Məlum olduğu kimi, Azərbaycanda sərtləşdirilmiş karantin rejimi çərçivəsində avqustun 18-dən etibarən kafe və restoranların açıq havada fəaliyyətinə icazə verilib. Açıq havada kafe və restoranların fəaliyyətinə icazə veriləndən sonra toy məclislərinin elə bu formada keçirilməsi gündəmə gəlib.
Məlumatlara görə, artıq əksər restoranda gizli şəkildə toy məclisi keçirilir. Son günlər Bakının bir neçə məşhur restoranında toy və nişan mərasimləri təşkil olunub. Hətta bəzi müğənnilər də toylarda iştirak edərək mahnı oxuyub, aparıcılıq da ediblər. Restoranların açıq havada fəaliyyətə başlamasından sonra Bakıda 20-yə yaxın toy keçirilib. Təkcə avqustun 20-də paytaxtda 6 toy mərasimi baş tutub. Bu günlərdə “Şeron” qrupu üzvlərinin “Nar&Şərab” restoranında nişan mərasimində aparıcılıq etməsi haqqında da sosial şəbəkədə məlumat yayılıb.
Onu da qeyd edək ki, bəzi müğənnilər şəxsi “İnstagram” hesabından “toylar başladı” deyə paylaşım da edirlər.
Daxili İşlər Nazirliyinin Mətbuat xidmətinin rəisi, polis polkovniki Ehsan Zahidov bildirib ki, bütün bu kütləvi tədbirlər haqqında polisə məlumat daxil olub: “Polis əməkdaşları tərəfindən tədbirin keçirilməsinin qarşısı alınıb. Bunlar, sadəcə, cəhdlərdir, toy mərasimi keçirilməyib”.
Nəzərə almaq lazımdır ki, koronavirus epidemiyası ilə əlaqədar olaraq mart ayından etibarən ölkədə toyların keçirilməsinə qadağa qoyulub. Qadağanın olmasına baxmayaraq, restoranlarda gizli şəkildə toyların keçirilməsi, müğənnilərin də həmin məclisdə iştirak etməsi düzgün deyil.
Onu da qeyd edək ki, hər dəfə karantin rejiminin uzadılması barədə qərar açıqlanan kimi şou-biznes təmsilçiləri toyların keçirilməsinə icazə verilməsi barədə paylaşım edirdilər. Onlar yalnız toydan gəlir götürdüklərini deyirdilər. Hətta bəziləri irəli gedərək karantinin uzadılması qərarının düzgün olmadığını, koronavirusun olmadığını iddia edirdilər. Koronavirus xəstələrini müalicə edən həkimləri təhqir edənlər də az olmayıb. Ancaq müğənnilər unudurlar ki, əhalinin sağlamlığı hər şeydən önəmlidir. Toy-büsat məclislərini koronavirus epidemiyası nə zaman tam şəkildə yox olarsa, o zaman keçirmək olar. Karantin dönəmində insanlar vəfat edən doğmasına belə ehsan vermirlər, onun üçün yas məclisi təşkil etmirlər. Vəzifəsindən asılı olmayaraq, hər kəs koronavirusla mübarizəyə qoşulduğu ərəfədə müğənnilər yalnız qazanclarını düşünürlər.
Aytəkin Kamranqızı: “…orada iştirakdan imtina etməli idi”
Sosioloq Aytəkin Kamranqızı bildirdi ki, karantin dönəmində toyların keçirilməsi düzgün deyil. Rəsmi olaraq toyların keçirilməsinə icazə verilmirsə, hər kəs bu qərara hörmətlə yanaşmalıdır: “Toya dəvət olunan müğənni həmin məclisdə iştirak etmək əvəzinə, toy yiyəsinə, restoran sahibinə toyların keçirilməsinə icazə verilməməsi barədə məlumat verməli və orada iştirakdan imtina etməli idi. Ancaq biz bunun əksinin şahidi oluruq. Müğənnilər böyük həvəslə həmin məclislərdə iştirak edirlər”.
Adil Qeybulla: “Hazırkı şəraitdə toy şənliklərinin keçirilməsinə icazə verilməməlidir”
Həkim-ekspert Adil Qeybulla qeyd etdi ki, hazırkı şəraitdə toy şənliklərinin keçirilməsinə icazə verilməməlidir: “Keçən araşdırmalar və təcrübələr göstərib ki, yoluxmaların çox hissəsi yas mərasimlərində baş verib. Belə ki, toy mərasimlərində kondisioner əvəzinə təbii havalandırma sistemindən istifadə əsas şərtlərdən biri ola bilər. Əks halda, bir insanın xəstə olması kondisionerin dövr etdirdiyi hava sayəsində bütün mərasim iştirakçılarının yoluxmasına səbəb olar”.
Son olaraq bildirək ki, karantin rejimində toy etmək mümkün deyil və bəziləri sadə nikahla kifayətlənməli olub. İzdivaclarına sadə nikahla “hə” deyənlər, sözün həqiqi mənasında, şanslıdırlar. Çünki onlar özəl günündə min bir zəhmətlə qazandıqları pulu hansısa fürsətcil müğənninin cibinə qoymayıblar.
Günel CƏLİLOVA
