18/09/2020 12:45
728 x 90

Prezident 600 min insanın hər birinə ayda 190 manat dəstək mexanizminə yenidən təkan verdi…

Günay Hüseynova: “Büdcədən milyardlar xərcləməklə dövlətimiz vətəndaşın maraqlarını başqa dəyərlərdən üstün tutdu”

img

Prezident İlham Əliyev videoformatda keçirilən son müşavirədə çıxışı zamanı əlaqədar qurumlara göstəriş verib ki, avqust ayında da əhalinin uyğun kateqoriyasına 190 manat kompensasiya ödənilsin:

"Altı yüz min işsiz insan, o cümlədən qeyri-formal məşğulluqda fəaliyyət göstərən və müvəqqəti olaraq öz işini itirən, aztəminatlı təbəqəyə aid olan insan dövlət tərəfindən qayğı ilə əhatə olunubdur. Onlara artıq bir neçə ay ərzində 190 manat müavinət verilir. Hesab edirəm ki, bu sosial dəstək bundan sonra da davam etdirilməlidir. Hazırda Azərbaycanın 13 şəhər və rayonunda sərt karantin rejimi tətbiq edilir. Həmin rayonların bu kateqoriyaya aid insanları bu dəstəklə bundan sonra da əhatə olunmalıdır. Sizə göstəriş verirəm ki, avqust ayında da onlara 190 manat ödənilsin.

Bu, sadəcə olaraq, görülmüş işlərin bir hissəsidir. Əgər biz nəzərə alsaq ki, ölkəmizdə çox böyük sosial layihələr həyata keçirilir və 2020-ci ildə bu layihələrin həcmi rekord həddə çatıb, baxmayaraq ki, həm pandemiya, həm də neftin qiymətinin aşağı səviyyədə olması bizim gəlirlərimizə çox mənfi təsir göstərib, ancaq nəzərdə tutulmuş bir dənə də olsun sosial layihə yarımçıq qalmayıb, yaxud da ixtisar edilməyib. Qeyd etməliyəm ki, bu il rekord sayda məcburi köçkün ailəsi evlərlə, mənzillərlə təmin olunacaq. Bu il bu imkandan 7 mindən çox köçkün ailəsi faydalanacaq. Bu il rekord sayda - 1500 şəhid ailəsi, Qarabağ müharibəsi əlili mənzillərlə təmin ediləcəkdir. Ordu sıralarında qüsursuz xidmət etmiş 400-dən çox hərbçi dövlət tərəfindən pulsuz mənzillərlə təmin olunacaq. Yəni bütövlükdə, ən azı, 9 minə yaxın ailə bu il dövlət tərəfindən mənzillərlə təmin ediləcəkdir. Bütün bu mənzillər keyfiyyətli mənzillərdir, demək olar ki, onların hamısı yeni tikilmiş binalarda yerləşir. Beləliklə, əgər biz bir ailənin üzvlərini orta hesabla beş nəfər götürsək, deməli, bir il ərzində ölkəmizdə 45 min insan dövlət tərəfindən pulsuz, keyfiyyətli mənzillərlə təmin edilir. Mən tam əminliklə deyə bilərəm ki, adambaşına düşən saya görə bu, dünyada ən yüksək nailiyyətdir".

Göründüyü kimi, ölkə başçısı çox böyük əhali kütləsini əhatə edənlərlə bağlı dövlətin dəstək proqramının davam etdirilməsinə göstəriş verib. Ölkə rəhbərliyinin bu təşəbbüsünü ekspertlər necə dəyərləndirir?

İqtisadçı ekspert Günay Hüseynova “Bakı-Xəbər”ə açıqlamasında bildirdi ki, Prezident İlham Əliyev koronavirus pandemiyası ilə mübarizə sahəsində görülən tədbirlər və sosial iqtisadi vəziyyətlə bağlı videomüşavirə zamanı bir sıra vacib məqamlara toxundu: “Ölkə başçısı çıxışı zamanı həm də avqust ayında 190 manat müavinətin ödənməsi ilə bağlı göstəriş verib. Bu müavinətdən altı yüz min işsiz insan, o cümlədən qeyri formal məşğulluq fəaliyyəti göstərən və müvəqqəti olaraq öz işini itirən aztəminatlı təbəqəyə şamil olinacaq. Eyni zamanda, Prezident çıxışı zamanı qeyd edib ki, bu sosial yardım bundan sonra da davam etdirilməlidir. Bildiyimiz kimi, karantin rejimi ölkənin 13 şəhər və rayonuna tətbiq edilir. Bu sosial yardım paketi həmin şəhər və rayonların bu kateqoriyaya aid olan əhalisinə şamil olunacaq. Bütün bunlar bir daha sübut edir ki, Azərbaycan iqtisadiyyatı tam ayaqdadır. Müxtəlif illərdə Azərbaycan iqtisadiyyatı fiskal şoklar, böhranlarla qarşı-qarşıya qalsa da, özünü ayaqda tuta bilib. Eynilə bugünkü günümüzdə olduğu kimi. Biz koronavirus tədbirləri çərçivəsində dövlətin təqdim etdiyi yardım paketlərindən bunu aydın görə bilirik. Azərbaycan büdcəsinin əsas donoru olan neft qiymətlərinin kəskin düşməsi, pandemiya tədbirləri zamanı çəkilən xərclər, vətəndaşın və sahibkarın sosial rifahının qorunması ilə əlaqədar yardım paketləri dövlət büdcəsinə öz təsirini göstərsə də, iqtisadiyyatımızın güclü olduğu mənzərəsinə şahidlik edirik. Ümumilli lider Heydər Əliyevin müdrik bir sözü var:”İqtisadiyyatı güclü olan dövlət hər şeyə qadirdir”. Azərbaycan Respublikasın Konstitusiyasında da qeyd olunduğu kimi, dövlətin ali məqsədlərindən biri ədalətli iqtisadi və sosial qaydalara uyğun olaraq hamının layiqli həyat səviyyəsini təmin etməkdir. Dünyanın bütün ölkələri virusla qarşılaşsa da, əksər ölkələr ilk öncə vətəndaşı yox, iqtisadi maraqlarını düşündü. Bizdə isə əksinə, büdcədən milyardlar xərcləməklə dövlətimiz vətəndaşın maraqlarını başqa dəyərlərdən üstün tutdu”.

Günay Hüseynovanın sözlərinə görə, bu ödəmələr 278 min şəxsi əhatə edəcək: “Bu məqsədlə 53 milyon manat vəsait sərf olunacaq. Vəsaitlər həmin vətəndaşların may ayında birdəfəlik ödəməni almaq üçün banklar tərəfindən verilmiş bank kartlarına köçürüləcək və bu barədə onlara rəsmi məlumat göndəriləcək. Vətəndaşlar öncədən ödəmələrin köçürülməsi ilə əlaqədar məlumatlandırılacaqlar”

Dövlətin, xüsusilə dəstəyə ehtiyacı olan kateqoriyaya yardımı davam etdirməsi Azərbaycan hakimiyyətinin vətəndaşına verdiyi yüksək dəyərin ən parlaq göstəricisidir.

Məhəmmədəli QƏRİBLİ

Son xəbərlər