Rusiya Prezidenti Vladimir Putin hökumətə əhalinin kütləvi peyvəndlənməsi üçün dövlət büdcəsindən maliyyə ayrılmasını tapşırıb. Payız və qışda ümumi əhalinin 60 faizinin və risq qrupuna daxil olanların 75 faizinin dövlət hesabına qrip peyvəndi edilməsi planlaşdırılır. Həmçinin, kəskin respirator infeksiyaların qarşısının alınması tədbirləri çərçivəsində preparatların dövlət qeydiyyatı aparıldıqdan sonra koronavirusa qarşı da peyvəndləmə nəzərdə tutulub.
Maraqlıdır, Rusiyada əhalinin kütləvi peyvənd olunması nə ilə bağlıdır? Həmin ölkədə artıq koronavirusa qarşı peyvənd icad olunub ki, əhali kütləvi şəkildə peyvənd olunur?
“...onun müddəti və sınaq sayı var”
İnfeksion xəstəliklər və klinik mikrobiologiya mütəxəssisi Nazxanım Qasımova bildirdi ki, peyvəndin hazırlanmağa başlanması koronavirus yayıldığı dövrdən var. Peyvənd elə bir şey deyil ki, bir günə kəşf olunsun. Təkcə Rusiya, Amerika yox, bir neçə dövlət peyvəndin tapılması üzərində iş aparır. Fərqi yoxdur, koronavirus və ya başqa infeksiya olsun, peyvənd hazırlanmasına 12-18 ay vaxt tələb olunur. Çünki o, insanlar üzərində sınaqdan keçirilir: “Koronavirus yayıldığı zamandan həm virus əleyhinə dərmanların tapılması, həm də peyvəndin hazırlanması ilə bağlı iş başlandı. Amerikada bəzi peyvənd növləri tapıldı, sınaqlar keçirildi. Rusiyada aparılan sınaqlarda isə daha pozitiv nəticələr var. Lakin bu, bir günə-üç günə xəstə üzərində sınaq aparılmaqla başa çatdırılan bir şey deyil. Onun müddəti və sınaq sayı var. Sınaq aparılan insanlarda nə dərəcədə effekt verib-vermədiyini gözləmək üçün zaman keçməlidir. Nəzərə alsaq ki, koronavirus 6-7 aydır yayılıb, tam mütəşəkkil peyvəndin tapılmasına təxminən 6 ay müddət qalıb. 6-8 ay müddətində peyvənd tam hazır olacaq. Rusiyada tapılan peyvəndin sınaqlarında müsbət nəticələrin əldə olunması o demək deyil ki, sabah onun tətbiqinə başlamaq olar. Təqribən 12-18 ay gərəkdir, onun da 6 ayını geridə qoymuşuq, qarşıdakı 6 ay ərzində mütəşəkkil bir peyvənd hazır ola bilər”.
Günel CƏLİLOVA
