər 1, 3, 5, 7, 9 və 11-ci siniflərdə təhsil alan şagirdlər məktəbə gəlməlidirlər, digər günlərdə isə o biri siniflər. Beləliklə, şagird sıxlığı 50 faiz aşağı düşür”.
K.Əsədov hesab edir ki, pandemiya dövründə müəllimlərin 37 faizinin yaşa görə risq qrupuna daxil olması məsələsinə gəlincə, həmin müəllimlər ənənəvi qaydada keçilən dərslərə deyil, onlayn dərslərə cəlb edilsələr, daha yaxşı olar. “Həmin müəllimləri aktiv dərs prosesinə cəlb etmək olmaz. Ona görə ki, onlar hər gün müəllimlərlə və şagirdlərlə, bir sözlə, kollektivlə ünsiyyətdə olacaqlar. Buna görə də, ən yaxşı halda, yaşa görə risq qrupuna aid olunan müəllimləri onlayn tədrisə cəlb etmək lazımdır. Ənənəvi dərslər isə müəllimlərin işə qəbulundan keçən müəllimlərə həvalə edilməlidir” - deyə K.Əsədov vurğuladı.
İradə SARIYEVA
