Bu gün ölkəmizin hər yerində yeni memarlıq abidələri yaradılır, parklar və xiyabanlar salınır, şəhərsalmanın müasir nümunələri tətbiq edilir. Yay aylarında məzuniyyət və istirahət günlərini səmərəli keçirmək üçün kimi ölkəmizin bölgələrində təbiətin qoynunda fəaliyyət göstərən istirahət yerlərinə, kimi sanatoriya və müalicəxanalara, hətta xarici ölkələrə, uzaq şəhərlərə gedirlər.
Paytaxtımız bu gün özünəməxsus yaşıl parklar, bağlar şəhəridir. Dənizkənarı Milli Park, Filarmoniya bağı, Fəvvarələr meydanı, Zabitlər parkı, Sahil bağı, Xaqani bağı, Səməd Vurğun bağı, Zorge parkı, “Koala Park” əyləncə mərkəzi, Dədə Qorqud parkı, Qış parkı, Ümummilli lider Heydər Əliyevin adını daşıyan çoxsaylı park, akademik Zərifə Əliyeva adına park və digər istirahət məkanlarının sayı kifayət qədərdir. “Sovetski” adlandırılan ərazidə, köhnə, yöndəmsiz evlərin sökülərək yerində – 20 hektar ərazidə salınmış abad park həm quruluşuna, yerləşdiyi əraziyə, həm də dizaynına görə görənləri heyran edir. Heydər Əliyev Mərkəzinin, Konqres Mərkəzinin önündə, vaxtilə Səttarxan zavodunun yerində, 20 hektar ərazidə salınmış park da göz oxşayır, şəhərə xüsusi yaraşıq verir. Son beş ildə Prezidentin təşəbbüsü ilə Bakıda çoxsaylı park salınıb. Ümumilkdə, bütün parkların açılışında şəxsən Prezident İlham Əliyev iştirak edib. Bunun sayəsində Bakı və onun ətraf qəsəbələri gündən-günə gözəlləşir, abadlaşır, insanların sosial şəraitinin hərtərəfli təmini və istirahətlərinin mənalı keçməsi üçün lazımi infrastruktur yaradılır. Son beş ildə Bakı və onun ətraf qəsəbələrində 65 yeni mədəniyyət və istirahət parkı salınıb. Bununla yanaşı, ötən 5 il ərzində 100-dən çox park əsaslı təmir olunub. Ən çox Yasamal, Binəqədi və Xətai rayonlarında istirahət parkları salınıb.
Bütövlükdə, son illər açılan yeni parklar Bakının sosial-ekoloji durumunda nəyi dəyişib? Ümumən bunun əhəmiyyətini ekspertlər necə dəyərləndirirlər?
“Ən başlıcası, bunun Bakının ekoloji vəziyyəti üçün faydası böyükdür”
Məsələyə münasibət bildirən ekspert Rəsul Cahangirlinin sözlərinə görə, Prezidentin təşəbbüsü ilə salınan yeni-yeni parklar Bakının simasını dəyişib: “Bütün mənalarda bunun faydası var. Salınan yeni paklar sayəsində Bakı daha da gözəlləşib. Məsələn, son illər yeni salınan Qış parkı ərazisinə görə ən böyük parkdır. İnsanlar bu parkda istirahət edir, asudə vaxtlarını şən keçirirlər. Yasamal rayonunda salınan meşə tipli parklar seçilir. Ölkə başçısının təşəbbüsü ilə salınan parkların böyük əhəmiyyəti var. Bunun sayəsində insanlar istirahət edirlər. Ən başlıcası, bunun Bakının ekoloji vəziyyəti üçün faydası böyükdür. Nəzərə almaq lazımdır ki, Bakı küləklər şəhəridir. Son illər əhalinin kəskin artması yaşıllıqlara olan tələbatı artırıb. Havanın tənzimlənməsi baxımından sözügedən parkların rolu böyükdür”.
Ekspertin fikrincə, biz mövcud və yeni salınan parkları daha yaxşı qorumalıyıq. Çünki ekoloji baxımdan bu çox vacib məsələdir.
Vidadi ORDAHALLI
