Ölkəmizdə karantin rejiminin yumşaldılması ilə əlaqədar olaraq bir neçə istiqamətdə açılımlar olub. Bu, respublikamızda fəaliyyət göstərən kafe və restoranlara da şamil edilib. Avqustun 18-dən restoran və kafelər açıq havada fəaliyyət göstərməyə başlayıb.
Kafe və restoranlarda sanitar-gigeyenik qaydalara, karantin rejiminin tələblərinə hansı şəkildə əməl edilməsi ilə bağlı araşdırmalar, yoxlamalar aparılır, reydlər keçirilir. Təəssüf ki, bəzi restoran və kafelərin bu tələblərə əməl etmədiyi faktları da aşkarlanır. Doğrudur, bu istiqamətdə bütün normalara əməl edən kafe və restoranlar da var. Amma onların arasında qaydaları pozanların olması da diqqəti çəkir.
Paytaxtın Sabunçu rayonunda xüsusi karantin rejimi qaydalarına əməl etməyən, müəyyən olunan vaxtdan kənar, sanitar-epidemioloji normaların pozulması ilə müşayiət olunan restoran və kafelər aşkarlanıb.
DİN Mətbuat xidmətindən baki-xeber.com-a bildirilib ki, Sabunçu Rayon Polis İdarəsinin 13-cü və 15-ci Polis bölmələrinin əməkdaşlarının keçirdikləri müvafiq tədbirlərlə müəyyən olunan vaxtdan kənar, Bakıxanov qəsəbəsindəki bir restoranın qapalı zallarında 30 nəfər, Zabrat qəsəbəsindəki iki kafedə isə 8 nəfər müəyyən olunub.
Əsasən restoran və kafelərin qapalı zal və kabinetlərində sanitar-epidemioloji normaları pozan 38 nəfər müvafiq polis idarəsinə dəvət olunaraq, barələrində qanunvericiliyə uyğun tədbirlər görülüb. İnzibati Xətalar Məcəlləsinin 211-ci maddəsi ilə hər biri barəsində protokol tərtib olunub.
Mövcud qayda və tələblərlə bağlı sahibkarlıq subyektlərinin rəhbərləri və xidmət personalları zəruri sosial davranış qaydaları və sanitar-epidemioloji normalarla bağlı məlumatlandırılıb.
İctimai iaşə sektorunda açıq hava sahələrində müştərilərə xidmətin həyata keçirilməsi zamanı epidemiya əleyhinə rejimin, sanitariya-gigiyena və karantin qaydalarının tələblərinə ciddi əməl olunmasına nəzarət davam etdirilir.
“Düşünürdüm ki, pandemiya bizim sahibkarlarda və istehlakçılarda yeni davranışlar formalaşdırıb, restoranlar, kafelər açılandan sonra...”
“Azad İstehlakçılar Birliyi”nin sədri Eyyub Hüseynovun fikrincə, restoran və kafelərdə sanitar-epidemioloji qaydalara riayət edilməməsi, karantin rejiminin tələblərinin pozulması yoluxma hallarının artmasına səbəb ola bilər. E.Hüseynovun sözlərinə görə, bu gün ona bəzi rayonlardan da zəng edilib və bildirilib ki, əhali kafe və restoranlara axışır, restoranların, kafelərin isə çoxunda karantin qaydaları kobud şəkildə pozulur: “Restoran və kafelərin yeni açılmasına baxmayaraq, onların bəzilərinin fəaliyyətində koronavirus risqini artırmağa səbəb ola biləcək hallar baş verir. Bu gün bu məkanlara gedən insanların sayı çoxdur və get-gedə də intensivliyin artacağı gözlənir. Düşünürdüm ki, pandemiya bizim sahibkarlarda və istehlakçılarda yeni davranışlar formalaşdırıb, restoranlar, kafelər açılandan sonra onlar çox nümunəvi davranışlar sərgiləyəcəklər, amma əksini gördüm. Sözün düzü, pandemiyanın sahibkarlarda yeni biznes əxlaqının, davranışlarının yaranmasına səbəb olacağını düşünürdüm. Lakin çox təəssüf ki, bu belə olmadı və bu sahədə vəziyyət elə də ürəkaçan deyil. Doğrudur, bəzi istehlakçıların, sahibkarların davranışlarında müsbət dəyişikliklər var, amma kifayət qədər deyil. Kafe və restoranların fəaliyyətinə açıq şəraitdə icazə verilsə də, təəssüf ki, onların bəziləri qaydaları pozaraq, müştəriyə qapalı məkanda xidmət göstərirlər. Əslində, burada müştərinin də təqsiri var, o da bilərəkdən qaydaların pozulmasına göz yumur”.
Hazırda bu istiqamətdə polislə yanaşı, Qida Təhlükəsizliyi Agentliyinin (AQTA) reydlər keçirdiyini qeyd edən E.Hüseynovun sözlərinə görə, AQTA-nın insan resursları kifayət qədər olmadığı üçün bu prosesdə ictimai nəzarət də həyata keçirilməlidir. “Cənab Prezident dəfələrlə çıxışlarında ictimai nəzarətin gücləndirilməsi ilə bağlı çağırışlar edib. Prezidentin bu çağırışlarına bütün cəmiyyət adekvat cavab verməlidir. Ağsaqqallar, ictimai xadimlər, QHT-lər də bu prosesdə könüllü iştirak etməlidirlər. Burada “Azad İstehlakçılar Birliyi”nin də böyük günahı var ki, bizim 24 rayonda nümayəndələrimizin olmasına baxmayaraq, bu istiqamətdə fəal iş aparmamışıq. Hesab edirəm ki, hər bir vətəndaş, ictimai xadim, QHT və sair nümayəndələri də polisə və AQTA-nın işinə dəstək olmalıdır. Restoranlar və kafelərə əlaqədar qurumlarla yanaşı, güclü ictimai nəzarət olmasa, koronavirus daha da artacaq. Sahibkarlar da öz məsuliyyətlərini anlamalı, onlar və istehlakçılar dövlətin bütün çağırışlarına əməl etməli, yerli və dünya təcrübəsinə uyğun olaraq, davranışlar nümayiş etdirməlidirlər” - deyə müsahibimiz bildirdi.
İradə SARIYEVA
