Yeni tədris ilinin başlamasına 1 ay vaxt qalıb. Bu ərəfədə hər kəsi bir məsələ düşündürür: pandemiya dövründə təhsil ocaqlarının fəaliyyəti bərpa ediləcək, yoxsa yenə dərslər onlayn formada davam edəcək?
Dərslərin onlayn qaydada, lakin fərqli günlərdə keçirilməsi təklif olunur.
Təhsil Nazirliyinə ictimaiyyət nümayəndələrindən daxil olan təkliflərdə qeyd olunur ki, orta məktəblərin I, V, IX sinifləri üçün həftədə üç dəfə, ara siniflər üçün həftədə iki dəfə tədrisi nəzərdə tutan cədvəllər hazırlansın, X və XI siniflərdə tədris tam onlayn qaydada təşkil edilsin: “Təkliflərə əsasən, tədris planlarında dərnəklər və fakültativlərə saat ayrılmasın. Baza və praktiki fənlər (tədris dili, xarici dil, riyaziyyat, kimya, fizika) əyani, digər fənlər onlayn-məsafədən tədris edilsin (qarışıq tədris modeli). Fiziki tərbiyə və həyat bilgisi dərsləri mütləq keçirilsin və həmin dərslərə pandemiya və sağlamlığın qorunması ilə bağlı aktual olan mövzu və idman hərəkətləri daxil edilsin. Bu fənlər, xüsusilə fiziki tərbiyə dərsi əlavə dərs cədvəli müəyyən olunaraq tədris oluna bilər. Tədris həftəsi müddətində hər məktəbdə bir həkim və ya tibb bacısının olması təmin olunsun. Xəstəliyə yoluxmuş şagirdlərin təhsili məktəblər tərəfindən məsafədən təşkil olunsun.
Təkliflərdə bu da qeyd edilib ki, məktəblərdə davamiyyət məcburi olmasın. Bir dərs 35 dəqiqə, tənəffüs müddəti isə 10 dəqiqə müəyyən edilsin. Bir gün ərzində maksimum beş dərs (əyani və ya onlayn) müəyyənləşdirilsin. Onlayn dərslərin uçotu aparılsın. Bununla bağlı qanunverici bazaya müvəqqəti əlavə edilsin”.
“...hər bir şagirdə dövlət tərəfindən planşetlər verilməli və bütün şagirdlər üçün distant - onlayn təhsilə qoşulmaq üçün bərabər imkanlar yaradılmalıdır”
Dərslərin onlayn qaydada keçirilməsi barədə səslənən təklifə münasibət bildirən təhsil eksperti Kamran Əsədov qeyd etdi ki, pandemiya dünyada təhsil sistemlərinə də təsirsiz qalmadı. İlkin mərhələdə ölkələrin təhsil sistemi pandemiyaya adekvat reaksiya göstərə bilmədi və sadəcə, proseslərin arxasınca getdi. Əksər halda təhsil müəssisələrinin fəaliyyətinin dayandırılmasının qısa bir müddət sürəcəyi və tezliklə fəaliyyətini davam etdirəcəyi barədə gözləntilər var idi. Lakin pandemiyanın kütləvi itkilərlə müşayiət edilməsi və hələ uzun müddət davam edəcəyi aydın olandan sonra təhsil sistemləri təhsilin fasiləsizliyinin təmin edilməsi ilə bağlı tədbirlər görməyə başladılar”.
Ekspert bildirdi ki, martın 3-dən etibarən tədris prosesinin dayanması ən çox aşağı sinif şagirdlərinə mənfi təsir göstərib: “Nəzərə alsaq ki, onlarda oxuma, yazma və anlama vərdişləri yeni formalaşırdı, uzun müddət planlaşdırılmayan tədrisdən kənarda qalma onlarda bu qabiliyyətlərin itməsinə və ya azalmasına səbəb ola bilər: “Sentyabrda başlayacaq yeni tədris ili ilə bağlı onu da qeyd edim ki, dərslər həftə ərzində hər gün olmamalıdır. Belə ki, 1-3-5-7-9-11-ci sinif şagirdləri məktəblərə 1+3-5-ci günlər, geri qalan siniflər isə 2-4-6-cı günlər gəlməlidirlər. Bu zaman isə sosial məsafə və digər qabaqlayıcı tədbirlərə diqqət yetirmək lazımdır.
Bundan başqa, 4447 orta məktəbdə təhsil alan hər bir şagirdə dövlət tərəfindən planşetlər verilməli və bütün şagirdlər üçün distant - onlayn təhsilə qoşulmaq üçün bərabər imkanlar yaradılmalıdır".
Günel CƏLİLOVA
