“Vətəndaş ali təhsillidirsə, özünü aztəminatlı hesab etmirsə və işsizdirsə, belə vətəndaşlar üçün bazada 47 min vakant iş yeri var, onlar bu yerlərdə işləmək üçün müraciət edə bilərlər”. Bu sözləri Əmək və əhalinin sosial müdafiəsi naziri Sahil Babayev media nümayəndələrinə açıqlamasında bildirib.
O qeyd edib ki, ehtiyac içində olan aztəminatlı şəxslərə minimum əməkhaqqı səviyyəsində - 250 manat məbləğində iş təklif edilir: "Aydın məsələdir ki, pandemiya dövründə iş tapmaq imkanları azalır. Dövlət məhz aztəminatlı şəxslər üçün dəstək mexanizmi təqdim edir. Digər kateqoriyalardan olan insanlara iş tapmaq üçün başqa mexanizm təqdim edir və bu mexanizm fərqlidir. Yüksək təhsili olanlar üçün işlər də fərqlidir".
Maraqlıdır, ali təhsilli şəxslər onlar üçün təklif edilən vakant iş yerlərində çalışmağa maraq göstərmir?
“Təklif edilən işlərin münasib və layiq olmaması, yardım alanların bəzilərinin işləmək istəməməsi, həmçinin, əməkhaqqı səviyyəsinin aşağı olması belə vəziyyəti yaradıb”
Vətəndaşların Əmək Hüquqlarının Müdafiəsi Liqasının rəhbəri Sahib Məmmədov bildirdi ki, təklif edilən işlərin münasib və layiq olmaması, yardım alanların bəzilərinin işləmək istəməməsi, həmçinin, əməkhaqqı səviyyəsinin aşağı olması belə vəziyyəti yaradıb: "Əsas məsələ təklif edilən işin münasib və layiqli olmasıdır. İşə marağın yaranmasında əməkhaqqının səviyyəsi də rol oynayır. Bəzən ixtisaslı işaxtarana ixtisassız, yəni münasib və layiq olmayan iş təklif edilir. Belə işləri ixtisaslı işaxtaranlar qəbul etmirlər. Məsələn, hüquqşünasa kommunal təsərrüfat idarəsində süpürgəçi işini təklif etsəniz, əlbəttə ki, o, imtina edəcək. Ona görə də çox adam təklif edilən işləri qəbul etmir. Hətta əmək yarmarkalarında da belə hallara rast gəlinir. İşaxtarana göndəriş verilir, gedib baxdıqda məlum olur ki, iş yeri münasib deyil və imtina edir. Bir qayda olaraq, təklif edilən işlər yüksək maaşlı, uyğun olmur. Elə vakansiyalar var ki, təklif edilən işaxtaranlar üçün münasib deyil”.
Günel CƏLİLOVA
