Ölkəmizdə karantin tədbirləri zəifləyir və tədricən mart ayından bəri dondurulmuş sahələrdə işləyənlər ənənəvi iş ahənginə qayıdırlar. Biz xüsusilə çoxdan boş-bekar qalan otel biznesindən bəhs edirik. Tezliklə onların fəaliyyəti bərpa ediləcək, amma yeni qaydalarla.
Bu yaxınlarda Nazirlər Kabineti "Koronavirus (COVID-19) pandemiyası zamanı Azərbaycan Respublikasında otellərin fəaliyyətinin təşkili Qaydaları"nın təsdiq edilməsi barədə qərar qəbul etdi. 80-dən çox nömrəsi olan otellərdə operativ nəzarət qrupu yaradılacağı, digər otellərdə isə operativ nəzarətə cavabdeh bir şəxsin təyin olunacağı bildirilir.
Bundan əlavə, otellər sosial məsafənin qorunmasını təmin etmək üçün qəbul etdikləri qonaqların sayını tənzimləməlidirlər. Qonaqlara rezervasiyalarını cərimə sanksiyaları tətbiq edilmədən ləğv etmək imkanı vermək də tövsiyə olunur. Qonaqların otel ərazisində girə biləcəkləri bütün otaqlarda sanitarlar və kifayət qədər sayda tibbi maska olmalıdır. Bundan əlavə, otel işçiləri həftədə bir dəfə COVID-19 testindən keçirilməlidir.
Yeni qaydalar koronavirusun yayılmasının qarşısını almağa yönəlib, amma otel sahibləri yeni qaydaların onlara sərf etməyəciyini düşünürlər. Onların fikrincə, yeni qaydalar otellərin texniki xidmət xərclərini artıracaq.
“New Baku Hotel” - Ceyhun Aşurov: “Yeniliklər və tələblər əlavə böyük xərclərə səbəb olacaq”
“New Baku Hotel”in idarəçisi Ceyhun Aşurov bildirdi ki, bu yeniliklər və tələblər əlavə böyük xərclərə səbəb olur: “Burada xüsusilə yeni işə qəbul edilən işçilərin koronavirus testi və ümumiyyətlə, bütün işçilərin həftədə bir dəfə test edilməsidir. İndiki qiymətləri nəzərə alanda bir işçinin test xərcləri ayda 400 manat təşkil edir. Bizim oteldə 20-yə yaxın işçi var və bu hesabla bizim test xərclərimiz ayda 8 min manat təşkil edəcək”.
Onun sözlərinə görə, ümumiyyətlə, otellərdə işçi sayı nömrə başına 0,5-1,5 nəfər arasında dəyişir: “Bu və digər tələblər otellərdə qiymətlərin artımı ilə nəticələnə bilər. Yeni tələblər otelləri böyük xərclərə salacaq. Otellər bu məsələni yenidən müzakirə etmək niyyətindədirlər. Biz Otellər Assosiasiyasına və digər qurumlara müraciət edəcəyik ki, tələblərə yenidən baxaraq bir qədər yumşaltsınlar. Otellər Assosiasiyasında da bu barədə danışıqlar gedir və orada da aidiyyəti üzrə təkliflər veriləcək”.
Fuad Əlizadə: “Biznes yeni şərtlərlə işləməyə uyğunlaşmalı olacaq və bu, otellərə də aiddir”
İqtisadçı-ekspert Fuad Əlizadə bildirdi ki, biznes yeni şərtlərlə işləməyə uyğunlaşmalı olacaq və bu, otellərə də aiddir. Onun fikrincə, yeni qaydaların tətbiqinə görə otel otaqlarında qiymətlər qalxsa belə, bu artım o qədər də nəzərəçarpan olmayacaq: “Bazar əhalinin imkanları ilə tənzimlənir və əhalinin gəlirləri azaldığı üçün qiymət də bu vəziyyətə uyğun olaraq formalaşacaq. Bundan əlavə, ölkədə çox sayda otel var və aralarındakı rəqabət də qiymət siyasətinə təsir edəcək. Otel işçiləri üçün edilən koronavirus testinə gəlincə, düşünürəm ki, otellərin xərcə düşməməsi üçün bu koronavirus testlərinə ciddi endirimlər ediləcək, amma bu məsələni Turizm Assosiasiyası həll etməlidir”.
Qeyd edək ki, koronavirusla bütün dünyanın mübarizə apardığı bir ərəfədə otel sahiblərinin öz gəlirini deyil, əhalinin sağlamlığını düşünməsi daha məqsədəuyğun olar.
Günel CƏLİLOVA
