18/09/2020 20:22
728 x 90

Zəngilanlı məcburi köçkün “188” yükdaşıma şirkətindən çıxarılmasını qanunsuz sayır

img

Zəngilan rayonundan olan məcbur köçkün Məmmədov Məmmədqulu “188” yükdaşıma şirkətindən qanunsuz olaraq işdən çıxarılması barədə redaksiyamıza müraciət edib. 

Şikayətçi qeyd edir ki, o, ötən ilin sentyabr ayından bu ilin may ayınadək “188” yükdaşıma şirkətində sürücü kimi çalışıb.

  • Məmmədqulu Məmmədov: “Mayın 21-də dedilər 56 yaşın var, artıq bizimlə işləyə bilməzsən və buna görə də işdən kənarlaşdırıb yük maşınını məndən aldılar”

Mayın 21-də isə yaşına görə işdən çıxarılıb: “Mayın 21-də dedilər 56 yaşın var, artıq bizimlə işləyə bilməzsən və buna görə də işdən kənarlaşdırıb yük maşınını məndən aldılar. Məlumat üçün bildirim ki, aylıq 400 manat maaş alırdım. Fevral, mart, aprel və may ayının 21 gününün maaşını vermirlər. Mayın 21-dən bu günədək işsizəm. Məsələ ilə bağlı Daxili İşlər Nazirliyinə, Prokurorluğa müraciət ünvanladım. Lakin  hələ ki, bir cavab yoxdur. Nə edəcəyimi bilmirəm. Özüm Zəngilan rayonundan məcburi köçkünəm. Yataqxanada yaşayıram”.

  • “188” yükdaşıma şirkəti - Səfər: “Şirkətin rəhbəri var, mühasibatı var, onlarla əlaqə saxlayın, məni bu işlə bağlı narahat etməyin”

Məsələ ilə əlaqədar “188” yükdaşıma şirkəti ilə əlaqə saxlamağa çalışdıq. Şirkətin mühasibi Fərid adlı şəxs zəngimizə cavab vermədi. Səfər adlı kassir isə “Şirkətin rəhbəri var, mühasibatı var, onlarla əlaqə saxlayın. Məni bu işlə bağlı narahat etməyin” deyərək, danışmaqdan imtina etdi. Zəng mərkəzi isə telefonumuzu açsa da, bizə heç bir kömək edə bilməyəcəyini dedi. Faktla bağlı qarşı tərəfin də mövqeyini öyrənməyə çalışsaq da, şirkət nümayəndələri mövzudan yayındılar.

Günel CƏLİLOVA

Son xəbərlər