Prezident İlham Əliyev ölkəmizdə koronavirus pandemiyası ilə mübarizə sahəsində görülən tədbirlər və sosial-iqtisadi vəziyyətlə bağlı videoformatda keçirilən müşavirədə bir sıra məsələlərə toxunub. O cümlədən, modul tipli xəstəxanaların yaradılması istiqamətində görülən işlər haqqında da fikir bildirib.
Prezident onu da qeyd edib ki, xəstələrin sayı artmaqda idi və mövcud xəstəxanalar kifayət qədər imkanlarımızı genişləndirsə də, amma yeni xəstəxanaların tikilməsinə ehtiyac vardı. Bu məqsədlə modul tipli xəstəxanaların tikintisi təşkil edildi: “Bu günə qədər modul tipli 9 xəstəxana istismara verilib. Onlardan 4-ü bir gün ərzində - iyulun 29-da fəaliyyətə başlayıb. Qobustan, İsmayıllı, Qəbələ və Şəki şəhərlərində mənim iştirakımla bu xəstəxanaların açılışı olubdur. Yaxın gələcəkdə modul tipli xəstəxanaların sayı, bütövlükdə, 16-ya çatdırılacaq və beləliklə, bizim təkcə bu xəstəxanalarda 3200 koronavirus xəstəsi müalicə ala biləcək”.
Prezident bildirib ki, Fövqəladə Hallar Nazirliyinin xətti ilə 800 çarpayılıq bir xəstəxana istifadəyə verilib, 1300 çarpayılıq xəstəxana isə bu ayın sonuna qədər istifadəyə veriləcək. Bu da əlavə 2100 çarpayı deməkdir. Eyni zamanda, iki olimpiya idman kompleksi qısa müddət ərzində xəstəxanaya çevrilib. Artıq bu komplekslərin hər birində, lazım olarsa, 300-ə yaxın xəstə müalicə ala bilər: “Qabaqlayıcı tədbirlər deyəndə, əlbəttə ki, bütün bu amillər nəzərə alınır. Çünki biz ən kritik ssenariyə hazır olmalıyıq. Məhz belə operativ, çevik və məqsədə hesablanmış addımlar nəticəsində bu gün xəstəlik nəzarət altındadır. Bir daha demək istəyirəm ki, son üç həftə ərzində xəstələnənlərin sayı azalmaqdadır. Bütün bu addımlar, əlbəttə, imkan verir ki, biz bu vəziyyətdən şərəflə çıxaq, insanlarımızı qoruyaq”.
Ekspertlərin fikrincə, hazırkı şəraitdə işlək olmayan olimpiya komplekslərinin modul tipli xəstəxanaya çevrilmısi düzgün qərardır.
“Virusun ölkəmizi cənginə aldığı bir dönəmdə idman mərkəzinin olmasındansa modul tipli xəstəxananın olması daha münasibdir”
Həkim-ekspert Rasif Bağırov bildirdi ki, aylardır COVID-19 pandemiyasının ölkə ərazisində geniş yayılmaması üçün dövlətimiz tərəfindən ciddi tədbirlər görülür: “Xüsusilə ixtisaslaşmış xəstəxanaların ən müasir tibbi avadanlıqlarla təchizatı və yeni modul tipli xəstəxanaların inşası bu bəlaya qarşı mübarizədə əsas faktordur. Bu günlərdə iki olimpiya kompleksi modul tipli xəstəxanaya çevrildi. Virusun ölkəmizi cənginə aldığı bir dönəmdə idman mərkəzinin olmasındansa modul tipli xəstəxananın olması daha münasibdir”.
Həmsöhbətimiz onu da əlavə etdi ki, modul tipli səhiyyə komplekslərinin istifadəyə verilməsi nəticəsində əlavə çarpayı yerləri yaranır. Bu da, öz növbəsində, yoluxan şəxslərin müalicəsi üçün imkanların genişlənməsinə, nəticədə yoluxanlar və sağalanlar arasında balansın tənzimlənməsinə gətirib çıxarır: “Düşünürəm ki, yaxın müddətdə modul tipli xəstəxanalara olan ehtiyac tamamilə yox olacaq. Son dövrün təhlili göstərir ki, müalicə alaraq sağalanların sayı yoluxanların sayını keçir. Bu, müsbət trenddir”.
Ekspertin sözlərinə görə, modul tipli xəstəxanalara, korpuslara zərurət olmadıqda, yəni pandemiya ilə mübarizə başa çatdıqdan sonra onlar asanlıqla digər sahələrə köçürülə, başqa məqsədlər üçün – məsələn, hərbi hissələr, sərhəd xidməti, tədris və ya fövqəladə hallar, yataq, məişət xidməti və sair üçün istifadə edilə bilər.
Günel CƏLİLOVA
