19/09/2020 22:04
728 x 90

“Elmi iş” jurnalı elmi nəşrlər sırasına niyə daxil edilmir - Baş redaktorun öz izahları…

Mübariz Binnətoğlu: “Jurnalın sənədlərinin AAK tərəfindən qəbul edilməsinə baxmayaraq, 2020-ci ilin siyahısı açıqlandı, lakin həmin siyahıda yenə də “Elmi iş” jurnalının adı olmadı”

img

Yerli və beynəlxalq elmi ictimaiyyətdə yaxşı tanınan, qəbul edilən və 2007-ci ildən Mübariz Binnətoğlunun baş redaktorluğu ilə nəşrə başlayan “Elmi iş” beynəlxalq elmi jurnalı dünyanın bir sıra nüfuzlu təşkilatlarından indekslər alsa da, dəfələrlə edilən müraciətlərə baxmayaraq, indiyə qədər Azərbaycan Respublikasının Prezidenti yanında Ali Attestasiya Komissiyasından indeks ala bilməyib.

“Elmi iş” jurnalının baş redaktoru Mübariz Binnətoğlu “Bakı-Xəbər”ə açıqlamasında bildirdi ki, jurnal 2007-ci ildən beynəlxalq elmi jurnal kimi Ədliyyə Nazirliyində qeydiyyata alınıb və həmin dövrün tələblərinə uyğun fəaliyyətə başlayıb, 2014-cü ilə qədər jurnalın 38 nömrəsi çap olunub: “Həmin vaxtda Ədliyyə Nazirliyinin qeydiyyatı ilə fəaliyyət göstərdik. Biz, həmçinin, dəfələrlə Ali Attestasiya Komissiyasına müraciət etdik, qurumun müvafiq əməkdaşları ilə telefon söhbətlərimiz oldu, lakin jurnalımız AAK tərəfindən qeydiyyata alınmadı. Sonra biz jurnalın fəaliyyətini müvəqqəti olaraq dayandırdıq. 2018-ci ilin dekabr ayından başlayaraq indiyə qədər fəaliyyətimizi davam etdiririk. Təkrar fəaliyyətə başlayanda yenidən AAK-a rəsmi müraciət etdik. Eyni zamanda, bununla paralel olaraq beynəlxalq elmi jurnalların qeydiyyat bazalarına, indeks mərkəzlərinə də müraciət etməli olduq. Bununla yanaşı, biz Fransada yerləşən ISSN təşkilatına müraciət etdik və “Elmi iş” jurnalını orada qeydiyyatdan keçirdik və jurnala ISSN 2663-4619 qeydiyyat nömrəsi verildi. Müraciət etdiyimiz digər beynəlxalq indeks mərkəzlərinin bir neçəsi jurnalı qeydiyyata alıb, amma bəziləri bizə müsbət cavab veriblər, amma jurnalın  qeydiyyata alınmasının təsdiqini göndərməyiblər.

