Məlum olduğu kimi, pandemiyaya görə toylar qadağan edilib. Hətta belə cəhdləri edənlərin polis bölmələrinə aparılıb, barələrində müvafiq tədbirlərin görüldüyünün də şahidi olduq. Ancaq bir neçə gündür ki, bəzi sabiq və hazırda vəzifə başında olan məmurların öz doğmalarına toy etdiklərinə dair məlumatlar yayılır, hətta bunu təsdiq edən fotolar da paylaşılır.
Toy etdiyi iddia olunan sabiq məmurlardan bəziləri məlumatı təsdiqləyir və bildirirlər ki, ziyafəti restoranda yox, öz bağlarında ediblər. Bizə o da məlumdur ki, Azərbaycandakı bir çox məmurların bağlarının ərazisi və orada qonaq qəbul etmək imkanları restoranlardan da genişdir. Belə olan halda, hansı qaydalara riayət etməkdən söhbət gedə bilər? Onu da bildirək ki, edilən bu hərəkətlər sosial şəbəkələrdə ciddi etirazla qarşılanır. İnsanlar haqlı olaraq belə sual edirlər: belə çıxır ki, imkanlı adamlar qanunları poza bilər?
TƏBİB-in yoluxucu xəstəliklər üzrə işçi qrupunun rəhbəri Vasif Əliyev Bakıda keçirilən toy şənliklərinə münasibət bildirərkən deyib ki, istənilən məkanda keçirilən toy şənlikləri infeksiyanın yayılmasımda ciddi rol oynayır:
"Operativ Qərargahın brifinqlərdə açıqladığı qayda-qanuna əməl olunması tövsiyə olunur. Əks halda bu faktlar qayda pozuntusudur. Buna Operativ Qərargah icazə verməyib, bu sadəcə, insanların qayda-qanuna əməl etməməsidir. Bu hallar ciddi araşdırılmalıdır və belə hal varsa, qanun qarşısında cavab verilməlidir”.
Vasif Əliyev bildirib ki, Operativ Qərargah hər zaman insanlara çağırış edir: "Tövsiyələr verilir ki, maska taxın, sosial məsafəni saxlayın, insanların kütləvi toplaşdığı yerlərə getməyin. Bu, insanların fərdi məsuliyyətindən irəli gəlir. Müvafiq qurumlar bununla bağlı araşdırmalar aparmalıdır”.
Sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, davranışları ilə xalqa örnək olmalı sayılan adamlardan belə addımları görmək çox narahatedicidir:“Sosial şəbəkələrdə yayılan videoları mən də izləmişəm. İş burasındadır ki, həmin tanınmış adamlar qanun pozuntusu etdiklərini öz dilləri ilə təsdiqləyirlər. Güya toyu restoranda deyil, bağda etməklə qayda pozulmur? Hətta sabiq deputatlardan biri çəkinmədən deyir ki, cəmi 150 nəfər çağırmışam. Bizə 5-6 nəfərin bir yerə toplaşması tövsiyə edilmirsə, 150 adamla toy etməyə hansı adı vermək olar? Operativ Qərargahın hökumətlə razılaşdırılmış qərarlarında kütləvi tədbirlər və toyların keçirilməsinə birmənalı icazə verilmir. Hansısa sabiq və ya indiki məmur bu qaydaları pozursa, bir neçə istiqamət üzrə xətaya yol verir. Birincisi, belə qayda pozuntusuna görə hüquqi məsuliyyət nəzərdə tutulur. İkincisi, bu yalnız Operativ Qərargaha deyil, bütün dövlətin qanunlarına edilən hörmətsizlikdi. Üçüncüsü isə, bu adamlar Azərbaycandakı ictimai rəyə saymazlıq ortaya qoyurlar. Necə ola bilir ki, hətta dəvətnaməsi paylanan adamlar 6 aydır qaydalara əməl edib toyunu təxirə salıb, kiminsə geniş bağı var deyə istədiyini etməlidir? Siz fikir verirsiniz ki, ictimai rəy bu hörmətsizliyi necə qəzəblə qarşılayır? Hesab edirəm ki, əlaqədar qurumlar bütün bu faktlarla bağlı ciddi araşdırma aparmalı və həmin adamlar qanunauyğun şəkildə cəzalarını alamlıdır. Qanun hamı üçün ali olmalıdır. Belə faktların cəzasız qalması sadə vətəndaşların hökümətə olan inamını sarsıdır. Ölkənin rəhbərliyi pandemiya ilə bağlı bütün qaydalara əməl edirsə, hansısa eks və ya indiki məmurun nə haqqı var ki, özünə imtiyaz tanısın? Tibbi cəhətdən də deyə bilərik ki, belə toplantıların ümumi vəziyyətə təsiri ola bilər. Hansısa məmurun kefinə görə niyə pandemiyanın yayılma sürəti genişlənməlidir? Özü də bu hallarla bağlı qəbul ediləcək qərarlar ictimailəşməlidir ki, digərləri onların yolunu getməkdə maraqlı olmasınlar”.
Doğrudan da, qanuna hamı eyni qaydada riayət etməlidir. Kimsə dəbdəbəli bağını restorana çevirirsə, birmənalı şəkildə qanunu pozmuş olur.
Məhəmmədəli QƏRİBLİ
