20/09/2020 04:43
728 x 90

Azərbaycanda verilmiş koronavirus test arayışları xaricdə problemlə qarşılaşır… Niyə?

img

“Xaricə gedən vətəndaşların 48 saat etibarlılıq müddəti olan test nəticəsi olmalıdır”. Bunu Azərbaycan Respublikası Prezidentinin köməkçisi, Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev Nazirlər Kabineti yanında Operativ Qərargahın keçirilən brifinqində deyib.

Qaydaya uyğun olaraq, xarici ölkələrə səfər edənlər mütləq koronavirus testi verərək COVID  19 pasportu almalıdırlar. Onu da qeyd edək ki, yalnız nəticəsi "neqativ" olan şəxs xarici ölkəyə uça bilər.

Testin cavabı “neqativ” olan şəxslər xaricə gedərkən problemlə üzləşirlər. Belə ki, Azərbaycan dilində təqdim olunan test nəticəsini əcnəbilər oxuya bilmir və düşdüyü ölkədə vətəndaşlarımız uzun-uzadı izahatlar verməyə məcbur qalır, lazımsız başağrısı keçirirlər. Olmazmı ki, klinikalar testin cavabını Azərbaycan dili ilə yanaşı, beynəlxalq dil sayılan ingilis dilində də yazsınlar?

Məsələ ilə bağlı koronavirus testini edən klinikalarla əlaqə saxladıq.

  • “Memorial” klinikası: “Analiz cavabları Azərbaycan dilində verilir”

“Memorial” klinikasından bildirdilər ki, analiz cavabları Azərbaycan dilində verilir: “Pasiyentin istəyinə uyğun olaraq, tərcümə lazım olarsa, ingilis dilində də arayış təqdim olunur. Lakin bununla bağlı vətəndaşa məlumat verən lövhə yoxdur və yaxud əlavə məlumat verilmir. Bu səbəbdən, xaricə gedən şəxslər bu klinikalara müraciət edərkən test cavablarının ingilis dilində də təqdim olunmasını tələb etməlidirlər”.

  • Mərkəzi Neftçilər Xəstəxanası: “Vətəndaş özü getdiyi ölkədə qarşılaşacağı problemi əvvəlcədən proqnoz etməli və analiz cavabını...”

Mərkəzi Neftçilər Xəstəxanasında isə bildirdilər ki, vətəndaş özü getdiyi ölkədə qarşılaşacağı problemi əvvəlcədən proqnoz etməli və analiz cavabını haradasa tərcümə etdirib təsdiqlətməlidir . Bu, “ASAN xidmət”də də ola bilər, hər hansı notariat kontorunda da. Bu klinikalardan bildirdilər ki, onların möhürü istənilən xarici ölkədə tanınmalıdır.

  • “Referans Laboratoriyası”: “Analiz nəticəsi Azərbaycan dilində, üzərində arayış isə ingilis dilində təqdim edilir”

“Referans Laboratoriyası”ndan bildirildi ki, analiz nəticəsi Azərbaycan dilində, üzərində arayış isə ingilis dilində təqdim edilir.

Son olaraq bildirək ki, koronavirus bəlası bütün dünyanı cənginə aldığı üçün testin cavabı hər ölkənin öz dili ilə yanaşı, beynəlxalq dil sayılan ingilis və başqa dillərdə də yazılmalıdır ki, vətəndaş hansısa ölkəyə gedərkən çətinlik çəkməsin.

Günel CƏLİLOVA

Son xəbərlər