Ümumdünya Səhiyyə Təşkilatı (ÜST) dünyaya müraciət edərək, yeni koronavirus infeksiyasına görə daha karantin tətbiq etməməyə çağırıb, baxmayaraq ki, əvvəl bunun əksini tələb edirdi. Uzun müddətdir ÜST dünyanın, demək olar ki, bütün ölkələrinə pandemiyanın inkişafını yüngülləşdirən sərt karantin rejiminə bağlanmağı tövsiyə edirdi. Budur, indi təşkilatın baş epidemioloqu Maria van Kerkxov ikinci və sonrakı COVID-19 dalğalarında karantinin yolverilməz olduğunu bəyan edib.
“Demə, karantinin iqtisadi nəticələri dəhşətli dərəcədə çoxdur və tibbi planda şərti qazancı xeyli üstələyir. İkincisi, ÜST ekspertlərinin fikrincə, pandemiya dövründə maska geyilməsi və sosial məsafəyə riayət olunması tamamilə kifayətdir”, - deyə “Medikforum” yazır.
Bundan başqa, BMT-nin rəhbəri Antoniu Quterriş karantin dövründə məktəblərin bağlanmasını “nəsillərarası fəlakət” adlandırıb və bunun heç bir müsbət nəticə vermədiyini bildirib. Mütəxəssislərin sözlərinə görə, həkimlər məhdudiyyətlərə görə insult, xərçəng və infarkt xəstələrini buraxıblar. Beləliklə, karantin həm də bəzi xəstəlikləri kəskinləşdirə bilər.
Maraqlıdır, karantin rejiminin tətbiq edilməməsi koronavirusla mübarizədə necə effekt verəcək?
“…Operativ Qərargah tərəfindən verilən tövsiyələrə əməl etsək, yoluxmaların sayı o qədər də yüksək olmaz”
ÜST-in yeni qərarı ilə bağlı fikir bildirən baş infeksionist Cəlal İsayev bildirdi ki, məlum fikirləri Ümumdünya Səhiyyə Təşkilatından öncə o, dilə gətirib: “İstər sərt karantin rejimi olsun, istərsə də yumşaldılmalar, biz Operativ Qərargah tərəfindən verilən tövsiyələrə əməl etsək, yoluxmaların sayı o qədər də yüksək olmaz. Düzdür, qaydalara əməl etməyənlərə görə yoluxmalar artsa da, bu o qədər də yüksək olmayacaq. Sevindirici haldır ki, insanlarımızın çoxu maskadan istifadə edir, sosial məsafəni qoruyur, sanitar-gigiyenik qaydalara əməl edir. Təəssüf ki, qaydalara əməl etməyənlər də var. Onların hesabına yoluxanlar olur.
Bu nöqteyi-nəzərdən düzgün fikirdir ki, karantin rejimi olsa da, olmasa da, xəstələnmə halları baş verəcək. Tövsiyələrə əməl olunarsa, yoluxma sayı qatbaqat aşağı düşəcək. Yoluxma sayı aşağı düşərsə, normal həyatımıza da tez qayıda bilərik”.
C.İsayev hesab edir ki, ÜST-in tövsiyələrini hər bir ölkə öz xüsusiyyətlərinə uyğun tətbiq edə bilər: “Bizim ölkədə də vəziyyətə uyğun olaraq ÜST-in tövsiyəsinə baxıla bilər. Mən bu məlumatı oxumamışam. Ola bilər ki, mətbuatda yayılan xəbər doğru olmasın. Əgər həqiqətən belə bir tövsiyə olarsa, Operativ Qərargah, Səhiyyə Nazirliyi, TƏBİB və bu məsələdə mütəxəssislərimiz öz fikirlərini deyə bilərlər.
Nəzərə almaq lazımdır ki, bu gün yoluxanların sayı 600-dən 135-ə düşdü. Əgər qaydalara əməl etməsək, yoluxanların sayı yenidən qalxacaq. Çünki hələ bu epidemiya sönməyib. Bu xəstəliyi sağlam gəzdirənlər var. Avropa dövlətlərində, eləcə də qardaş Türkiyədə yoluxanların sayı çoxalır. Amma bizdə yoluxanların sayı müsbət dinamikadadır. Bu rəqəmlərin düşməsini və stabil saxlanmasını istəyiriksə, qaydalara əməl etməliyik".
Həmsöhbətimizin dediyindən belə aydın oldu ki, Ümumdünya Səhiyyə Təşkilatının karantinin ləğv edilməsi ilə bağlı çağırışı mərhələli şəkildə həyata keçirilə bilər.
Günel CƏLİLOVA
