19/09/2020 00:06
728 x 90

Koronavirusa qarşı ən səmərəli hesab edilən favipiravir dərmanı Bakıda 490 manat – 1 tabletka 49 manat?

Rəvanə Əliyeva: “Favipiravir dərmanı ağır xəstələrin müalicəsində həkimin göstərişi ilə istifadə edilir”

img

Azərbaycanda "İnstagram" vasitəsilə koronavirusun müalicəsində effektiv təsirə malik olduğu iddia edilən favipiravir dərmanı satılır.

Dərman sosial şəbəkələrdə paketi 490 manatdan təklif edilir. Hər paketdə isə 40 ədəd tablet olur. Həmçinin, ayrılıqda 10 ədəd tablet də 130 manatdan təklif edilir.

Qeyd edək ki, iyun ayında TƏBİB sözügedən dərmanla bağlı açıqlama vermiş və bunun koronavirusla mübarizədə ən effektiv vasitələrdən biri olduğunu bildirmişdi: “Favipiravir – müxtəlif növ RNT-virusları, o cümlədən, koronovirus SARS-CoV-2 əleyhinə dərman vasitəsi kimi istifadə olunan kimyəvi tərkibdir. Dərman vasitəsi ilk dəfə qrip əleyhinə müalicə vasitəsi kimi Yaponiyada istehsal olunub və qripdən əlavə, ağır viruslu infeksiyaların müalicəsi üçün təsdiqlənib. Yaponiyada favipiravir tərkibli dərman vasitəsinin ticarət adı aviqandır.

Favipiravirin koronavirus aleyhinə effektivliyi 2020-ci ilin mart ayında Çinin Uhan və Şençjen şəhərlərində aparılmış kliniki tədqiqatlar nəticəsində sübut olunub. Müayinənin nəticələri göstərib ki, favipirivarin təsiri altında koronovirusun insan orqanizmində mövcudluğu 11 gündən 4 günə qədər azalır və 91% xəstələrin virusla zədələnmiş ağciyərlərində vəziyyətin yaxşılaşması müşahidə olunur, halbuki, favipiraviri qəbul etməyən kontrol qrupda vəziyyəti yaxşılaşan xəstələrin sayı 62% təşkil edib. Favipiravir preparatının özəlliyi ondan ibarətdir ki, onun təsirinə dözən virus hələ ki, aşkarlanmayıb”.

  • “Sözügedən dərmanın “qara bazar”da satışı ilə bağlı iddialara görə məsuliyyəti TƏBİB daşımır”

TƏBİB-in mətbuat katibi Rəvanə Əliyeva bildirdi ki, bu dərman ağır xəstələrin müalicəsində həkimin göstərişi ilə istifadə edilir: “Müalicə prosesində istifadə edilən bu dərmanla bağlı bir müddət əvvəl də açıqlama vermişdik. Bu dərmanı xəstə özü sərbəst istifadə edə bilməz, eyni zamanda, qeyd etdiyim kimi, satışda yoxdur. Dünyada COVID-19-un müalicəsində effektiv hesab edilən favipiravir də daxil olmaqla, bütün dərman vasitələri ölkəmizə gətirilir”.

R.Əliyeva onu da əlavə etdi ki, sözügedən dərmanın “qara bazar”da satışı ilə bağlı iddialara görə məsuliyyəti TƏBİB daşımır: “Nəinki “qara bazar”, hətta apteklərdə satılan dərman vasitələri və s. TƏBİB-in səlahiyyətində deyil. TƏBİB yalnız xəstəxanaların dərman vasitələri ilə təminatına səlahiyyətlidir. Apteklərlə bağlı isə Səhiyyə Nazirliyinin Analitik Ekspertiza Mərkəzinə müraciət edilməlidir”.

Günel CƏLİLOVA

Son xəbərlər