Koronavirus pandemiyası ilə əlaqədar Azərbaycanda da turistlər səyahətdən imtina etdilər. Məlum səbəblə bağlı təyyarə biletlərini geri qaytarmaq üçün turizm şirkətlərinə müraciət olundu. Təbii ki, ödədikləri vəsaiti geri tələb edirlər. Artıq 6 aya yaxındır ölkədə karantin rejimi qüvvədədir. Buna baxmayaraq, hələ də təyyarə reysləri təxirə salınan vətəndaşların vəsaiti geri qaytarılmayıb.
Yaranmış vəziyyət turizm şirkətlərini də çıxılmaz vəziyyətdə qoyub. Çünki turizm şirkətləri müştərilərin geri qaytardığı uçuş biletlərinin pulunu aviaşirkətlərdən ala bilmirlər. Turistlər isə ödədikləri vəsaiti tam şəkildə tələb edirlər.
“Azərbaycan Hava Yolları” QSC-nin (AZAL) və onun törəmə strukturu “Buta Airways” şirkətinin koronavirus (COVID-19) pandemiyası ilə əlaqədar ləğv olunmuş reyslərinə bilet alanlar hələ də pulunu geri götürə bilməyiblər.
Aviaşirkət vətəndaşların pullarını qaytarmaqdan imtina edir, müştərilərə yalnız aviabiletlərin ödənişsiz qaydada yenidən təxsis edilməsini və yaxud aviabiletlərin dəyəri qədər vauçerlərin verilməsini təklif edir.
AZAL-ın geri ödənişdən imtina etməsi insanların narazılığına səbəb olub. Artıq bu narazılığı sosial şəbəkələrdə hiss etmək mümkündür. Məsələn, Rüstəm Rüstəmov adlı bir şəxs yazır: “Martın 18-nə Bakı-Moskva aviareysi üçün 3 ədəd bilet almışdım və 28 min rubl (700 manat) pul ödəmişdim. Artıq 5 aydır AZAL mənim pulumu geri qaytarmır. Buna nə ad vermək olar? Artıq 3-cü gündür yazdığım ismarıcı da cavablandırmırlar. Zəng etdim, 34 dəqiqə ərzində zəngimə cavab verən olmadı. Belə çıxır ki, AZAL “ölən dirilmir” prinsipi ilə işləyir”.
Məlumat üçün onu da qeyd edək ki, AZAL-dan fərqli olaraq, əksər xarici aviaşirkət biletlərin pullarını geri qaytarıb. Məsələn, Macarıstanın “WizzAir” şirkəti Azərbaycan vətəndaşlarına Bakıdan və Gürcüstanın Kutaisi şəhərindən uçuş üçün aldığı biletlərə görə çoxdan geriyə ödəniş edib. Ancaq AZAL isə oxşar addımı atmağa həvəsli görünmür.
“…istehlakçı hüququnun pozulması deməkdir”
“Azad İstehlakçılar Birliyi”nin sədri Eyyub Hüseynov bildirdi ki, AZAL-ın vətəndaşların pullarını qaytarmaması istehlakçı hüququnun pozulması deməkdir: “Bu, istehlakçıların hüquqlarının kobud şəkildə pozulmasıdır. Aviaşirkət vətəndaşların pullarını mütləq geri qaytarmalıdır. Çox təəssüf ki, Azərbaycanda beynəlxalq sənədləri ortaya qoyaraq, AZAL-ı “yerində otuzduracaq” peşəkar hüquqşünaslar yoxdur. Bununla belə, insanları İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə və yaxud bizə ərizə ilə müraciət etməyə çağırıram”.
Görünən odur ki, AZAL vətəndaşların pulunu geri qaytarmaq niyyətində deyil. Qeyd olunan qurum pul əvəzinə vətəndaşlara vauçerlərin verilməsini təklif edir. Ancaq vətəndaş bilet üçün ödədiyi pulu geri tələb edir. Təbii ki, bu onun haqqıdır.
Günel CƏLİLOVA
