Məzmunundan asılı olamayaq, ciddi və gərəkli bir işin lağlağıya çevrilməsi müsbət qəbul edilmir. Xüsusən də insanların əsəblərinin tarıma çəkildiyi, psixoloji gərginlik keçirdiyi pandemiya dövründə. Bu gün dövlət pandemiya ilə mübarizə çərçivəsində ən müxtəlif tədbirlər keçirir. Məqsəd də insanları koronavirusun cəngindən xilas etməkdir.
Karantin rejiminin idarə olunmasını həyata keçirən, karantinin sərtləşdirilməsi, yaxud yumşaldılması barədə epidemioloji vəziyyətə uyğun qərarlar qəbul edən Nazirlər Kabineti yanında Operativ Qərargahın fəaliyyəti, bu qurumda təmsil olunan təşkilatların rəhbərləri və təmsilçilərinin fəaliyyətinin qaralanması, əlbəttə, yolverilməzdir.
Operativ Qərargah fəaliyyətə başladığı gündən indiyə qədər orada təmsil olunan insanların mənfi obrazını əks etdirən videoroliklər, “prikol” videoları yayılmaqdadır. Bu rolikləri hazırlayanlar guya bunu satirik nöqteyi-nəzərdən etdiklərini, insanlarda “gülüş yaratmaq” istədiklərini qeyd edirlər. Müxtəlif xarici filmlərin personajlarının görüntülərindən istifadə etməklə və o kadrlara xüsusi hazırlanmış mətnlər, səsləndirmələr əlavə etməklə Operativ Qərargahın təmsilçilərinin “dili ilə danışırlar”. Hətta bu videoçarxlarda faşizm lideri Adolf Hitlerin də görüntüsünü əks etdirən kadrlardan istifadə edilib. Bu şəxslər həmin süjetləri hazırlayaraq sosial şəbəkələrdə, “YouTube” kanalında yayımlayırlar.
Bu gün Operativ Qərargahın iclaslarından satirik süjetlər hazırlayan bloger də məlumdur.
Bütün hallarda, bu cür videoroliklərin “satira” adı altında ictimaiyyətə təqdim edilməsinin özü cəmiyyətdə birmənalı qarşılanmır. Operativ Qərargahın verdiyi qərarlara bu cür qeyri-ciddi don geydirməsinə münasibət birmənalı deyil. Ən azından, bu, xalqın, dövlətin taleyi ilə bağlı mühüm qərarlar qəbul edən bir quruma qarşı qarayaxmadır.
Yadınıza salaq ki, bir müddət əvvəl də koronavirus infeksiyasının özündə “yalan olması”nı əks etdirən kiçik prikol videoları yayılırdı və bəzi vətəndaşlar da bu roliklərin mahiyyətinə varmadan onları təbliğ edirdilər.
Ekspertlər qeyd edirlər ki, “satira” adı altında təqdim edilən belə videoroliklər, əslində, Operativ Qərargahın işinə inamsızlıq aşılayır. Onların fikrincə, xalqın, dövlətin inamını qazanan və bu istiqamətdə yorulmadan fəaliyyət göstərən Operativ Qərargahla bağlı belə “satirik” süjetlərin çəkilməsi ilk baxışdan keçici təsir bağışlasa da, əslində, heç də belə deyil. Belə “satirik” videoçarx çəkənlər xalqda inamsızlıq yaratmaqla yanaşı, həm də bununla obrazlar məntiqsiz gülüş yaratmaq istəyirlər. Hər şeyin bir məntiqi olmalı olduğunu deyən ekspertlər hesab edirlər ki, belə videoçarxların sosial mediada, kütləvi informasiya vasitələrində, “Youtube”də yayımlanması müsbət hal deyil.
Bunu Azərbaycan hökumətinin pandemiya ilə mübarizə tədbirlərinə təxribat kimi qiymətləndirən Milli Qeyri-Hökumət Təşkilatları Forumunun rəhbəri Rauf Zeyni “Bakı-Xəbər”ə bildirdi ki, belə videoçarx çəkənlərin məqsədi görülən işlərə kölgə salmaq və əhalidə inamsızlıq, ümidsizlik yaratmaqdır. R.Zeyni hesab edir ki, bu məsələdə Operativ Qərargahın seçilməsi və onun barədə bu cür “satirik” videoçarxlar çəkilməsi təsadüfi deyil. “Ümumiyyətlə, Nazirlər Kabineti yanında Operativ Qərargah cənab Prezident tərəfindən pandemiya ilə mübarizəyə görə yaradılıb. Bilirik ki, dövlət pandemiyanın qarşısının alınması üçün bütün mümkün imkanlarını səfərbər edib. Təbii ki, iş olan yerdə nöqsanların, müəyyən problemlərin olması qaçılmazdır. Bu nöqsanların aradan qaldırılmasında da həm vətəndaş cəmiyyəti, həm qeyri-hökumət təşkilatları, həm media, həm sosial şəbəkə istifadəçiləri, həm də ziyalılar yaxından iştirak edirlər. Sadə vətəndaşlardan tutmuş, həkimlərə, mütəxəssislərə qədər hər kəs öz təkliflərini verir. Bütün bunlar Operativ Qərargahın öz işini daha mükəmməl, daha peşəkar səviyyədə təşkil etməsi üçün böyük faydaya malikdir.
Əlbəttə, tənqidlə bağlı belə bir fikir var: “İşləməyəni, fəaliyyəti olmayanı heç kəs tənqid etmir”. Demək, Operativ Qərargah fəaliyyət göstərir ki, onun fəaliyyəti ilə bağlı müxtəlif fikirlər yaranır. Təbii, pandemiya, eləcə də bir müddət əvvələ qədər ölkəmizdə mövcud olan sosial təcrid insanların psixologiyasına mənfi təsir edib. Biz bunu sosial şəbəkələrdə də müşahidə edirik.
Bu videoçarxları çəkib adını “satirik prikol” qoyanların, əslində, hədəfi Operativ Qərargah deyil, Azərbaycan hakimiyyətidir. Bu adamlar dövlətimizin həyata keçirdiyi uğurlu antipandemiya siyasətinə qara yaxmaq, onu gözdən salmaq məqsədi güdürlər. Onlar bu qara niyyətlərini həyata keçirmək üçün Operativ Qərargahdan, QHT-lərdən, mediadan və sair mövcud elementlərdən istifadə edirlər, dövlət hakimiyyətinin fəaliyyətinə, gördüyü işlərə mənfi təsir göstərmək, ona kölgə salmaq istəyirlər. Burada da məqsəd əhalidə inamsızlıq yaratmaq, onların narahatlığını artırmaqdır. Bu isə yolverilməzdir. Qara piar kampaniyası aparanlar dövlətin gördüyü işlərə kölgə sala bilməz. Dövlət qurumunun fəaliyyətini məshəkəyə, lağlağıya çevirmək həyat kredosu deyil, bunun üçün yaşamağın mənası yoxdur” - deyə R.Zeyni bildirdi.
Ekspertin fikirlərindən belə qənaətə gəldik ki, sözügedən videoçarxları çəkən adamların məqsədi dövlətin antipandemiya siyasətini əhalinin gözündən salmaq və əhalidə bu tədbirlərin perspektivinə inamsızlıq yaratmaqdır. Bununla belə, ekspert hesab edir ki, onların bu cəhdləri alınmayacaq.
İradə SARIYEVA
