“Həkimlərin sayının artırılması ilə əlaqədar təbii çətinliklərimiz var. Ona görə xaricdən həkimlərin dəvət edilməsi məsələsinə baxıldı. Hazırda bir neçə ölkədən həkimlər dəvət edildi və onlar Azərbaycanda xəstələrin müalicəsi ilə məşğuldurlar. Türkiyədən, Rusiyadan, Kubadan, İtaliyadan və Çindən həkim briqadaları Azərbaycana gəlmiş və artıq fəaliyyətə başlamışlar. Bu da, əlbəttə ki, bizə əlavə imkanlar yaradır. Çünki həm bu ölkələrdə səhiyyə sahəsi inkişaf etmiş sahədir, orada təcrübə yüksək səviyyədədir və əlbəttə, həm xəstələrin müalicəsi, həm də təcrübə mübadiləsi məsələləri burada kompleks şəkildə həll olunur...”.
Bu fikirləri Prezident İlham Əliyev koronavirusla mübarizə sahəsində görülən tədbirlər və sosial-iqtisadi vəziyyətlə bağlı videoformatda müşavirədə deyib.
Azərbaycanda həkim çatışmazlığı var ki, xaricdən həkim dəvət edilib?
“...bizə iş prosesində dəstək vermək üçün Türkiyə, Rusiya, Kuba, İtaliya və Çindən mütəxəssislər dəvət edildi”
Məsələni “Bakı-Xəbər”ə şərh edən K.Fərəcova adına Elmi-Tədqiqat Pediatriya İnstitutunun direktoru, Türk Dünyası Pediatriya Birliyinin prezidenti, tibb elmləri doktoru, professor Nəsib Quliyev bildirdi ki, Prezident İlham Əliyev əvvəllər də Azərbaycanda olan həkimlərin sayının ölkəmizdə sakit şəraitdə, pandemiya, epidemiya olmadığı halda əhaliyə xidmət etmək üçün yetərli olduğunu bildirib. “Amma pandemiya baş verəndə həkimlərə, tibb işçilərinə ehtiyac dəfələrlə çoxaldığı üçün, belə çatışmazlıqlar dünyanın hər yerində müşahidə olunur. Yəni bu, qeyri-normal yox, adi haldır. Digər tərəfdən, hamı bilməlidir ki, həkimlərin heç də hamısı həkim-infeksionist deyil. Burada ixtisas məsələsi var. Pandemiyalı xəstələrin müalicəsinə daha çox həkim-infeksionistlər və həkim-epidemioloqlar cəlb edilir. Burada söhbət ixtisaslı həkim-infeksionist və həkim-epidemioloq çatışmazlığından gedir. Əlbəttə, pandemiya azalandan sonra hər şey qaydasına düşəcək. Çünki Azərbaycanda bütün həkimləri infeksionist də etmək mümkün deyil. Onda bəs digər ixtisaslarda kim işləsin? Pandemiya, epidemiya ona görə qorxuludur ki, o zaman birtərəfli mütəxəssislərə kəskin ehtiyac artır. Yəni hər bir ölkədə bu sahədə ixtisaslı həkim çatışmazlığı hiss oluna bilər. Bu problemi də aradan qaldırmaq üçün cənab Prezident çox müdrik qərar verdi və müvəqqəti olaraq bizə iş prosesində dəstək vermək üçün Türkiyə, Rusiya, Kuba, İtaliya və Çindən mütəxəssislər dəvət edildi. Onlar da daimi gəlməyiblər, proses bitəndən sonra öz ölkələrinə qayıdacaqlar”.
N.Quliyevin sözlərinə görə, sözügedən ölkələrdən dəvət edilən həkimlər Azərbaycandakı tibb müəssisələrinin, xəstəxanaların texniki təchizatını təqdir edir və iş prosesində heç bir texniki çətinliklərlə üzləşmədiklərini deyirlər. “Bizi sevindirən hallardan biri odur ki, xaricdən dəvət edilən mütəxəssislərin heç biri Azərbaycanda olan tibbi müəssisələrin təchizatına, avadanlıqların müasirliyinə, şəraitin yaxşılığına, həkimlərimizin peşəkarlığına aid bir dənə də olsun nöqsan bildirməyiblər, əksinə, təqdir ediblər. Mən də bilirəm ki, bu gün ölkəmizdə tibb müəssisələrinin təchizatı, təminatı və bugünkü vəziyyəti Kubadakı xəstəxanalardan dəfələrlə artıqdır. Amma bizdə infeksion xəstəliklər üzrə həkimlərin çatışmazlığı təbiidir, normaldır. Bu sahə üzrə mütəxəssislərin sayı o ölkələrdə çox ola bilir ki, həmin ölkələr daim tropik infeksiyalarla, epidemiyalarla üzləşsinlər, orada virus mənşəli xəstəliklər geniş yayılır. Ona görə də həmin ölkə bu ixtisaslar üzrə mütəxəssislərin sayını artırmağa məcbur olur. Kuba da belə ölkələrdəndir. Virusla bağlı bu ölkə daha çox çətinliyə düşür, əhali infeksiyaya məruz qalır, ona görə də orada bu sahədə ixtisaslı həkimlər çoxdur” - deyə N.Quliyev bildirdi.
İradə SARIYEVA
