Şəmsəddin Əliyev: “Bəlli qüvvələr hər vasitə ilə çalışırlar ki, polisi gözdən salsınlar”
İşgəncələrə Qarşı Azərbaycan Komitəsi Baş Mütəşəkkil Cinayətkarlıqla Mübarizə İdarəsində (BMCMİ) monitorinq keçirib. Bu barədə komitə sədri Tural Hüseynov məlumat verib.
O bildirib ki, monitorinqi komitə sədrinin müavini Elçin Şirinovla birgə keçirib:“Monitorinqi keçirməkdə məqsəd sosial şəbəkələrdə bir neçə şəxsin guya BMCMİ-də işgəncələrə məruz qalmaları ilə bağlı yayılan fotoların araşdırılması olub:“Araşdırma nəticəsində bizə məlum oldu ki, bu fotolar məqsədli şəkildə əvvəlcədən planlaşdırılmış ssenari üzrə çəkilib. Belə ki, həmin fotolardakı şəxslərin heç biri Azərbaycan vətəndaşı deyil, həmin fotolar da Azərbaycanda çəkilməyib, şəkillərdəki Azərbaycan bayrağı və polis gerbini isə məqsədli şəkildə ora qoyublar. Avtomobilin qarşısında fotosu olan şəxs isə hüquq-mühafizə orqanlarında çalışmır. Araşdırma nəticəsində məlum olub ki, həmin şəxs Azərbaycan vətəndaşıdır, ancaq hüquq-mühafizə orqanlarında işləmir. O, rayonlardan birində yaşayır və tam fərqli bir sahənin adamıdır, hüquq-mühafizə orqanları ilə ümumiyyətlə heç bir əlaqəsi yoxdur”.
Göründüyü kimi, polisi qaralamaq üçün bir uydurma da belə ifşa olundu. Görünən odur ki, zaman-zaman belə cəhdlər olur, amma hər dəfə də təsdiqini tapmır. Sadəcə, müəyyən qüvvələr məqsədyönlü şəkildə polisi qaralamaq, gözdən salmaq istəyir.
- “BMCMİ mütəşəkkil cinayətkarlığa qarşı mübarizə aparan çox güclü bir qurumdur”
Sözügedən məsələ ilə bağlı fikirlərini “Bakı-Xəbər”lə bölüşən “Polisə Dəstək” İctimai Birliyinin rəhbəri Şəmsəddin Əliyevin sözlərinə görə, bu cür qarayaxma kampaniyalarını müəyyən qüvvələr ortaya atır:“Zaman-zaman sözügedən qüvvələrin bu kimi çirkin niyyətlərini görürük. Bütün hallarda, sözügedən qarayaxma xarakterli məlumatlar öz təstiqini tapmır. Çox keçmədən bu kimi məlumatların yalan olduğu ifşa edilir. Onların məqsədi odur ki, ölkədəki inkişafı gözdən salsınlar və ictimai rəyi çaşdırsınlar. Bəlli qüvvələr hər vasitə ilə çalışırlar ki, polisi gözdən salsınlar. Belə qüvvələr hər zaman olub. Ancaq müşahidələr göstərir ki, son zamanlar sosial şəbəkələrdə polisə qarşı qarayaxma kampaniyaları başlayıb. Çünki ölkədə sabitliyin qarantı, dövlətin bu istiqamətdəki siyasətini dəstəkləyən, onun formalaşmasında iştirak edən Azərbaycan polisidir. Beynəlxalq aləmdə ölkə polisinin prinsipial fəaliyyət istiqamətlərini dəfələrlə bəyəniblər. Ordada polisin fəaliyyəti mənmunluqla qarşılayıblar. Bu, Azərbaycan modelinə xas fəaliyyət istiqamətidir. Bir sıra inkişaf etmiş ölkələr Azərbaycanda bu stabilliyin qorunması, təhlükəsizliyin təmin olunması istiqamətindəki fəaliyyətlərin təmin olunmasında sözügedən modelin önəmini qeyd edir. BMCMİ mütəşəkkil cinayətkarlığa qarşı mübarizə aparan çox güclü bir qurumdur. Eyni zamanda, beynəlxalq aləmdəki polis qurumları ilə sıx əlaqəli işləyirlər. Qurum tərəfindən kifayət qədər hərbi qrup halında fəaliyyət göstərən cinayətkar dəstələr ifşa olunub. Bu da bəzi dairələri narahat edir. O üzdən, belə qaralama kampaniyası aparırlar ki, polisi gözdən salsınlar. Ancaq onlar öz məqsədlərinə nail ola bilməyəcəklər. Necə ki onların məlum xəbis niyyəti ifşa edildi, bundan sonra da belə halların qarşısı alınacaq. Əhalinin sağlam təbəqəsi Azərbaycan polisinin fəaliyyətindən mənmundur”.
Ekspertin fikrincə, polisə qarşı bu kimi qarayaxmalara hər zaman hazır olmalıyıq.
Vidadi ORDAHALLI
