19/09/2020 21:47
728 x 90

Ağır cinayətlərin minimallığına və cinayətlərin açılma səviyyəsinə görə Azərbaycan MDB-nin liderləri arasında…

Şəmsəddin Əliyev: “Bu, ilk növbədə, cinayətkarlıqla mübarizədə dövlətin düzgün siyasətinin səmərəli şəkildə həyata keçirilməsinin təzahürüdür”

img

Bu ilin birinci yarısında ölkədə baş verən cinayətlərin sayı açıqlanıb. Baş prokuror Kamran Əliyev hesabat dövründə respublikada kriminogen durumun nəzarətdə saxlandığını, əhalinin hər 100 min nəfərinə düşən 132 cinayətin sayına görə ölkəmizin MDB və Avropa məkanında öncül mövqeyini saxlayaraq ən təhlükəsiz və sabit dövlətlərdən biri olduğunu qeyd edib.

Bildirib ki, Daxili İşlər Nazirliyi, Dövlət Təhlükəsizliyi Xidməti və digər hüquq-mühafizə orqanları ilə birgə fəaliyyətin nəticəsi olaraq, cinayətkarlığın dinamikasında və strukturunda müşahidə edilən müsbət göstəricilər hesabat dövründə də davam edib. 2020-ci ilin birinci yarımilində əməliyyat-axtarış və istintaq fəaliyyətini həyata keçirən bütün dövlət orqanları üzrə 13 min 310 cinayət qeydə alınıb. Bu cinayətlərin 86,5 %-i böyük ictimai təhlükə törətməyən və az ağır, yalnız 13,5%-i ağır və xüsusilə ağır növlər təşkil edib.

Həyata keçirilən məqsədyönlü və qabaqlayıcı tədbirlər nəticəsində qəsdən adam öldürmə, qəsdən sağlamlığa az ağır zərər vurma, dələduzluq, mənimsəmə və israf etmə, avtonəqliyyatın qaçırılması, xuliqanlıq, ölümlə nəticələnən yol-nəqliyyat hadisələrinin sayı azalmış, cinayətlərin açılması 82,1% təşkil edib. Daxili işlər orqanları ilə birgə keçmiş illərdən bağlı qalmış 241 cinayətin açılması təmin edilib, 103 cinayətkar qrup zərərsizləşdirilib.

Bütün bu deyilənlərin fonunda, Azərbaycanın sözügedən məsələdə MDB və Avropa məkanında öncül mövqeyini saxlamasında hüquq-mühafizə orqanlarının rolunu ekspertlər necə dəyərləndirirlər?

  • “Hüquq-mühafizə orqanlarının koordinasion qaydada bir-birilə sıx əlaqəli şəkildə işləmək qabiliyyəti, bacarıqları var”

Sözügedən məsələyə aydınlıq gətirən “Polisə Dəstək” İctimai Birliyinin rəhbəri Şəmsəddin Əliyev bununla bağlı bir sıra məqamlara toxundu: “Azərbaycan əhalinin hər 100 min nəfərinə düşən cinayətlərin sayına görə nəinki MDB, eyni zamanda, bir sıra Avropa ölkələrindən öncül mövqedədir. Hesab edirəm ki, bu, mühüm göstəricidir. Bu, ilk növbədə, cinayətkarlıqla mübarizədə dövlətin düzgün siyasətinin səmərəli şəkildə həyata keçirilməsinin təzahürüdür. Digər tərəfdən, Azərbaycanda hüquq-mühafizə orqanlarının koordinasion qaydada bir-birilə sıx əlaqəli şəkildə işləmək qabiliyyəti, bacarıqları var. Yəni heç bir başqa əlamətlərə yol vermədən dövlətin cinayətkarlıqla mübarizə siyasətinin təmin edilməsində birgə mübarizə aparırlar. Hesab edirəm ki, bu çox ciddi faktordur. Başqa bir tərəfdən, vətəndaş cəmiyyəti də cinayətlərin açılmasında, cinayətkarlıqla mübarizədə fəal iştirak edir. Məsələn, Prezident yanında QHT-lərə Dövlət Dəstəyi Şurasının bu istiqamətdə layihələrin icrasına dəstək verməsi də bu işə fayda verir. Ümumilikdə, insan alverinə, narkoticarətə qarşı mübarizədə, vətəndaşların sağlamlığına yönəlik cinayətlərin, ictimai yerlərdə baş verən cinayətlərin açılmasında və profilaktik maarifləndirmə tədbirlərinin həyata keçirilməsində güc strukturlari birgə işləyirlər. Daxili İşlər Nazirliyi, prokurorluq və digər hüquq-mühafizə orqanları birgə işləyirlər. Bu çox sevindirici haldır. Deyərdim ki, bu model Avropaya nümunə olan modeldir. Dəfələrlə beynəlxalq tribunalarda cinayətkarlıqla mübarizə ilə bağlı hesabatlarda Azərbaycanın modeli yüksək qiymətləndirilib. Deməyim odur ki, əhalinin polisə məmnunluğunu ifadə etməsi, vətəndaş cəmiyyətinin prosesdə iştirak etməsinin özü səmərəli bir nəticənin hasil olmasına gətirib çıxarıb”.

Ekspertin fikrincə, ölkədəki hüquq-mühafizə orqanlarının birgə səyi nəticəsində bu cür uğurlu nəticə əldə olunub.

Vidadi ORDAHALLI

Son xəbərlər