22/09/2020 09:01
728 x 90

Azərbaycanı koronavirus mövzusunda bütün dünyadan fərqləndirən daha bir cəhət - yoluxanların mütləq çoxluğu sağalıb, 89 faiz...

Leyla Bayramlı: “Azərbaycan dövlətinin uğurlu antivirus tədbirlərinin nəticəsidir”

img

Məlum olduğu kimi, Azərbaycanda koronavirus infeksiyasının yayılması fevralın 28-də ilk yoluxma halının qeydə alınması ilə başlayıb. Rəsmi məlumata görə, hazırda ölkədə ümumi yoluxanların sayı 34 minə yaxındır. Onlardan təxminən 89 faizi sağalıb,10 faizinin isə hələ müalicəsi davam etməkdədir. Bu günə kimi təxminən 780 minə yaxın test aparılıb.

Səhiyyə Nazirliyinin Mətbuat xidmətindən “Trend”ə bildiriblər ki, nazirliyin İctimai Səhiyyə və Sanitariya-Epidemioloji Nəzarəti Şöbəsinin müdiri Nəzifə Mürsəlovanın sözlərinə görə, koronavirusa yoluxma hallarının böyük qismi Bakı şəhərinin payına düşür. Regionlar arasında yoluxma göstəricilərinə görə liderliyin Sumqayıt, Gəncə və Mingəçevir şəhərləri, Abşeron, Cəlilabad, Salyan, Lənkəran, Yevlax və s. rayonlara aid olduğunu vurğulayan nazirliyin şöbə müdiri Bakının rayonları arasında COVID-19-a yoluxmanın daha çox Binəqədi, Xətai, Sabunçu və Yasamal rayonlarında qeydə alındığını bildirib.

“Bakı şəhərində poliklinik-ambulator xidmət göstərən 39 sahə məntəqəsində çalışan tibb işçiləri xüsusi hazırlıq keçib. “814” nömrəli "Çağrı Mərkəzi"ndən yönləndirilmiş müraciətlər əsasında burada xəstələrin çeşidlənməsi baş verir və sahə həkimləri tərəfindən hər bir müraciətlə bağlı müvafiq iş aparılır. Belə ki, simptomsuz xəstələr bir neçə gün müddətinə müşahidəyə götürülür. Simptomlu xəstələrdən isə ev şəraitində laborator müayinə üçün test analizi götürülərək, Səhiyyə Nazirliyi tərəfindən bu məqsədlər üçün ayrılmış nəqliyyat vasitələri ilə laboratoriyalara çatdırılır. Nazirliyin nəzdində bu işin təşkili üçün yaradılmış işçi qrupu gün ərzində sahə məntəqələrinin işini tənzimləyir və yaranmış problemlərin həllində yardım edir”.

Bildirək ki, son həftələr ərzində koronavirus infeksiyasının dinamikasında müsbət meyl müşahidə olunur, bu da dövlət səviyyəsində görülmüş işlərin, irəli sürülmüş tələb və qaydaların əhali tərəfindən qəbul olunması və onlara riayət edilməsinin nəticəsidir. Rəsmi məlumatlara görə, bu günlər ərzində Təcili və Təxirəsalınmaz Tibbi Yardıma daxil olan müraciətlərin sayı da 30 faiz azalıb.

  • “Dövlətin virusa yoluxan xəstələrin sağalması üçün bütün mümkün vasitələrdən istifadə etməsi...”

Həkim-terapevt Leyla Bayramlı “Bakı-Xəbər”ə bildirdi ki, koronavirusdan müalicə alan xəstələrin 89 faizinin sağalması müsbət haldır. “Bu gün Azərbaycan dövlətinin apardığı antivirus tədbirləri nəticəsində bizdə xəstələrin çoxu sağalıb. Əlbəttə, bu müsbət göstəricidir. Bu gün koronavirus xəstələrinin müalicə aldığı xəstəxanalarda yüksək şərait yaradılıb və xəstələrin müalicəsi çox yüksək səviyyədə həyata keçirilir. Burada həkimlərimizin də rolunu xüsusi qeyd etməliyik. Gecə-gündüz xəstələrin müalicəsi ilə məşğul olan həkimlər və tibb işçilərinin peşəkarlığı, xəstələrə həssas münasibəti bu nəticənin əldə olunmasına səbəb olub. Azərbaycanda virusa yoluxan xəstələrin mütləq çoxluğunun sağalması dövlət qayğısı ilə hərtərəfli təmin olunan milli səhiyyəmizin, fədakar həkimlərimizin fəaliyyətinin və Azərbaycan dövlətinin uğurlu antivirus tədbirlərinin nəticəsidir.

Dövlətin virusa yoluxan xəstələrin sağalması üçün bütün mümkün vasitələrdən istifadə etməsi, onları lazımi dərman vasitələri ilə pulsuz təmin etməsi, xəstələrə göstərilən xüsusi həssas münasibət prosesin müsbət sonluğa doğru getməsinə şərait yaradır. Bununla belə, biz ehtiyatı əldən verməli deyilik və mövcud qayda-qanunlara ciddi əməl etməliyik. Azərbaycanda virusa yoluxan xəstələrin 89 faizinin sağalması, bu problemlə bağlı Təcili və Təxirəsalınmaz Tibbi Yardıma daxil olan müraciətlərin sayının 30 faiz azalması müsbət göstəricidir. Vətəndaşlarımız bir qədər də səylərini artırsalar və daha məsuliyyətli olsalar, biz virusa tezliklə qalib gələ bilərik. Amma hələ ki, xəstəliyin kökü tam kəsilməyib. Ona görə də əhali daha diqqətli olmalıdır” - deyə həkim qeyd etdi.

İradə SARIYEVA  

Son xəbərlər