Azərbaycanda hazırda koronavirusa yoluxanların sayında azalma müşahidə olunur. Yay fəslinin bitməsinə az qalır və payızın başlaması ilə həm də hava sərinləşəcək.
Fəsil dəyişikliyi qrip və soyuqdəymə ilə xəstələnənlərin sayını artırır. Hazırda isə əhalini daha çox koronavirusla bağlı vəziyyətin payız aylarında necə olacağı narahat edir.
“...normal qidalanmalı, zərərli vərdişlərdən bacardıqca imtina etməliyik”
Məsələ ilə bağlı şərh verən professor, tibbi ekspert Adil Qeybulla qeyd etdi ki, virusun geniş yayılmaması insanların davranışından asılıdır: “Karantin qaydalarına düzgün riayət edilsə, payızı yaxşı keçirəcəyik. Əks təqdirdə daha ağır sürprizlərlə üzləşə bilərik. Payızda koronavirus infeksiyası zirvə həddində olmayacaq. Payız aylarında infeksiyanın ikinci dalğası ola bilər. Yəni virusun birinci dalğası ölkədə sönəndən sonra ikinci dalğası başlaya bilər. Qeyd edim ki, koronavirusun ikinci dalğasının birinci dalğa kimi intensiv, güclü, ağırlaşdırıcı fəsadlı olması gözlənilmir. Çünki virusun özü artıq xeyli zəifləyib. Sadəcə olaraq insanların davranışlarından çox şey asılıdır. Biz karantin qaydalarını gözləsək, payızı yaxşı keçirəcəyik. Yox, karantin qaydalarını gözləməsək, təbii ki, daha ağır sürprizlərlə üzləşə bilərik”.
Həmsöhbətimiz onu da əlavə etdi ki,yoluxmanın qarşısını almaq üçün bir neçə aydır alışdığımız vərdişlərə ciddi əməl edilməlidir: “Bizə aşılanan vərdişlər var. Maska taxmaq, əhalinin sıx olduğu yerlərdən uzaq durmaq, təmizliyə əməl etmək və s. kimi vərdişlərə davamlı əməl etməyimiz çox vacib şərtdir. Yəni bu gündən payız-qış ayları üçün hazır olmalıyıq. Bununla yanaşı, normal qidalanmalı, zərərli vərdişlərdən bacardıqca imtina etməliyik. Həmçinin, immuniteti güclü saxlamaq üçün yuxu rejimi gözlənilməli, eləcə də əsəb sisteminin qorunması da vacib şərtlərdəndir”.
Günel CƏLİLOVA
