Bu gün tarixçi alim, tarix elmləri doktoru, ATMU “İctimai fənlər” kafedrasının professoru Məhərrəm Zülfüqarlının 65 yaşı tamam olur.
O, 19 avqust 1955-ci ildə Azərbaycan Respublikası Ucar şəhərində anadan olub. Ucar şəhər 2 saylı orta məktəbini, BDU-nun tarix fakültəsini və aspiranturasını bitirib. 1990-cı ilədə tarix elmləri namizədi alimlik dərəcəsini, 2010-cu ildən dosent elmi adını, 2018-ci ildə tarix üzrə elmlər doktoru alimlik dərəcəsini alıb.
Əmək fəaliyyətinə dövlət təyinatı ilə Saatlı rayonu Nərimankənd orta məktəbində müəllim kimi başlayıb. Müxtəlif vaxtlarda Azərbaycan Neft və Kimya İnstitutunun Sumqayıt filialında (hazırda SDU), Bakı Dövlət Universitieti, Bakı Biznes Universiteti, Azərbaycan Pedaqoji Universitetində dərs deyib. Hazırda Azərbaycan Turizm və Menecment Universitetində (ATMU) işləyir. Uzun müddət həmin universitetin Elmi katibi olub.
Azərbaycan, ingilis, fransız, rus və fars dillərində 153 elmi əsərin, o cümlədən 2-si dərslik olmaqla 63 kitab, 81 elmi məqalə, 9 medoki iş, həmçinin 600-dən artıq qəzet məqaləsinin müəllifidir. Uzun müddət “Bakı xəbər”,“525-ci qəzet”, “Ədalət”, “Şərq”, “Üç nöqtə” və digər qəzetlərdə köşə yazıları, məqalə və müsahibələri dərc olunub.
Azərbaycan Jurnalistlər Birliyinin üzvü, “İctimai Problemlərin Tədqiqi Assosiyasiyası”nin sədri,“Azərbaycanda Vətəndaş Cəmiyyətinin İnkişafına Yardım Assosiasiyası” Seçki Qərargahının rəhbəri, Millli QHT Foruumunun İdarə Heyətinin üzvüdür. ABŞ Respublikaçılar İnstitutunun Seçki Kampaniyası Akademiyasının məzunudur.
ABŞ, Almaniya, Belçika, İsveç, Türkiyə,Quzey Kıpris, İran, Bolqarıstan,Polşa, Rusiya,Gürcüstan və digər ölkələrdə keçirilmiş konfranslarda iştirak edib. O, həmçinin 1999-cu ildə Bolqarstanda keçirilmiş bələdiyyə seçkilərini müşahidə edən nümayəndə heyətini üzvü olmuş, 2007-ci ilin oktyabrında Bolqarstanda nüfuzlu “Balkan siyasi klubu”nun toplantısında, 2007-ci ilin dekabrında ABŞ senatı, konqresi, müxtəlif İnstitut və fondlarında təcrübə mübadiləsində, 2012-ci ilin mart ayında Belçika parlamentində “Qarabağ probleminə aid dinləmələr”də iştirak edib, 2013-ci ilin fevralında Almaniyanın Berlin, Frankfurt və Hamburq şəhərlərində Azərbaycan və Türkiyə Diasporlarının Xocalı faciəsinin ildönümü münasibəti ilə təşkil etdiyi tədbirlərdə məruzələrlə çıxış edib. Bundan başqa, Türkiyənin Samsun şəhərində 2010-cu ilin iyun ayında “Qara dəniz” ölkələrində türizmin inkişaf perspektivləri” mövzusunda keçiriən beynalxalq tədbirdə Azərbaycanı təmsil edib.
“Azərbaycan Xalq Cümhuriyyətinin 100 illiyi (1918-2018)” yubiley medalı, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının, Millli QHT Forumunun İdarə Heyətinin, Azərbaycan Turizm və Menecment Universiteti Rektorunun Fəxri Fərmanları, Şah İsmayıl Xətainin fəaliyyətinə həsr olunmuş beynəlxalq elmi konfransın (İİR Ərdəbil şəhəri 06 Avqust 2014) qızıl nişanı, stolüstü medalı ilə təltif olunub.
Nəsil şəcərəsi
Ata babası Zülfüqar Məmməqulu oğlu və nənəsi Nübar Sadıxova XX əsrin 20-ci illərində Cənubi Azərbaycanın Qaradağ vilayətinin Sumbulan kəndindən gələrək Ucarda məskunlaşıblar.
Ana babası Mirzəqulam Bağırov və nənəsi Sona Bağırova Bakının Buzovna kəndinin sakini kimi 30-cu illərdə repressiyalara məruz qalıb, mülkləri əlindən alınaraq “Çiçək” pioner düçərgəsinə çevrilib.
Atası Paşa Zülfüqar oğlu Məmmədov Böyük Vətən müharibəsinin iştirakçısı, “İgidliyə görə” və “Döyüş rəşadəti” medalları ilə təltif olunub, 1943-cü ildə müharibədə aldığı yaralardan Buzovnada hospitalda müalicə alarkən evlənib və 1944-cü ildən yenidən döyüşən orduya qayıdıb. 1958-ci ilin may ayında Ucar-Göyçay yolunda avtomobil qəzası nəticəsində vəfat edib.
Anası- Bağırova Xanımana 6 övladını təkbaşına böyüdərək, hamısına yüksək təhsil verib. Onun “Ana duyğuları” adlı şeir kitabı və “Sirli, sehrli Buzovna” adlı xatirələr kitabı nəşr olunub.
Məhərrəm Zülfüqarlının iki övladı, iki nəvəsi var.