2019-cu ilin aprel ayında üzv olmaq üçün Mətbuat Şurasına müraciət etdik, qısa bir müddət ərzində bizi Mətbuat Şurasının üzvlüyünə qəbul etdilər. Həmçinin, İngiltərədə yerləşən “Crossref” Beynəlxalq Müəllif Hüquqları Agentliyi jurnalın fəaliyyətinə baxış keçirib qeydiyyatdan keçirdi və bizə beynəlxalq müəllif hüquqları kodu verdi. Dünyanın 5 qitəsində “doi10.36719 müəllif hüququ kodu bizə məxsusdur.  Bunu alandan sonra biz yenidən müxtəlif beynəlxalq indeks mərkəzlərinə müraciət etməklə paralel olaraq, hər ay rəsmi olaraq poçt vasitəsilə jurnalın yeni saylarını AAK-a göndərdik, eyni zamanda, quruma yenidən məktubla müraciət etdik. 2019-cu il ərzində AAK-a üç rəsmi müraciətimiz olub. Lakin qurum tərəfindən bizə nə bir tövsiyə verildi, nə də bir münasibət göstərildi. 2019-cu ilin sonlarında biz yenidən AAK-a növbəti dəfə müraciət etdikdən sonra qurumun hüquqşünası Mübariz Məmmədli bizimlə telefon vasitəsilə əlaqə saxladı. O, məni AAK-a dəvət etdi və mən də bütün tələb olunan sənədləri götürüb ora getdim. Mübariz müəllim məni qəbul etdi və bildirdi ki, sizin jurnalınız AAK-ın bütün tələblərinə tam uyğundur. Jurnalın yer aldığı indeks bazalarına baxıb dedi ki, heç bizim daxildə olan elmi jurnallar belə indeks bazalarında yer tutmayıblar. Bir məsələni də qeyd edim ki, 2019-cu ilin iyun ayında Prezident elmi məqalələrin əsas çap ünvanının indeksləşmiş jurnallarda olmasına dair sərəncam imzaladı. Hazırda  “Elmi iş” jurnalı dünyanın 6 indeks bazasında yer tutur. Jurnalın sənədlərinin AAK tərəfindən qəbul edilməsinə baxmayaraq, 2020-ci ilin siyahısı açıqlandı, lakin həmin siyahıda yenə də “Elmi iş” jurnalının adı olmadı. Bundan əvvəl müraciət edəndə AAK-ın ümumi şöbəsindən mənimlə danışan bir nəfər bildirdi ki, sizin jurnala filologiya bölməsində baxış keçirilib və müsbət rəy yazılıb, siyahıya qəbul olunacaq. Buna baxmayaraq, “Elmi iş” jurnalının adını siyahıda görə bilmədik. Dünyada beynəlxalq elmi jurnallar haqqında bir tələb də var ki, İMPACT FACTOR-u hesablanır ( elmi jurnallardan istifadə olunan mənbələrin nəticəsi). Orada bal məsələsi var.  1200 İMPACT FACTOR-u keçirsənsə beynəlxalq aləmdə həmin jurnal İMPACT FACTOR-lu jurnal kimi fəaliyyət göstərir. Bu günlərdə rəsmi olaraq beynəlxalq indeks bazasından “Fresh Ideas for Growing your Citations”sertifikatnı da aldıq. Bizim jurnal artıq İMPACT FACTOR-lu jurnaldır”.

Yerli və beynəlxalq elmi ictimaiyyət tərəfindən jurnala kütləvi müraciətlərin olduğunu deyən M.Binnətoğlunun sözlərinə görə, buna baxmayaraq, hələ də AAK jurnalı qeydiyyata almayıb.

“Bizə müraciət edənlər deyirlər ki, AAK-ın siyahısına baxırıq, amma sizin jurnal bu qurumun siyahısında yoxdur. Dünyanın nüfuzlu təşkilatları fəaliyyətimizi yoxlayıb jurnalı qeydiyyata alsalar da, təəssüflər olsun ki, AAK “Elmi iş” jurnalını qeydiyyata almır. AAK tərəfindən jurnalın qeydiyyata alınmaması ilə bağlı səbəb açıqlanmır. Bizə hər hansı bir tövsiyələri yoxdur. Biz bilmirik ki, jurnalda hansı çatışmazlıq var və biz bunu aradan qaldıraq. Amma heç bir reaksiya yoxdur, bu da bizi ciddi narahat edir.

Dünyanı bürümüş pandemiya dövründə bizim jurnalımız fəaliyyətini dayandırmayıb, hər ay davamlı olaraq nəşr olunur” - deyə müsahibimiz bildirdi.

“Elmi iş” jurnalının redaksiya heyətində Azərbaycanla yanaşı, dünyanın bir sıra nüfuzlu alimlərinin də yer aldığını bildirən M.Binnətoğlunun sözlərinə görə, jurnal onlayn variantda 4 dildə - Azərbaycan, türk, ingilis və rus dillərində təqdim edilir.

İradə SARIYEVA

Son xəbərlər