22/09/2020 09:02
728 x 90

Azərbaycanda ən çox yoluxmalar Bakının payına düşür – paytaxt rayonları arasında isə səviyyə fərqi kəskindir, az qala 2 dəfə...

Adil Qeybulla: “Belə fərqin yaranması əhalinin yerləşməsi ilə bağlıdır”

img

Məlum olduğu kimi, Azərbaycanda virusa yoluxanların sayı azalır. Bu öz yerində. Ancaq, ümumilikdə, Azərbaycanda koronavirusa ən çox yoluxma faktı Bakı şəhərində müşahidə olunub. Belə ki, ümumi yoluxma hallarının 56,3 faizi paytaxtda qeydə alınıb.

Bu arada Bakı şəhəri üzrə yeni növ koronavirus (COVID-19) infeksiyasına yoluxma göstəriciləri açıqlanıb. Maraqlıdır ki, paytaxt rayonları arasında virusa yoluxma faizi çox fərqlidir. Elə rayonlar var ki, orada yoluxanların faiz nisbəti daha yüksəkdir. Bəzi rayonlar da var ki, orada bu nisbət daha aşağıdır. Paytaxtın rayonları arasında ən yüksək yoluxma göstəriciləri Binəqədi, Xətai, Sabunçu və Yasamal rayonlarında qeydə alınıb. Həmin rayonlar üzrə yoluxma göstəriciləri müvafiq olaraq 14,2, 12,2, 11,9 və 11,8 faiz təşkil edir. Paytaxtın digər rayonlarına gəlincə, yoluxma hallarının 9,2 faizi Nəsimi, 8,3 faizi Nərimanov, 8,1 faizi Suraxanı, 7,4 faizi Qaradağ, 7,3 faizi Nizami, 4,8 faizi Xəzər, 4,5 faizi Səbail, 0,3 faizi Pirallahı rayonlarının payına düşür. Belə fərqin yaranması hansı amillərlə bağlıdır?

  • “Binəqədi, Xətai, Yasamal rayonlarında çoxsaylı həyət evi var”

Məsələyə münasibət bildirən tibb elmləri doktoru, professor Adil Qeybullanın sözlərinə görə, belə fərqin yaranması əhalinin yerləşməsi ilə bağlıdır: “Bakının elə rayonları var ki, əhali əsasən bina evlərində yaşayır. Bu şəraitdə pandemiyanın yoluxma şansı çox aşağıdır. Ancaq elə rayonlar var ki, orada həyət evləri çoxdur. Binəqədi, Xətai, Yasamal rayonlarında çoxsaylı həyət evi var. Bu şəraitdə sakinlər domino oynayırlar, bir-birilə ünsiyyətdə olurlar. Ona görə də bu rayonlarda yoluxanlar digərlərinə baxanda daha çoxdur. Bundan başqa, paytaxt əhalisinin çoxu bu rayonlarda yaşayır. Bu səbəbdən, yoluxma risqi bu rayonlarda daha böyükdür. Payızda ikinci dalğa gözlənir, amma düşünürəm ki, bu, Azərbaycanda güclü olmayacaq. Xəstəxanalara müraciət edən xəstələrin sayının azalması, sağalanların sayının çoxalması müsbət dinamikadır. Qeyd edim ki, evdə müalicə olunanlar və qeydiyyatda olmayanlar da var. Ona görə də tam arxayın ola bilmərik. Ancaq, bununla yanaşı, epidemioloji vəziyyət yaxşılaşdıqca, karantin rejimi də tədricən yumşaldıla bilər. Söhbət bizdə ikinci dalğanın olub-olmamasından gedir. Bunun üçün də gərək birinci dalğa sönsün ki, biz payız ayı üçün ikinci dalğadan danışa bilək. Bütövlükdə, gələn məlumatlar ümidvericidir, amma arxayın olmaq olmaz. Çünki insanlar yenə də maska çənədə marketə gedirlər. Ona görə də karantin davranışlarına ciddi əməl olunmalıdır”.

Professorun açıqlamasından belə məlum oldu ki, arxayınlaşmaq olmaz.

Vidadi ORDAHALLI

Son xəbərlər